ماستەرنامەك ل دۆر كارتێكرنا گوهۆرینا سەقای ل سەر باران بارینێ ل هەرێما كوردستانێ‌ هاتە ئەنجامدان
Nov. 27, 2022, 11:59 p.m.

راگەهاندنا زانکۆیا دهۆک؛ ٢٧ـی چریا دووێ ٢٠٢٢

قوتابیا خواندنا بلند، كارین صابر شجیع، ل كۆلیژا ئەندازیاری، پشكا ئەندازیاریا ژێدەرێن ئاڤێ‌، ڤەكۆلینا خۆ یا ماستەرێ‌ ل دۆر (كارتێكرنا گوهۆرینا سەقای ل سەر باران بارینێ ل هەرێما كوردستانا عیراقێ) ب سەرپەرشتیا د. ئیڤان عبدالرحمن حاجی گەنگەشەكر.

ل دەستپێكا ڤەكۆلینێ‌ هاتیە كو مودێل و تێبینیێن سەقایێ جیهانێ هوسا نیشاددەن سەقا ب ئاشکرایی د گوهۆرینێ دایە، ئەوژی ژ ئەگەرێ زێدەبوونا رێژا گازێن گەرمخی، ئەوێن ژ ئەنجامێ هەردوو پرۆسێن ناڤخۆیێ سرۆشتێ ئەردی و فاكتەرێن مرۆڤی، گوهۆرین د سیستەمێ سەقای دا خولا هایدرۆلۆژی چڕتر لێكەت، و دبیتە ئەگەرێ‌ گوهۆرینێ د رویدانێن هایدرۆلۆژی یێن توند دا، ب تایبەتی رویدانێن باران بارینێ. وەکو دەرئەنجام ژی، دیاركرنا گوهۆرینان د ماوێ باران بارینێ دا یا گرنگە بۆ رێڤەبرنا پاشەرۆژا ژێدەرێن ئاڤێ، ئەوا دهێتە بكارئینان بۆ دیزاینكرنا ژێرخانا رێڤەبرنا ئاڤێ، ب تایبەتی بۆ پلاندانان و دیزاینكرنا چاوانیا خۆ پاراستنێ ژ لەهییان.

ئەڤ ڤەكۆلینە باس ل هەرێما كوردستانێ دكەت ژ لایێ هەلسەنگاندنا گوهۆرینا باران بارینا سالانە و پێشڤەبرنا كێرڤێن جێگیر و نەجێگیر یێن سیهـ سالان، (١٩٩١-٢٠٢٠)، ل ١٠ وێستگەهێن باران بارینێ (دهۆك، ئامێدی، زاخۆ، سێمێل، سلێمانی، هەولێر، تلەعفەر، سلاحەدین، سۆران و دۆكان)، ئەنجامێن تێستێن ئاراستەیێ بارانبارینێ وەسا دیاركر كو هژمارا وێستگەهێن ئاراستەیێ وان بەرەڤ زێدەبوونێ پترن ژ وێستگەهێن ئاراستەیێ وان بەرەف كێمبوونێ، ئانكو ل حەفت وێستگەهان داتایێن باران بارینێ زێدەبوون و د ئاراستەی دا دیاربوویە كو دوو ژ وان وێستگەهان زێدەبوونەكا بەرچاڤ هەبوو ئەو ژی وێستگەهێن سێمێل و دۆكان.

ئەنجامێن خالێن گوهۆرینێن ژ نشكان ڤە د داتایێن زۆرترین باران بارینا سالانە دا دیاربوو كو گوهۆرینێن ئەرێنی (بلندبوون) د داتایێن AMR دا پترن ژ گوهۆرینێن نەرێنی (نزم بوون) ل سەر ئاستێ هەرێما كوردستانێ، بلندترین رێژا گوهۆرینێ د داتایان ٥٥.٦٪ یە و نزمترین ژی ١٧.٣٪ یە.

پشتی ل رێکەڤتی ١٧ـی چریا دووێ ٢٠٢٢، گەنگەشەكا زانستی ژ لایێ لژنا گەنگەشەكرنێ ڤە ل سەر ڤێ‌ ڤەكۆلینێ‌ هاتیە كرن، ئەڤ ڤەكۆلینە ب سەركەڤتیانە هاتە وەرگرتن و باوەرناما ماستەرێ‌ ب ڤەكۆلەرێ هاتەدان.