قونسولێ گشتیێ ئەلمانیا سەرەدانا زانکۆیا دهۆک کر
Feb. 3, 2023, 2 p.m.

ب مەرەما زێدەتر ئاگەهداربوون ل سەر پرۆژێن هەڤپشکێن زانکۆیا دهۆک و وەلاتێ ئەلمانیا و ب تایبەتی کار و چالاکیێن پەیمانگەها چارەسەریا دەروونی و چارەسەریا تراومایێ ل زانکۆیا دهۆک، کلاوس شترایشتەر قونسولێ گشتیێ ئەلمانیا ل هەرێما کوردستانێ، ل ٣١ـی کانوینا دووێ ٢٠٢٣، سەرەدانا پەیمانگەها چارەسەریا دەەروونی و چارەسەریا تراومایێ ل زانکۆیا دهۆک کر، د روینشتنەکێ دا دانوستاندن ل دۆر کار و بەرنامە و پرۆژێن زانکۆیا دهۆک یێن ب هەماهەنگی دگەل وەلاتێ دهێنە ئەنجامدان، هاتنە کرن.

د ڤێ روینشتنێ دا و ب ئامادەبوونا د.لقمان هادی حەسەن، هاریکارێ سەرۆکێ زانکۆیا دهۆک بۆ کاروبارێن زانستی و خواندنا بلند و د. رەند حەمۆدی، رێڤەبەرا نڤیسینگەها پەیوەندیێن ناڤدەولەتی ل زانکۆیا دهۆک و د. بوهار سلێمان عیسا، هاریکارا راگرێ پەیمانگەهێ و ستاف و چارەسەرکارێن ل ڤێ پەیمانگەهێ کاردکەن، قونسولێ گشتی ب کار و چالاکیێن پەیمانگەهێ سەرسام بوو و بەرهەڤیا خۆ بۆ هەر پشتەڤانیەکێ دیارکر و پرۆژە ب "رێبەر و روناهی بەخشا جڤاکی" سالۆخدا، هەروەسا دوپاتی ل سەر پێشڤەبرن و نویکرنا ڤی پرۆژەی کر.

ل دۆر ڤێ روینشتنێ، د. بوهار سلێمان عیسا، هاریکارا راگرێ پەیمانگەها چارەسەریا دەروونی و چارەسەریا تراومایێ دیارکر "د ڤێ روینشتنێ دا باس ل چەوانیا کارکرنا ستافێ پەیمانگەهێ هاتەکرن و ئاستەنگ و رێگریێن مامۆستا و ستافێ پەیمانگەهێ تۆشدبنێ، ب تایبەتی ل دەمێ کارکرنێ ل ناڤ و دەرڤەی کەمپێن ئاوارەیان، هەروەسا چەوانیا باشترکرنا میکانیزمێن کارکرنێ ئێک ژ تەوەرێن روینشتنێ بوو، قونسولێ گشتی پشتەڤانیا خۆ بۆ پەیمانگەها چارەسەریا دەروونی و چارەسەریا تراومایێ ل زانکۆیا دهۆک دوپاتکر".

هەر د ڤێ روینشتنێ دا، د. رەند حەمۆدی، رێڤەبەرا نڤیسینگەها پەیوەندیێن ناڤدەولەتی ل زانکۆیا دهۆک، خۆشحالیا خۆ ب ڤێ سەرەدانێ دەربڕی گۆت "سوپاسیا وەلاتێ ئەلمانیا دکەین کو ب بەردەوامی پشتەڤانیا زانکۆیا دهۆک دکەت، ب تایبەتی ژ لایێ زانستی ڤە، هەماهەنگیەک باش د ناڤبەرا وەلاتێ ئەلمانیا و زانکۆیا دهۆک دا هەیە و پشتراستین ئەڤ هەماهەنگیە بەردەوام دێ بهێزتر و فراوانتر بیت".

دهێتە زانین پەیمانگەها چارەسەریا دەروونی و چارەسەریا تراومایێ ل سالا ٢٠١٧ـێ هاتیە دامەزراندن، وەکو پرۆژەک بۆ پێشکێشکرنا باوەرناما ماستەرا هەڤپشک ل ناڤبەرا زانکۆیا دهۆک و زانکۆیا ستەیت یا بادن وورتمبێرگ و زانکۆیا توبینگن یێن ئەلمانی، ئەڤ باوەرنامە د بوارێ خواندنێن پێشکەڤتی یێن چارەسەرکرنا دەروونی و چارەسەرکرنا تراومایێ دایە. ئەڤ پرۆژە ژ لایێ وەزارەتا خواندنا بلند ل هەرێما کوردستانێ و وەزارەتا خواندن و زانستێن بلند ل بادن وورتمبێرگ ل ئالمانیا ڤە هاتیە پەسەندکرن.

هەژی ئاماژێ یە ڤێ پەیمانگەهێ کلینیکەکا تایبەت هەیە بۆ پێشکێشکرنا چارەسەریا دەروونی بۆ ئاوارە و پەنابەر و خەلکی دهۆکێ، زێدەباری تیمەکا تایبەت کو سەرەدانا کەمپێن پەنابەران ل باژێرێ دهۆکێ دکەت ب مەرەما چارەسەرکرنا نەخوشیێن دەروونی، دگەل تیمەکا بەرهنگاربوونا خۆکوشتنێ، کو دهێتە هژمارتن ئێکەمین تیم ژ ڤی جۆری ل پارێزگەها دهۆکێ.

راگەهاندنا زانکۆیا دهۆک؛ ١ـی شوبات ٢٠٢٣

حسێن تتمی و عسمەت خابوور