راگەهاندنا زانکۆیا دهۆک؛ ١٤ـی کانوونا ئێکێ ٢٠٢٢
د ڤەكۆلینا خۆ یا ماستەرێ دا، ئەوا ب سەرپەرشتیا د. محمد سعید حسین بۆ پشكا كۆمەلناسی یا كۆلیژا زانستێن مرۆڤایەتی ل زانكۆیا دهۆك هاتیە پێشکێشکرن، قوتابیا خواندنا بلند، جەمیلە یوونس سلێمان، دیار دكەت كو ئافرەتێن فەرمانبەر هەست پێ دكەن پەیوەندیا وان دگەل ئەندامێن خێزانێ یا لاوازە.
ئەڤ ڤەكۆلینا ل ژێر ناڤێ: ئەو ئاستەنگێن ئافرەتا كورد تووش دبیتێ ل چێكرنا هەڤسەنگیێ دناڤبەرا كاری و خێزانێ و پەیوەندیا وێ ب گونجاندنا هەڤژینیێ ڤە، ڤەكۆلینەكا مەیدانی یە و ل باژێرێ دهۆكێ هاتیە ئەنجام دان، كو ٣٧٦ ئافرەتێن ب هەڤژین ل فەرمانگەهێن حكومی ل باژێرێ دهۆكێ وەكو سەمپل ل ژیێ دناڤبەرا ٢١-٦٠ سالی وەرگرتینە.
هەروەسا ژ وان ئەنجامێن ڤەكۆلەرێ بەلاڤكرین دیاربوو كو ئافرەت تووشی چەندین ئاستەنگان دبن ل سەر ئاستێ جڤاكی، ئەوژی هەست پێ دكەن كو پەیوەندیا وان دگەل ئەندامێن خێزانێ یا لاوازە، هەروەسا نەشێن چاڤدانا زاروكێن خۆ بكەن، و د ڤی بیاڤی دا خەلك باس ل وان دكەت و نەکامیا وان دكەن ژبەر هێلانا زارۆكان ل داینگەهان یان ل جهێن دیتر. ڤەكۆلەر وەسا بۆ دچیت كو ئەگەرێ پشت ڤی ئاستەنگی دابونەریت و بوهایێن جڤاكی نە و هەتا نوكە ئافرەت ل جڤاكێ مە ژ بەر دنالن، كو كونترۆل ل سەر ژیانا وان هاتیە کرن و كارتێكرن ل سەر هەڤسەنگیا پێدڤی د ناڤبەرا بەرپرسیاریا مالێ و ژیانا خێزانی كریە.
ژ ئەنجامێن دی یێن ڤەكۆلینێ، ئافرەت هەردەم گرنگیێ ددەتە بەختەوەریا هەڤژینێن خۆ، سەرەرایی بەرپرسیاریێن وێ و گڤاشتنێن ژیانا رۆژانە. دیسا ئاستەنگێن بەرچاڤ هەنە ئافرەت ل سەر ئاستێ دەروونی تووش دبیتێ، وەكو یا دیار ئافرەت ژ بەر وەستیانا جەستەیی و هزری دنالیت دەمێ بزاڤێ دكەت هەڤسەنگیێ د ناڤبەرا رۆلێ خۆ یێ فەرمی و خێزانی دا پەیدا بكەت. ژ لایەکێ دی ڤە، ئاستەنگێن ئابووری یێن ئاشكرا ژی هەنە کو ئافرەت ل ژیانا خۆ یا رۆژانە تووش دبیتێ، ب تایبەتی دەمێ هەڤسەنگیێ د ناڤبەرا کارێ خۆ یێ فەرمی و خێزانی دا پەیدا دكەت، چونكو ئەو نیڤا داهاتێ خۆ یێ هەیڤانە ل خەرجیێن داینگەهان و هاتنوچوونا زارۆكێن خۆ دمەزێخیت.
ل سەر بنەمایێ ڤان ئەنجامان و ئەوا ڤەكۆلەر دڤێ ڤەكۆلینێ دا گەهشتیێ و وەکو راسپارد، ڤەکۆلەر دیاردکەت کو گرنگە رێكخراوێن بیاڤێ ئافرەتان و سازیێن جڤاكی بۆ دانانا بەرنامەكێ رێنیشاندەر بۆ ئافرەتێن فەرمانبەرێن ب هەڤژین كاربكەن، بۆ باشتركرنا ئاستێ گونجاندنا وان دگەل خێزانێن وان و هاندانا وان بۆ ئەنجامدانا گوهۆرینان د كاودانێن كارێ خۆ دا، داكو پێدڤیێن وان یێن كاری كێمتر لێ بهێن و هاریكار بن بۆ باشتركرنا شیانێن وان بۆ پاراستنا هەڤسەنگیا هەڤژینیێ.