سەرۆكێ زانكۆیا دھۆك سەرەدانا زانكۆیا گرانادا یا ئیسپانی كر
March 17, 2023, 1:40 a.m.

ب مەرەما پشكداریكرنێ د كۆنفرانسێ كومەلا گشتی یێ ئێكەتیا زانكۆیێن دەریا ناڤەراست UNIMED دا، سەرۆكێ زانكۆیا دھۆك د. داود ئەتروشی سەرەدانەك بۆ وەلاتێ ئیسپانیا ئەنجامدا و ب مەرەما بھێزكرنا پەیوەندیێن زانكۆیا دھۆك ل گەل زانكۆیێن جیھانی، سەرۆكێ زانكۆیێ سەرەدانا زانكۆیا گرانادا كر ل گەل سەرۆكا زانكۆیا ناڤبری پ.د. بیلارا ئارندا كۆمبوو.

د كۆمبوونێ دا گەنگەشە ل دۆر دەلیڤێن ھەڤكاریێ د ناڤبەرا ھەردوو زانكۆیا دا ھاتەكرن، ئەوژی ب رێكا پشكداربوونێ د پرۆژێ ئەوروپی دا (پێگەھاندنا مامۆستایێن قۆناغا سەرەتایی ل ھەرێما كوردستانێ (TeachersMOD)، كو ب رێكا بەرنامێ ئێكەتیا ئەوروپی یا فێركرن و راھێنانێ Erasmus+ 2022 دھێتە ئەنجامدان. ئارمانجا بەرنامەی بەرزكرنا ئاستێ پرۆسێسا وانەگۆتن و فێركرنێیە ژ لایێ كوالیتیێ ڤە بۆ مامۆستایێن زانكۆیا دھۆك. ئەوژی ب رێكا ھەڤكاریێ د ناڤبەرا زانكۆیا دھۆك و زانكۆیێن ئێكەتیا ئەوروپی دا.

ل دویڤ بەرنامێ TeachersMOD، رێككەڤتن دناڤبەرا زانكۆیا دھۆك و زانكۆیا گرانادا دا ھاتیە كرن كو ھەڤكاری د چەندین بواران دا بهێتە کرن، وەكو ڤەكۆلینێن ئاشتی و ھەڤركیێ، خوارن، وەرگێران و وەرگێرانا ئێكسەر و چەندین بوراێن دی بھێتە ئەنجامدان و د ماوەیێ بھێت دا دێ ب ھویری ڤەكۆلین ل سەر ھێنە كرن و پەیوەندی د ناڤبەرا ڤەكۆلەر و مامۆستایێن ھەردوو زانكۆیان دا دێ دەستپێكەن.

ھەژی ئاماژەكرنێ یە كۆنفرانسێ ئێكەتیا زانكۆیێن دەریا ناڤەراست UNIMED ل رۆژێن ١٥ و ١٦ ئادارێ ٢٠٢٣ ل باژێرێ گرانادا یێ ئیسپانی دێ ھێتە ئەنجامدان. كو ژ ١٥٠ زانكۆیێن وەلاتێن كنارێ دەریا ناڤەراست پێكدھێت و بنگەھێ وێ ل باژێرێ رۆما یێ ئیتالی یە و ئەركێ سەرەكی یێ وێ لێكگوھۆرینا ئەزمۆنا و ئەنجامدانا ھەڤكاریێ یە د بوارێ زانستی و ئەكادیمی دا.

راگەهاندنا زانکۆیا دهۆک؛ ١٥ـی ئادار ٢٠٢٣

و: ماهر تاهر