پشکێن یاسا و زانستێن سیاسی زانکۆیا دهۆک مێزگەردەکا ئەکادیمی لدۆر بریارا دادگەها فیدرالی یا بلند لدۆر کەیسا پەترۆل و غازا هەرێما کوردستانێ، بۆ هژمارەکا مامۆستایێن ئەکادیمی د بوارێ یاسایی دا، ئەڤرۆ رێکەڤتی ٢٨/٣/٢٠٢٢ ل سەنتەرێ رەوشەنبیری و جڤاکیێ زانکۆیا دهۆک سازکر.
ل دەستپێکێ سەرۆکێ زانکۆیا دهۆک د. داوود ئەترووشی تیشک ئێخستە سەر رۆلێ ڤەکۆلەرێن ئەکادیمی و گرنگیا ناڤەندێن زانستی مینا زانکۆیان کو گرنگە زانکۆ خۆ ل هەمی هەڤکێشێن هەیی د هەرێمێ دا بکەتە خودان و خۆ د هەمی بواران دا ببینیت و گۆتنا خۆ هەبیت.
د. قاسم ئەحمەد قاسم راگرێ کولیژا یاسا بخێرهاتنا هەمی ئامادەبووان کر و مێزگەرد بریڤەچوو کو ئێکەم سمینار ژلایێ د. عەبدەلفەتاح عەبدولرزاق بریکارێ وەزیرێ خواندنا بلند و ڤەکۆلینێن زانستی هاتە پێشکێشکرن و تێدا باس ل دەقێن یاسایی یێن دەستوورێ عیراقی کر و جۆرێن راڤەکرن و شرۆڤەکرنێن یاسایی و هەبوونا مژداریێ د هەر برگەکا یاسایی دا و دیارکر کو پێدڤیە لدەمێ نڤیسینی و بەری مللەت دەنگی لسەر بدەت، هەمی بهێنە زەلالکرن و ب زەلالی بکەڤیتە بەردەست و چ گومان بۆ چ لایەنان نەمینن. دیسا دیار کر "هەمی مافێن دەستووریێن مللەتێ کورد دەما دچنە بەر سینگێ دادگەها فێدارلی، هەما ململانێ تێدا بیت، دهێنە رەتکرن و رەوانەکرن بۆ وان لایەنا یێن دژی هەرێمێ بریارێ ددەن، بۆ نموونە پارێزگەهـبوونا حەلەبچە رەدکر کر، ئەوژی ب بەهانەیا نەرازیبوونا ئەنجوومەنێ وەزیرێن عیراقی، جاران ژی ب بەهانەیا نەبوونا تایبەتمەندیێ د وی بواری دا داخوازیێن هەرێمێ رەتدکەت"، هەروەسا گۆت: "جهێ داخێیە بارودۆخێ عیراقێ ل ڤی ئاستی بیت، کو هەمی ب میزاجیات بەرسڤێ بدەن و هەمی دبنە کەسێن یاسایی".
سمینارا دووێ ب ناڤێ (کۆمێنتەک لدۆر بریارا دادگەها فیدارلی یا بالا لدۆر یاسا پەترۆل و غازێ یا هەرێمێ) بوو و تێدا د. ئیبراهیم محەمەد سالح شەرەفانی تیشک ئێخستە سەر ئەگەرێن دروستبوونا سیستەمێن فیدرالی ل وەلاتێن پێدڤی، و ل هەر وەلاتەکێ فیدارلی دادگەها فیدارلی هەیە بۆ کێشەیێن هەیی د ناڤبەرا هەرێمان و سەنتەرێ دەولەتا فیدرالی دا، کێشەیێن هەیی د یاسا پەترۆل و غازێ دا د ناڤبەرا هەرێمێ و حکوومەتا عیراقا فێدرال دا ل سەر سێ برگا رادوەستن (وەبەرهینان، هاوردەکرن و داهاتی).
سمینارا سێیێ لدۆر نەسەقامگیرییا یاسایی و کارتێکرنا وێ لسەر دەستنیشانکرنا تایبەتمەندیێن گرێدانا گرێبەستێن پەترۆلی بوو و تێدا د. عەلی یوونس ئیسماعیل باس ل گرێبەستێن بازرگانی کر کا ئایا دەستوورینە یان نە. د ڤێ سمینارێ دا د. عەلی ئاماژە ب وێ یەکێ دا کو گرێبەستێن پەترۆل و غازێ یێن حکوومەتا فیدرال بازرگانینە و ئەو دبێژن پێدڤیە یێن هەرێمێ یاسایی و سیاسی بن. ئایا بۆچی دێ گرێبەستێن هەرێمێ ب سەروەریا وەلاتی ڤە گرێدەن و یێن حکوومەتا فیدرال بتنێ بازرگانی بن! هەروەسا لدویڤ یاسایێ نابیت وەزیر سکالایێ ل هەرێمێ بکەت، بەلکو بتنێ سەرۆکێ ئەنجوومەنێ وەزیران ئەڤ مافە هەیە، چونکو ئیمزاکرنا هەمی گرێبەستا و نەخشێ فرۆتنا گاز و غازێ لدەف وی هەنە.
ل تەوەرێ دویماهیێ د. نەجمەددین موحیەددین باس ل مەرەمێن سیاسی کر و هەروەسا شەرعیەتا دەستووری و سیناریۆیێن عیراقێ دژی بنیاتێ ئابووریێ هەرێمێ و دیار کر کو سیاسەت نە بەهرەیە، بەلکو زانست و ڤەکۆلین و شیانن، ناڤبری دیارکر "ئەگەر مالا کوردی ئێکگرتی با ئەڤ قەیرانە بۆ هەرێمێ دروستنەدبوون. دیسان باس ل رۆلێ سیاسیێ کوردا ل بەغدا کر و گحت: "ئەرکێ کوردان نە بدەستڤەئینانا کورسیانە ل بەغدا، بەلکو چارەسەرکرنا کێشەیێن کوردانە".
ل دویماهیێ ئامادەبوویان دید و بۆچوونێن خو دەربارەی بابەتی پێشکێشکرن کو ژ پەرلەمانتارێن خۆلا بۆری و ئەکادیمی و نڤیسەر و رەوشەنبیرێن دەڤەرێ پێکهاتبوون.