سەرۆکێ زانکۆیا دهۆک دگەل ستافێ لقا زانکۆ و پەیمانگەهان یا (ی.ق.ک.) کۆمبوو
Aug. 5, 2022, 2:28 p.m.

ب مەرەما پتر هەڤکاریێ و وەرگرتنا فیدباکێ قوتابیان و هەڤکاری د بجهئینانا بریار و پلانێن سەرۆکاتیا زانکۆیا دهۆک دا، سەرۆکێ زانکۆیا دهۆک دگەل ستافێ لقا زانکۆ و پەیمانگەها یا ئێکەتیا قوتابیێن کوردستانێ کۆمبوو.

د کۆمبوونێ دا، د. داود سلێمان ئەتروشی سەرۆکێ زانکۆیا دهۆک رۆلێ ئێکەتیا قوتابیێن کوردستانێ بلند نرخاند و داخوازکر کو هەماهەنگی پتر هەبیت بۆ بجهئینانا پلان و ستراتیژیێن سەرۆکاتیا زانکۆیا دهۆک و بۆ پتر پێشڤەبرنا زانکۆیێ د هەمی بواران دا و پێشکێشکرنا ئاستێن بلندێن خزمەتکرنێ بۆ قوتابیان.

د. داود ئەتروشی د ڤێ کۆمبوونێ دا راگەهاند "پێدڤیە قوتابی سەنتەرێ پرۆسێسا ئەکادیمی و پەروەردەیی بیت و هەمی کار و بزاڤێن مە بۆ خزمەتکرنا قوتابینە". هەروەسا سەرۆکێ زانکۆیا دهۆک رۆلێ لقا زانکۆ و پەیمانگەهان د پرۆسێسا پەروەردەیی و ئەکادیمی دا بلند نرخاند و گۆت "ئێکەتیا قوتابیان دەنگێ راستەقینەیێ قوتابیانە و بۆ بجهئینانا بریارێن کارگێری و پلانێن ستراتیژی یێن زانکۆیا دهۆک، ئەوان گرنگیەکا مەزن هەیە" و داخوازکر کو ب شێوەیەکێ رێکخستی و بەردەوام کۆمبوون هەبن.

ژ لایێ خۆ ڤە پێشمان رەشید بەرپرسێ لقا زانکۆ و پەیمانگەها یا ئێکەتیا قوتابیێن کوردستانێ بەرهەڤیا لقێ بۆ هەر هەڤکاریەکێ دوپاتکر و گۆت "ئەم د وێ باوەرێداینە کو زانکۆیا دهۆک پلان و ستراتیژیێن گەلەک باش هەنە بۆ پتر پێشڤەبرنا زانکۆیێ، ئەم بەرهەڤین هەمی شیانا بدەینە کاری بۆ سەرئێخستنا ڤان پلان و بزاڤێن خزمەتا قوتابیان دکەن".