راگەهاندنا زانکۆیا دهۆک؛ ١٧ـی چریا دووێ ٢٠٢٢

زانکۆیا دهۆک دگەل زانکۆیا تەکنیکی یا دۆرتموند یا ئەلمانی پرۆژەکێ هەڤپشک هەیە د بوارێ پلاندانانێ دا، کو هەمان پرۆگرامێ خواندنێ یێ زانستی بۆ پلاندانانێ یێ زانکۆیا تەکنیکی یا دۆرتموند ل زانکۆیا دهۆک ژی دهیتە پەیرەوکرن، ژ قۆناغا ئێکێ تا قۆناغا دوماهیێ.

بۆ ئێکەم جارە قوتابیێن باکالۆریۆسێ ل قۆناغا سێیێ ژ زانکۆیا تەکنیکی یا دۆرتموند بۆ زانکۆیا دهۆک دهێنە هنارتن ، کو نها ١٣ قوتابیێن ئەلمان وەک مێڤان ل زانکۆیا دهۆک دگەل قوتابیێن قۆناغا سیێ ل کولیژا پلاندانانێ ل زانکۆیا دهۆک بەردەوامیێ ب خواندنا خۆ ددەن. دهێتە زانین پێشوەخت پرۆژێن وان هاتینە ئێکگرتن و ب رێکا ئونلاین دانوستاندن د ناڤبەرا قوتابیێن هەردوو زانکۆیا هەبوون، لێ نها ل ئێک هۆل پرۆژێن خۆ یێن هەڤپشک گەنگەشەدکەن و پێشدئێخن، ب سەرپەرشتیا ژمارەکا مامۆستایێن ئەلمانی و کوردستانی ل زانکۆیێن ناڤهاتی.

ل دۆر ڤێ ئالۆگۆرکرنێ سەمیر هاشم هاریکارێ راگرا کولیژا پلاندانانێ ل زانکۆیا دهۆک دیارکر "چەندین جاران ئالۆگۆرکرنا مامۆستایا د ناڤبەرا هەردوو زانکۆیان دا هەبوو، لێ ئەڤە ئێکەم جارە قوتابیێن زانکۆیا تەکنیکی یا دۆرتموند د چارچۆڤێ ڤی بەرنامەی دا دهێنە زانکۆیا دهۆک. هەروەسا ئەڤ سالە قوتابیێن زانکۆیا دهۆک ژی دێ ل مەشقا هاڤینێ بۆ ماوێ هەیڤەکێ سەرەدانا ئەلمانیا کەن بۆ هەمان مەبەست".

نوکە ئەو پرۆژێن هەڤپشکێن قوتابیان بەرهەڤن و د چەند رۆژێن بهێن دا هژمارەکا سمینار و وۆرکشۆپ و چالاکی بهێنە ئەنجامدان ب سەرپەرشتیا راگرێ کولیژا پلاندانانێ ل زانکۆیا تەکنیکی یا دۆرتموند و مامۆستایێن زانکۆیا دهۆک.

هەر د چارچۆڤێ ڤی بەرنامەی دا، قوتابی دێ سەرەدانا چەندین کەمپێن پەنابەر و ئاوارا ل دهۆکێ کەن، ب تایبەتی یێن ئێزدینشین، چونکە ئێک ژ گرفتێن نوکە ل ئەلمانیا هەین ئاریشا کۆچکرنا ئێزدیان بۆ ئەوروپا، ب تایبەت بۆ ئەلمانیا. ل ڤێرە پرۆژە و پلانێن ڤان قوتابیان دێ خزمەتا ئێزدیان کەن ل سەر ئاستەکێ زانستی د ناڤبەر هەرێما کوردستانێ و ئەلمانیا دا ب رێکا هەردوو زانکۆیان، پشتی دگەهنە ئارمانجێن پێدڤی.

دهێتە زانین پەیوەندیێن زانکۆیا دهۆک دگەل زانکۆیێن ئەلمانی بەردەوامن، ب تایبەت دگەل زانکۆیا تەکنیکی یا دۆرتموند د بوارێ پلاندانانێ دا، کو ئەڤە چەندین سالە هەڤکاری و پێکڤە کارکرن د ناڤبەرا وان دا هەیە و بەردەوامە.

زانکۆیا تەکنیکی یا دۆرتموندا ئەلمانی ل سالا ١٩٦٨ـێ هاتیە دامەزراندن و ئێکەم سەرۆکێ وێ مارتن شمایسەر Martin Schmeisser بوو و ئێکەم سمینار هاتیە گۆتن ل پۆلا کیمایێ بوو ل سالا ١٩٦٩ـێ، و ل سالا ٢٠٠٧ـێ بوویە زانکۆیەکا تەکنیکی و ژ ١٦ پشک و کولیژێن جودا پێکدهێت، کو پلاندانان ئێک ژ وانە.