ب پشکداریا ٩ پەنەلیستێن زانکۆیا دهۆک، وەزارەتا خواندنا بلند و ڤەکۆلینێن زانستی یا حکومەتا هەرێما کوردستانێ، ئێکەم کۆنفرانسێ خۆ یێ زانستی ب مەرەما پێداچوون و هەلسەنگاندنێ بۆ رەهەندێن جودایێن بۆلۆنیا پرۆسێس ل هەرێما کوردستانێ ئەنجام دا.
ل ٢٨ و ٢٩ـی تەباخا ٢٠٢٢ـێ و ل هەولێرا پایتەخت و بۆ دەمێ دوو رۆژان، کۆنفرانسێ بۆلۆنیا پرۆسێس، کو ژ هەشت پانێڵا پێکدهات، هاتە ئەنجامدان.
د کۆنفرانسی دا گۆتوبێژێن ئەکادیمی ژلایێ بەشداربوویان ڤە ل دۆر چەندین بابەتێن گرێدایی هەلسەنگاندن و پێنگاڤێن جێبەجێکرنێ و ئاستەنگ و رێکێن چارەسەریێن گونجای بۆ پێڤاژۆیا بۆلۆنیا هاتنەکرن.
ل دویماهیێ ژی ئەنجام و راسپاردەیێن کۆنفرانسی هاتنە گۆتوبێژکرن و د راپۆرتەکێ دا هاتنە کۆمکرن بۆ وەزارەتا خواندنا بلند ب مەرەما جێبەجێکرنێ.
هەژی ئاماژی یە شاندێ زانکۆیا دهۆک ب سەرۆکاتیا د. داود سلێمان ئەتروشی سەرۆکێ زانکویا دهۆک و هژمارەکا بسپۆر و مامۆستایێن زانکۆیا دهۆک پشکداریەکا چالاک د ئێکەم کۆنفرانسێ زانستی دا ل هەرێما کوردستانێ ل دۆر پێڤاژۆیا بۆلۆنیا کر.
ل دۆر رۆلێ زانکۆیا دهۆک د ڤی کۆنفرانسی دا، د. لوقمان هادی حەسەن هاریکارێ سەرۆکێ زانکۆیا دهۆک خویاکر "زانکۆیا دهۆک ب ٩ پەنەلستا پشکداریەکا سەرەکی د ڤی کۆنفرانسی دا کر کو ب شێوەیەکێ ئاستبەرزانە بابەتێن خۆ ل دۆر بۆلۆنیا پرۆسێس پێشکێشکرن و لایەنێن بەرهەڤکار دەستخۆشی ل زانکۆیا دهۆک کر بۆ رۆلێ وان د کۆنفرانسی دا".
دهێتە زانین ل سالا 2015ـێ وەزارەتا خواندنا بلند و ڤەکۆلینێن زانستی، بریارا بجهئینانا بنەمایێن پرۆسێسا بۆلۆنیا دایە، وەکو ئێکەم پێنگاڤ ژی هژمارەکا زانکۆیان دەست ب بجهئینانا ئەڤی سیستەمی کر، پاشی ب قووناغێن جودا زۆربەیا زانکۆیێن هەرێما کوردستانێ چوونە د ناڤ ڤی سیستەمێ دا و د نوکە دا د قووناغێن پێشکەڤتیێن جێبەجێکرنێ دایە.