زانکۆیێن حکۆمی ل دهۆکێ دووەم کۆمبوونا خۆ یا هەماهەنگیێ ئەنجامدا
Dec. 6, 2022, 2:49 p.m.

راگەهاندنا زانکۆیا دهۆک؛ ٦ـی کانوونا ئێکێ ٢٠٢٢

ب مەرەما پتر پێشڤەبرنا ئاستێ هەمەماهەنگی و هەڤکاریێ ل ناڤبەرا زانکۆیێن حکۆمی ل پارێزگەها دهۆکێ، ئەڤرۆ رێکەڤتی ٦ـی کانوونا ئێکێ ٢٠٢٢ ل سەرۆکاتیا زانکۆیا پۆلیتەکنیکی یا دهۆک، و ب ئامادەبوونا د. داود سلێمان ئەتروشی، سەرۆکێ زانکۆیا دهۆک و د. ئاری عادل، سەرۆکا زانکۆیا پۆلیتەکنیکی یا دهۆک و د. نازم جەقسی، سەرۆکێ زانکۆیا زاخۆ و هاریکارێن سەرۆکێن زانکۆیێن ناڤبری، دووەم کۆمبوون هاتە ئەنجامدان، کو یا ئێکێ ل زانکۆیا دهۆک هاتبوو ئەنجامدان و ل بەرە کۆمبوونا سێیێ ژی ل زانکۆیا زاخۆ بیت.

ل دەستپێکێ د. ئارى عادل سەرۆکا زانکۆیا پۆلیتەکنیکى یا دهۆک، بخێرهاتنەکا گەرم ل شاندێن هەردوو زانکۆیێن دهۆک و زاخۆ کر و باس ل گرنگیا ڤێ کۆمبوونێ کر و راگەهاند "ئەڤ کۆمبوونە یا دیرۆکیە و مە گەلەک ئۆمێد پێ هەنە، دبیت وەکو زانکۆ مە هندەک جوداهی هەبن، لێ یا ژ هەمیا گرنگتر، مە هەمیا ئێک ئەرک هەیە، ئەوژی خزمەتکرنا جڤاکی و پارێزگەهێ و دەڤەرێ یە". سەرۆکا زانکۆیا پۆلیتەکنیکی ل دۆر گرنگیا زانکۆیا دهۆک ئەوژی دیارکر "ئەم وەکو زانکۆیا دایک تەماشای زانکۆیا دهۆک دکەین و ئەم دەرچوویێن ڤێ زانکۆیێینە، زانکۆیا دایک ژی، ئانکو پەناگەهـ، لەورا بۆ گرفت و رێگران دێ پەنایێ بۆ بەین".

ژ لایێ خۆ ڤە د. داود سلێمان ئەتروشى سەرۆکێ زانکۆیا دهۆک، سوپاسیا سەرۆکا زانکۆیا پۆلیتەکنیکى یا دهۆک کر بۆ پێشوازیا وێ یا گەرم. هەروەسا ئەڤ کۆمبوونە ب گرنک دا دیارکرن و تەکەزى ل سەر کارێن هەڤپشک و خزمەتکرنا جڤاکى کر و خویاکر "گەلەک گرنگە مە هەڤکاری هەبیت و ب هەماهەنگی رێنمایی و کاروبارێن ئەکادیمی و کارگێری و دارایی و سیاسەتان رێکبێخین و مە پرۆژێن هەڤپشک هەبن، وەکو دەرئەنجام ژی، ئەڤ هەڤکاریە دێ خزمەتا جڤاکی و کەرتێن جودا کەت، زانکۆیا دهۆک ژی زانکۆیەکا مەزنە و ئەم بەرهەڤین بۆ هەر هاریکاریەکا دشیاندا".

هەروەسا د. نازم جقسی سەرۆکێ زانکۆیا زاخۆ سوپاسیا سەرۆکا زانکۆیا پۆلیتەکنیکى یا دهۆک کر بۆ پێشوازیا وێ و باس ل گرنگیا ڤێ هەماهەنگیێ کر و دیارکر "ئەڤ هەماهەنگیە دێ گەلەک د خزمەتا دەڤەرێ دا بیت و دشیاندایە ل سالێن بهێن پتر پێشڤەبچیت، من ٢٥ سالان کار ل زانکۆیا دهۆک کریە و ئەم بەردەوام پێدڤی وێینە وەکو زانکۆیا دایک".

پاشی دەرئەنجامێ روینشتن و گەنگەشەیێن بەری ڤێ کۆمبوونێ یێن هاریکارێن سەرۆکێن هەرسێ زانکۆیان هاتنە نیشاندان و دانوستاندن ل دۆر هاتنە ئەنجامدان و تێبینی هاتنە پێشکێشکرن و ئەندامێن شاندێن هەرسێ زانکۆیان ب هژمارەکا ئەرکا هاتنە راسپاردن، ب وێ ئارمانجێ کو کار ب رێکوپێکی و رژد بهێتە ئەنجامدان.