(DAAD) یا ئەلمانی دەلیڤێن خواندنێ بۆ دەرچوویێن ئامادەیی رادگەهینیت
Aug. 21, 2022, 11:47 a.m.

هەوەیێن رێزدار ئاگەهداردکەین رێکخراوا (DAAD) یا ئەلمانی پرۆگرامێ سکۆلەرشیپێ یێ ناڤخۆیی ب ناڤێ "رێکارێن رەخساندنا ئاشتیێ ب رێکا پەروەردێ ل عیراقێ" پێشکێشی دەرچوویێن ئامادەیێ دکەت بۆ بدەستڤەئینانا باوەرناما بەکالۆریۆسێ ل هەرێما کوردستانێ.

ئەڤ پرۆگرامە یێ بەردەستە بۆ وان قوتابیێن دهێنە وەرگرتن ل هندەک پشکێن دەستنیشانکری بۆ سالا خواندنێ (2022–2023) ل زانکۆیا دهۆك، زانکۆیا سلێمانی، زانکۆیا سەلاحەدین و زانکۆیا کاثۆلیکی ل هەولێر.

چوار پشکێن زانستێ هاتینە هەلبژارتن بۆ وەرگرتنا دەرچوویێن ئامادەیێ ل زانکۆیا دهۆك وەكو ل خوارێ دیارکری:

  • کولیژا زانستێن ئەندازیاریا چاندنێ/ پشکا شیرەتکاریا چاندنێ و گەشەپێدانا گوندیاتی.
  • کولیژا زانست/ پشکا زانستێن کۆمپیوتەری.
  • کولیژا زانستێن تەندروستی/ پشکا زانستێن لابۆرێن پزیشکی.
  • کولیژا کارگێری و ئابۆری/ پشکا کارگێری کار.

بۆ زانین ئەو قوتابیێ بهێتە وەرگرتن ل ڤی پرۆگرامی دێ چەندین هاریکاری و ئاسانکاری بۆ هێنە دابینکرن ل دەمێ خواندنا وی/وێ ل زانکۆیێ. ژ وان هاریکاریا؛ پێدانا گوژمەکی دراڤی ل دەستپێکا خواندنێ و پێدانا هاریکاریەکا دراڤی یا هەیڤانە و کرێیا خواندێ ژلایێ رێکخراوێ ڤە دێ هێتە دابینکرن ئەگەر ئەو قوتابی ب شێوێ پارالێل بهێتە وەرگرتن.

ئەڤ سکۆلەرشیپە بۆ وان قوتابیانە یێن بارێ ئابۆرى و کۆمەلایەتى کارتێکرنێ لسەر ئاستێ وان یێ خواندنێ دکەن و دبنە ئاستەنگ بەرامبەر بدەستڤەئینانا باوەرنامێن بلندتر.

دویماهی ژڤان بۆ پێشکێشکرنێ:

26-9-2022

بۆ پتر پێزانینان لینکێ ل خوارێ کلیک بکە:

http://www.daad.de/in-country-programme-iraq

بۆ پێشکێشکرنێ لینکێ ل خوارێ کلیک بکە:

https://www.daad.de/surveys/212823?lang=en