هێلا گەرم یا رێگرتنێ ل خۆکوشتنێ د خزمەتا وەلاتیان دایە
Aug. 25, 2022, 12:45 p.m.

ل سالا 2021ـێ و پشتی زێدەبوونا رویدانێن خۆکوشتنێ ل پارێزگەها دهۆکێ ب گشتی و ل ناڤ کەمپێن پەنابەر و ئاوارەیان ب تایبەتی، پەیمانگەها چارەسەریا دەروونی و چارەسەریا ترۆمایێ سەر ب زانکۆیا دهۆک ڤە؛ بۆ رێگرتنێ ل ئەڤێ دیاردێ، ب فەر زانی (هێلا گەرم) بێخیتە کاری، ئەوژی ب هەڤکاری و هەڤپشکی دگەل حکومەتا ئەلمانیا- ویلایەتا بادن ڤورتمبێرگ. ئەڤ هێلە بتنێ بۆ پارێزگەها دهۆکێ یا کارایە.

هێلا گەرم چیە؟

هێلا گەرم یا تایبەتە ب ئەوان کەسێن هزرێن خۆکوشتنێ هەین یان هەولددەن ب هەر ئەگەرەکێ هەبیت ژیانا خۆ ب دویماهی بینن، دێ شێن پەیوەندیێ ب ئەڤێ ژمارا بێ بەرامبەر بکەن (80025050).

تیمێ هێلا گەرم:

تیمێ هێلا گەرم یا پێکهاتیە ژ ژمارەکا دەروونناس و چارەسەرکارێن دەروونی یێن بسپۆر و شارەزا د بوارێ چارەسەریا دەروونی دا، هەمی ژی خودان باوەرنامێن بلندن د بسپۆریا خۆ دا.

ئەرکێن تیما هێلا گەرم:

1- ئەرکێ سەرەکیێ ئەڤێ تیمێ ئەوە کو یا بەرهەڤە د 24 دەمژمێران دا گوهداریا تە بکەت.

2- پشتەڤانیکرن و هوشیارکرنا دەروونی بۆ نەهێلانا خۆکوشتنێ، ئەوژی ب رێکا کۆر و سمینار و چالاکیان ل سازییێن حکومی و نەحکومی.

3- هەلسەنگاندنەکا زانستی یا دەروونی بۆ هەر کەسەکێ پەیوەندیێ بکەت، ئەوژی ل دویڤ پیڤەرێن جیهانی یێن زانستی.

4- هاریکاریکرنا کەسێ پەیوەندیێ دکەت بۆ وەرگرتنا چارەسەریا دەروونی یا دروست، ئەوژی ب رێکا هنارتن و رەوانەکرنا کەسێ پەیوەندیێ بکەت بۆ سازییێن گرێدای ب چارەسەریێ ڤە، وەکو: کلینیکا (ئای پی پی – IPP) یا چارەسەریا دەروونی، سەنتەرێ چارەسەریا دەروونی یێ زارۆک و سنێلان، نەخۆشخانا ئازادی (پشکا دەروونی)، یانژی کلینیکێن نۆژدار و تایبەتمەندێن دەروونی.

هەمی زانیاریێن پەیوەندییێ دا ب نهێنی دێ سەرەدەری دگەل هێتەکرن و دێ هێنە پاراستن.

بۆ ماوێ پتر ژ سالەکێ یە ئەڤ تیمە شیایە ژمارەکا مەزن یا خەلکێ پارێزگەها دهۆکێ، زێدەباری پەنابەر و ئاواران ژ ئەڤێ دیاردێ قورتال بکەت.

تێبینی: پەیوەندیکرن ب هێلا گەرم یا بێ بەرامبەرە و 24 دەمژمێران د خزمەت دایە.