ئەڤڕۆ رێکەڤتی ١٤ـی ئەیلوولا ٢٠٢٢ـێ، د. داود سلێمان ئەتروشی سەرۆکێ زانکۆیا دهۆک و ب ئامادەبوونا د. لوقمان هادی حەسەن هاریکارێ سەرۆکێ زانکۆیێ بۆ کاروبارێن زانستی، دگەل ئەحمد جەمیل، رێڤەبەرێ گشتییێ چاندنێ یا پارێزگەها دهۆکێ و شاندێ دگەلدا کۆمبوو.
د کۆمبوونەکێ دا، د. داود ئەتروشی سەرۆکێ زانکۆیا دهۆک گۆت "پێشخستنا کەرتێ چاندنێ بۆ زانکۆیا دهۆک کارەکێ سەرەکیە، بۆ زێدەکرنا داهاتێ ناڤخۆ و پەیدانکرنا بەرهەمێن چاندنێ ل دویڤ پێدڤیا بازاری".
سەرۆکێ زانکۆیا دهۆک دیارکر ژی "بۆ پتر پێشێخستنا ئاستێ چاندنێ، زانکۆیا دهۆک و ب تایبەتی کولیژا زانستێن ئەندازیاریا چاندنێ پەیوەندین گەلەک باش و ئاست بلند دگەل زانکۆیێن بیانی دروستکرینە، ب تایبەتی زانکۆیێن وەلاتێ ئەمریکا، ئەڤ چەندە ژی ب مەرەما مفا وەرگرتنێ یە ژ پرۆگرام و سەربۆرێن وان زانکۆیا د بوارێ چاندنێ دا".
ژ لایێ خۆ ڤە، رێڤەبەرێ گشتیێ چاندنێ ل پارێزگەها دهۆکێ سوپاسیا سەرۆکێ زانکۆیا دهۆک کر بۆ پێشوازیا وان ل شاندێ رێڤەبەریا چاندنێ، ناڤهاتی هیڤی خواست بۆ زێدەتر بەرەڤپێشبرنا ئاستێ چاندنێ و زێدەکرنا بەرهەمێ چاندنێ، هەماهەنگیەکا زێدەتر د ناڤبەرا رێڤەبەریا گشتیی یا چاندنێ و زانکۆیا دهۆک ب تایبەتی کولیژا زانستێن ئەندازیاریا چاندنێ دا هەبیت. ئەحمەد جەمیل هەروەسا راگەهاند "کەشوهەوایێ کوردستانێ ژ باشترین فاکتەرانە کو ئەم گرنگیەکا باشتر ب کەرتێ چاندنێ بدەین و بەرهەم و داهاتێ نافخۆیی زێدەبکەین".
ژ لایەکێ دی ڤە، ئەندامێن شاندێ رێڤەبەریا گشتیا چاندنێ، تەکەزی ل وێ چەندێ کر کو پێدڤیە ڤەکۆلینێن قوتابیان زێدەتر لدۆر کەرتێ چاندنێ بن، ب تایبەتی ل پارێزگەها دهۆکێ.
ل دویماهیێ ژی، گۆتوبێژەکا ڤەکری د ناڤبەرا سەرۆکێ زانکۆیێ و ستافێ کولیژا زانستێن ئەندازیاریا چاندنێ و شاندێ رێڤەبەریا گشتیا چاندنێ هاتەکرن ب مەرەما باشترکرنا ئاستێ چاندنێ و مفا وەرگرتن ژ دەرچوویێن کولیژا ناڤهاتی، هەروەسا هەردوو لایا تەکەزی لسەر ئەنجامدانا کارێ هەڤپشک کر د داهاتووی دا.