راگەهاندنا زانکۆیا دهۆک؛ ١١ـی کانوینا دووێ ٢٠٢٣
ل پشكا ئابوور یا كۆلیژا كارگێری و ئابووری ل زانكۆیا دهۆك، ڤەكۆلینەكا ماستەرێ ب ناڤونیشانێ (شرۆڤەكرن و پیڤانا كەتوارێ هەژاریا فرەرەهەندی ل هژمارەكا كەمپێن ئاواران ل پارێزگەها دهۆكێ ل سالا ٢٠٢٢) ژ لایێ قوتابیێ خواندنا بلند، سەركار ئیسماعیل حەسۆ، ب سەرپەرشتیا پرۆفیسورا هـاریكار كەلسوم عەبدولقادر هاتە ئەنجامدان، د ڤێ ڤەكۆلینێ دا هاتیە دیاركرن كو نزمترین رێژا هەژاریا فرەرەهەندی ل كەمپا (بێرسڤێ ئێك)ـە یا ئاواران.
ڤەكۆلەر، بەری باس ل ئەنجام و داتایان بكەت، دیاردكەت كو هەژاری د درێژاهیا دیرۆكێ دا ژ كێشەیێن مرۆڤی یێن مەزن بوو تووشی تاكەكەسی دبوو، بەلێ ئەو ڤەكۆلینێن گرێدای هەژاریا فرەرەهەندی ل ڤان سالێن دویماهیێ گرنگی بخۆڤە دیت، نەخاسمە پشتی دەستپێشخەریا زانكۆیا ئوكسفۆرد ل دۆر هەژاری و گەشەپێدانا مرۆڤی بۆ بەرنامێ گەشەپێدانێ یێ نەتەوێن ئێكگرتی، ب تایبەت ل راپۆرتا گەشەپێدانا مرۆڤی یا سالا ٢٠١٠، ل وی دەمی ئاراستەیێ پیڤانا هەژاریێ هاتە گوهۆرین ژ شێوازێ پیڤانا تاكی بۆ فرەرەهەندی، كو د ١٢ پێنگاڤان دا دهێتە پیڤان، و ل سەر ئاستێ عیراقێ ژی ژ پێنج گۆشەیێن سەرەكی (خواندن، ساخلەمی، خۆش ژیاری، خزمەتگۆزاریێن سەرەكی و كاری) پێكدهێت. هەر گۆشەیەك ژ ڤان، ژ هژمارەکا پیڤەران پێكدهێت، ژ بەر هندێ ژی ئەڤ پیڤەرە هاتنە بكارئینان بۆ پیڤانا هەژاریا فرەرەهەندی ل سەر ئاستێ كەمپێن ئاواران ل پارێزگەها دهوكێ.
ئارمانج ژ ڤێ ڤەكۆلینێ، هەر وەكو ڤەكۆلەر دیاردكەت، پیڤانا هەژاریا فرەرەهندی و زانینا رێژەیا هەژاریێ و دژواریا وێ یە ل سەر ئاستێ گشتیێ كەمپێن (چەمشكۆ، دەركارێ، قادیا، بێرسڤێ ئێك و بێرسڤێ دوو) و ل سەر ئاستێ هەر كەمپەكا جودا.
ژ گرنگترین وان ئەنجامێن ڤەكۆلەر د ڤێ ڤەكۆلینێ دا گەهشتیێ، نەوەكهەڤیە د رێژەیا وان ئاكنجیێن ژ هەژاریا فرەرەهندی دنالن ل سەر ئاستێ كەمپێن ئاواران، رێژەیا هەژاریا فرەرەهەندی كێمترین ئاست ل كەمپا بێرسڤێ ئێك و دەركارێ هانە تۆماركرن، كو (٣١٪ و ٣٥٪) ل دویڤ ئێك بوون، بەلێ رێژەیا هەژاریا فرەرەهەندی ل كەمپێن چەمشكۆ و قادیا (٤٩٪) بوون ل هەر ئێك ژ وان، ل دەمەكی كو بلندترین رێژا هەژاریێ ل وان كەمپێن ڤەكۆلین ل دۆر هاتیە كرن، ل كەمپا بێرسڤێ دوو بوو.