ب سەرپەرشتیا د. ئارام محەمەد قادر، وەزیرێ خواندنا بلند و ڤەکۆلینێن زانستی، کۆمبوونا لژنا بلندا زانستی یا کۆنفرانسێ بۆلۆنیا پرۆسێس ل هەرێما کوردستانێ ب پشکداریا راوێژکار و رێڤەبەرێن گشتی و نوینەرێن زانکۆیێن هەرێما کۆردستانێ هاتە ئەنجامدان.

وەزیرێ خواندنا بلند د کۆمبوونێ دا ب گرنگی باس بۆلۆنیا پرۆسێس کر و راگەهاند "ئەڤ سیستەمە بۆ زانکۆیێن هەرێما کوردستانێ دێ یێ هاریکار بیت، بۆ وێ چەندێ کو قوتابی د گۆپیتکا پرۆسێسا خواندنێ دابن، ژینگەهەک پەیدا ببیت کو دەلیڤەیێن زێدەتر و جۆراوجۆرتر بۆ قوتابی بهێنە پەیداکرن بۆ پێشئێخستنا ئاستێ خۆ یێ زانستی".

وەزیرێ خواندنا بلند گۆت ژی "ئەڤ سیستەمە دێ یێ هاریکار بیت بۆ بەرفرەهکرنا رەهەندێن نیڤدەولەتی یێن خواندنا بلند ل هەرێما کوردستانێ ب رێکا ئالۆگۆرکرنا مامۆستا و ڤەکۆلەر و قوتابیان بۆ دەستکەڤت و پشتەڤانیێن نیڤدەولەتی بۆ ئەنجامدانا ریفۆرمێ د کەرتێ خواندنا بلند دا".

هەژی ئاماژێ یە کو بریارە ل رۆژێن ٢٨ و ٢٩ـێ یێن ڤێ مەهێ و ل باژێرێ هەولێرێ، کۆنفرانسێ زانستییێ بۆلۆنیا پرۆسێس ل هەرێما کوردستانێ و ب پشکداریا بسپۆرێن نیشتیمانی و نیڤدەولەتی بهێتە ئەنجامدان و تێدا پێداچوون و هەلسەنگاندن بۆ رەهندێن جودایێن بۆلۆنیا پرۆسێس بهێنە کرن و ب رێکا دانوستاندن و دیدارێن زانستی؛ ئاریشە و ئاستەنگێن ل هەمبەر سیستەمێ ناڤهاتی بهێنە دەستنیشانکرن و پلان و رێکێن گونجای بۆ چارەسەرکرنێ بهێنە دیارکرن.

دهێتە زانین ل سالا 2015ـێ وەزارەتا خواندنا بلند و ڤەکۆلینێن زانستی، بریارا بجهئینانا بنەمایێن پرۆسێسا بۆلۆنیا دایە، وەکو ئێکەم پێنگاڤ ژی ژمارەکا زانکۆیان دەست ب بجهئینانا ئەڤی سیستەمی کر، پاشی ب قووناغێن جودا زۆربەیا زانکۆیێن هەرێما کوردستانێ چوونە د ناڤ ڤی سیستەمێ دا و د نوکە دا د قووناغێن پێشکەڤتیێن جێبەجێکرنێ دایە.