بۆ کارتێکرنەکا باشترا جڤاکی و ئابووری.. زانکۆیا دهۆک کۆربەندەک ئەنجامدا
فبراير 27, 2023, 9:27 ص

ب مەرەما بهێزترکرنا هەڤکاریێ و کاراکرنا رۆل و پشکداریا لایەنێن دەرڤەی زانکۆیا دهۆک، وەکو سازیێن کەرتێن گشتی و تایبەت و رێکخراوێن جڤاکێ مەدەنی و سەندیکا و رێکخراوێن پیشەیی، ئەڤرۆ رێکەڤتی ٢٦ـی شوباتا ٢٠٢٣ و ل سەنتەرێ کۆنفرانسان، ب ئامادەبوونا د. داود سلێمان ئەتروشی، سەرۆکێ زانکۆیا دهۆک و نوینەرێن سازیێن حکومی و نەحکومی و کەرتێ تایبەت و سەندیکا و رێکخراوێن پیشەیی و دەزگەهێن راگەهاندنێ و قوتابی و مامۆستایان، زانکۆیا دهۆک کۆربەندێ "ئەرکێ سێیەمێ زانکۆیا دهۆک و کارتێکرنێن جڤاکی" ئەنجامدا.

ل دەستپێکا کۆربەندی و د پەیڤەکێ دا، د. داود ئەتروشی شرۆڤەکرنەک دا ئەرکێ سێیەمێ زانکۆیێ و گرنگیا وێ یەکێ کو زانکۆی نەهێنە چارچۆڤەکرن ب تنێ د بجهئینانا ئەرکێن ئێکەم و دووەم دا، کو پێگەهاندنا قوتابیان و ئەنجامدانا ڤەکۆلینێن زانستی بخۆڤە دگرن، بەلکو ژ بلی ڤان هەردوو ئەرکا، پێدڤیە ئەو زانینا ل زانکۆیێ دهێتە بەرهەمئینان و داهێنانێن دهێنە ئەنجامدان، بکەنە د خزمەتا جڤاکی دا و هەمی لایەن و پێکهاتێن جڤاکی ژێ مفادار ببن. هەروەسا سەرۆکێ زانکۆیا دهۆک دیارکر "مە بەری نوکە گەلەک پێنگاڤ د ڤی بواری دا هاڤێتینە، کو هژمارەکا زۆرا کلینیک و نڤیسینگەهێن شیرەتکاری سازیێن دی یێن زانکۆیا دهۆک مە کرینە د خزمەتا جڤاکی دا. هەروەسا زانکۆیا دهۆک هژمارەکا پرۆژان هەنە کو د نوکە ژی دا بەردەوامن، ڤی ئەرکی دگێرن و خزمەتان پێشکێشی جڤاکی دکەن". پاشی سەرۆکێ زانکۆیا دهۆک سوپاسیا هەمی لایەنێن بەردەوام هەڤکار و پشتەڤان بۆ زانکۆیا دهۆک کر.

ل دویڤ دا، د. لوقمان هادی حەسەن، هاریکارێ سەرۆکێ زانکۆیێ، د سمینارەکێ دا باس ل گرنگیا هەماهەنگی و هەڤکاریا لایەنێن خودان بەرژەوەندی دگەل زانکۆیا دهۆک کر و خویاکر "ئێدی ب تنێ پشتبەستن ل سەر هژمارا دەرچوویێن زانکۆیێ ناهێتە کرن، بەلکو خزمەتێن زانکۆ پێشکێشی جڤاکی دکەت، پێڤەرەکێ گرنگێ سەرکەڤتنێ یە. ل زانکۆیا دهۆک، مە دەست ب ڤێ ریفۆرمێ کریە و ئێک ژ وان پێنگاڤان ژی بجهئینانا پێڤاژۆتا بۆلۆنیایە، بۆ ڤێ ریفۆرمێ ژی مە پێدڤی ب هەمی لایەنان هەیە، چ ل ناڤ زانکۆیێ یانژی یێن دەرڤە".

پاشی دوو پانێلێن دانوستاندنێ ل دۆر ڤان مژارا هاتنە ئەنجامدان. د پانێلێ ئێکێ دا، ئەوێ ب ناڤونیشانێ "دێ چەوا لایەنێن خودان بەرژەوەندی رۆلێ خۆ د پێشڤەبرنا زانکۆیا دهۆک دا گێرن؟" و ب پشکداریا سەیفەدین نێمر، بەرپرسێ ئۆفیسا رێکخراوا یۆنسێف ل دهۆکێ، د. ئەفراسیاب مووسا، رێڤەبەرێ گشتیێ ساخلەمیێ ل پارێزگەها دهۆکێ، د. بەسام ئەحمەد عەبدوللا، راگرێ کولیژا کارگێری و ئابووری ل زانکۆیا دهۆک، دلۆڤان بەرەکە ژ کۆمپانیا شاهان و ئەمیر عەبدولعەزیز، دەرچوویێ زانکۆیا دهۆک و ب رێڤەبرنا د. شەهین عەبدوللا، د ڤی پانێلی دا دانوستاندن ل دۆر کاراکرنا پشکداریا لایەن و کەرتێن جودا د زانکۆیێ و بهێزترکرنا هەماهەنگیا لایەنێن خودان بەرژەوەندی هاتنە ئەنجامدان.

پانێلێ دووێ ژی ب پشکداریا عومەر عەلی تاها، رێڤەبەرێ گشتیێ پەروەردا پارێزگەها دهۆکێ، عەگید سەعید ژ کۆمپانیا کۆرەک تیلیکۆم، د. لەیلان حسێن، مامۆستایا کولیژا زانستێن ئەندازیاریا چاندنێ ل زانکۆیا دهۆک، ئاراز جەمیل ژ کۆمپانیا کاڤین گرۆپ و دەرچوویا زانکۆیا دهۆک چنین ئسماعیل و ب رێڤەبرنا د. ئاری حەبیب، ل دۆر راهێنان و مفایێن وێ بۆ خودان کاران هاتە ئەنجامدان. د ڤی پانێلی دا دانوستاندن ل دۆر چەوانیا راهێنانا قوتابیان د خولێن هاڤینی و پراکتیکی دا و کەتوارێ ڤێ پرۆسێسێ و چەوانیا پێشڤەبرنێ هاتنە کرن، هەروەسا گرنگیا هەبوونا هەماهەنگیەکا زێدەتر د ناڤبەرا زانکۆیا دهۆک و سازیێن ئەڤ راهێنان و پراکتیککرنە لێ دهێتە ئەنجامدان بابەتەکێ دیێ گرنگێ ڤی پانێلی بوو.

ل دویماهیا ڤی کۆربەندی ژی، راسپارد و تێبینیێن دویماهیێ ژ لایێ د. لوقمان هادی حەسەن ڤە هاتنە پێشکێشکرن.

راگەهاندنا زانکۆیا دهۆک؛ ٢٦ـی شوبات ٢٠٢٣

عسمەت خابوور

فۆتۆ: محەمەد عەبدولکەریم و حسێن تتمی