پشكا ئەندازیاریا تەلارسازی ل كۆلیژا ئەندازیاری – زانكۆیا دھۆك ل رێكەڤتی ١٧ـی گولانێ ٢٠٢٣ وۆركشۆپەك ل دۆر "دیزاینا ناڤخۆیی: وانەگۆتن و جێبەجێكرن" بۆ پێشئێخستنا ستراتیجیەتا ب پشتبەستن ل سەر پرۆژەكێ فێربوونێ، ل ئاڤاھیێ كولیژێ ب ئامادەبوونا د. نەبەز ئیبراھیم محەمەد، ھارێكارێ سەرۆكێ زانكۆیێ و د. جێمس حەسدو ھیدو، راگرێ كولیژا ئەندازیاری و مامۆستا و قوتابیێن كولیژا ئەندازیاری ئەنجامدا. ل گەل وۆركشوپێ پیشانگەھەك بۆ دیزاینێن قوتابیان ھاتە ڤەكرن كو قوتابیان بۆ ماوێ دوو ھەیڤان كار تێدا كریە و دیزاینێن جودا یێن ناڤخۆیی یێن ئاڤاھیان پێشاندان.
وۆركشۆپ ب مەبەستا گەنگەشەكرنا كارێ ب كۆم و كارێ مەیدانی یێ قوتابیێن قۆناغا چارێ، وەكو پشكەك ژ پرۆژێ فیركرنێ ھاتە ئەنجامدان، ھەروەسا بۆ زانینا رێكێن د جێبەجێكرنا دیزاینا ناڤخۆیی دا د كەتواریدا پشتبەستن ل سەر دھێتە كرن. زێدەباری گەنگەشەكرنا پێشئێخستنا رێكێن وانەگوتنا دیزاینا ناڤخۆیی ل پشكا تەلارسازی ل كۆلیژا ئەندازیاری بۆ سالا بھێت.
دەربارەیی پرۆژەیان، بۆ پێدڤیا شیاندانا قۆتابیا بوو، داكو د جێبەجێكرنا كریاری یا دیزاینا دا رەھوان ببیت و ل شوینا نیگاركرن و ھێلكاریا ئەندازیاری ب تنێ، د كەتواری دا ب سەرپەرشتیا دوو مامۆستایێن پشكا تەلارسازی پرۆژە ب شێوێ كەتواری جێبەجێكرن، سەرپەرشتێن پرۆژەی مامۆستا مەروا محەمەد و مامۆستا نارام مارقوس بوون، ب پشكداریا ھەمی قوتابیێن قۆناغا چوارێ یێن پشكا تەلارسازی كۆ ھژمارا وان ٣٣ قوتابی بوون، كو ل سەر سێ گرۆپان ھاتبوونە دابەشكرن و ھەر گرۆپەكی ١١ قوتابی بوون و كار ل سەر مۆدێلەكا تایبەت ژ مۆدێلێن بەرنیاس د بوارێ دیزاینا ناڤخۆیی دا دكر. ئەڤ پرۆژە ب پلاندانان و دارێژتنا ھزرا و جێبەجێكرنا وان ڤە د ماوێ دوو ھەیڤان دا ھاتە ئەنجامدان، د ڤی ماوەی دا قوتابی ئاراستێ سەرەكی بوو د جێبەجێكرنا ئەرك و ھەمی كارێن پرۆژەی وەكو دیزاین و دیكور ژلایێ تیۆری ڤە و ھەلبژارتن و كرینا پەرۆك و رۆناھی و ھەمی پێدڤیێن دی و سەرەدەریكرن ل گەل كارمەندا و ئەندازەكرنا ئەنجامێن دویماھیێ یێن دیزاینا.
د وۆركشۆپی دا مامۆستا مەروا محەمەد بسپۆرا دیزاینا ناڤخۆیی كورتیەك دەربارەی وۆركشۆپی پێشكێشكر و دیاركر كو ئەڤ وۆركشۆپە ژ ئەگەرێ وێ چەندێ ھاتیە كو خواندنا دیزاینا ناڤخۆیی بێی ئەنجامدانا كریاری یا تمام نینە، لەورا یا گرنگە ل گەل خواندنا تیۆری و فێركرنا پشتبەستنێ ل سەر نیگاركرنێ دكەت، دیزاین ب شێوێ كریاری ژی بھێنە جێبەجێكرن. ھەروەسا ناڤبری باس ل سەرھلدانا دیزاینا ناڤخۆیی كر كو بۆ ماوێ بەری مێژوویێ دزڤریت ل دمێ مرۆڤێ دەستپێكی نیگار ل سەر دیوارێن شكەفتا دروستدكرن، دیسان دیزاینێن دەستپێكی یێن د ھونەرێ تەلارسازی یێ مسری و گریكی و سەردەمێ رۆمانی و بیزەنتیا ھاتینە ڤەدیتن. ھەروەسا دیزاینا ناڤخۆیی و دروستكرنا داروبارێ دەستپێكی و مادێن سروشتی وەكو دار و تەقن و پیستێ گیانەوەرا بۆ دروستكرنا ڤالاھیەكا ئارام بخۆڤەدگریت. بەلێ مۆدێلێن دیزاینا ناڤخۆیی مۆدێلێن چەرخێ فیكتوری و مۆدێلێن بوھیمی و كلاسیكیا نوی و ھەڤچەرخ و چەرخێن ناڤین و چەرخێ پیشەسازی بخۆڤەدگریت.
ژلایێ خۆڤە مامۆستا نارام مارقوس ئاماژە ب دەستپێكا پرۆژەی كر، كو ژ ئەزموونەكێ ھاتیە وەرگرتن كو سالا بووری كادرێن دیزاینا ناڤخۆیی دیزاینەك ل دویڤ مۆدێلا بوھیمی ئەنجامدا و ئەوێ ئەزموونێ سەركەڤتنەكا بەرچاڤ ب دەستڤەئینا، ژ ئەوی سەربووری پرۆژێ فێربوونێ یێ ئەڤ سالە ھاتیە وەرگرتن. ڤی پرۆژەی كریارا فێربوونێ ژ كریارەكا تاكی بۆ كریارەكا كۆمی ڤەگوھاستیە، ھەروەسا ب ئێكەم پرۆژە ژ ڤی جۆری ل كوردستانێ و عیراقێ دھێتە ھژمارتن، دیسان ناڤبری باس ل قوناغێن كارێ قوتابیان د پرۆژەیدا كر.
ل دویڤ دا راپرسیەك ل سەر كادرێ ئەكادیمی ل پشكا تەلارسازی ھاتە بەلاڤكرن، كو ژلایێ لیژنا بەرھەڤكارا وۆركشۆپی ھاتبوو بەرھەڤكرن، ب مەرەما دانانا پلانەكا وانەگوتنێ بۆ دیزاینا ناڤخۆیی و رێكێن وێ بۆ سالا بھێت. ل دویڤ دا ئامادەبوویا گەریانەك ل ناڤ پێشكانگەھێ ئەنجامدا، كو ژلایێ قوتابی و سەرپەرشتێن وان ڤە بۆ نیشاندانا ھەرسێ مۆدێلێن دیزاینا ھاتبوو ڤەكرن، د پێشانگەھێ دا دیزاینێن ل دویڤ مۆدێلێن فیكتوری و ھەڤچەرخ و پیشەسازی ھاتبوونە نیشاندان، زێدەباری مۆدێلا بوھیمی یاكو ل سالا بووری ھاتیە ئەنجامدان.
ژلایێ خۆڤە ئاماد جەمبەلی جەمیل ئێك ژ قوتابیێن قۆناغا چوارێ یێن پشكدار د پرۆژەیدا گوت "ڤی سەربووری ھاریكاریا قوتابیان كریە ل سەر بەرھنگاربوونا بەربەستان د دیزاینكرنا ناڤخۆیی دا و چەوانیا سەرەدەریكرنێ ل گەل ھەلویستێن جودا یێن كو ئەندازیار د ژیانا خۆ یا پیشەییدا د پاشەرۆژێدا توش دبنێ.
ل دویماھیا وۆركشۆپی و بۆ پەرەپێدانا دیزاینا ناڤخۆیی د جڤاكێ مەدا، لیژنا رێكخەرا وۆركشۆپی راسپاردا پشتبەستن ل سەر پیڤەرێن دروست ل ھەر كریارەكا دیزاینا ناڤخۆیی كر بۆ ب دەسڤەئینانا ئەنجامێن خواستی و دویركەڤتن ژ جێبەجێكرنا خەلەت بۆ ھەر مۆدێلەكا ناڤخۆیی.
راگەھاندنا زانكۆیا دھۆك؛ ٢٢ـی گولان ٢٠٢٣
راپۆرت: فاطمە مەحموود
وەرگێران: ماھر كێستەیی
فۆتۆ: محەمەد عەبدولكەريم