سەرۆکێ زانکۆیا دهۆک دگەل شاندێ سەردانا ئەمریکا کری کۆمبوو
Sept. 9, 2022, 11:45 p.m.

ئەڤرۆ رۆژا پێنچشەمبی رێکەڤتی ٨ـی ئەیلۆلا ٢٠٢٢ـێ، ل سەرۆکاتیا زانکۆیێ، د. داود سلێمان ئەتروشی سەرۆکێ زانکۆیا دهۆک، و ب ئامادەبوونا د. لوقمان هادی حەسەن هاریکارێ سەرۆکێ زانکۆیێ بۆ کاروبارێن زانستی، دگەل شاندێ کولیژا زانستێن ئەندازیاریا چاندنێ یێ زانکۆیا دهۆک، ئەوێ سەرەدانا وەلاتێ ئەمریکا کری، کۆمبوو.

د ڤێ کۆمبوونێ دا، د. داود ئەتروشی، ب گرنگی باس ل ڤان سەرەدانا بۆ زانکۆیێن بیانی کر، دوپاتی ژی لسەر دروستکرنا پەیوەندیێن بهێز د ناڤبەرا زانکۆیا دهۆک و زانکۆیێن بیانی دا کر، هەروەسا دانوستاندنێن تێروتەسەل ژ لایێ سەرۆکێ زانکۆیێ و ئەندامێن شاندێ سەرەدانا ئەمریکا کری هاتنەکرن.

لدۆر گرنگیا بوارێ چاندنێ سەرۆکێ زانکۆیێ دیارکر "ئێک ژ سێکتەرێن گرنگێن داهاتی چاندن، ژبەر ڤێ چەندێ پێدڤیە دەرچوویێن کولیژا چاندنێ زێدەتر بەرهەمهێنەر بن و ببنە فاکتەرەکێ گرنگ بۆ داهاتێ حکومەتا هەرێما کوردستانێ".

ژ لایێ خۆ ڤە راگرێ کولیژا زانستێن ئەندازیاریا چاندنێ ل زانکۆیا دهۆک، د. عابد عەلی حەسەن، دیارکر کو د ڤێ سەرەدانێ دا پەیوەندیێن گەلەک باش و بهێز دگەل وان زانکۆیێن ئەمریکی هاتینە دروستکرن، ب مەرەما پێشئێخستنا کولیژا زانستێن ئەندازیاریا چاندنێ و مفایەکێ مەزن ژ سەربۆر و پرۆگرامێن وان هەرسێ زانکۆیان هاتە وەرگرتن و راگەهاند "د پاشەرۆژێ دا هەمی هەول دێ هێنە دان دا کو پشکەک ژ پرۆگرامێن وان زانکۆیان ل کولیژا زانستێن ئەندازیاریا چاندنێ ل زانکۆیا دهۆک بهێنە بجهئینان".

ل دویماهیا کۆمبوونێ دانوستاندنەکا ڤەکری لدۆر وێ سەرەدانێ د ناڤبەرا شاندێ کولیژا زانستێن ئەندازیاریا چاندنێ و سەرۆکێ زانکۆیێ و هاریکارێ سەرۆکێ زانکۆیێ دا هاتەکرن، بەشداربوویان هزر و پلان و مفایێن ڤێ سەرەدانێ بۆ سەرۆکێ زانکۆیێ شروڤەکرن.

هەژی ئاماژێ یە، ل رێکەڤتی ٢ / ٨ / ٢٠٢٢شاندەکێ زانکۆیا دهۆک، کو ژ هژمارەکا مامۆستا و بسپۆران پێکهاتبوون، سەرەدانا زانکۆیێن( Purdue, Indiana, Notre Dame universities) ل ویلایەتا ئندیانا ل ویلایەتێن ئێگرتیێن ئەمریکی کربوو.