ل زانکۆیا دهۆک وۆرکشۆپا گوهۆرینا پرۆگرامێن خواندنا کولیژێن دەرمانسازی دەستپێکر
March 4, 2023, 4:54 p.m.

د چارچۆڤێ سیاسەتا وەزارەتا خواندنا بلند و ڤەکۆلینێن زانستی دا بۆ گوهۆرین و پێشڤەبرنا پرۆگرامێن خواندنێ ل تەڤایا کولیژێن زانکۆیێن هەرێما کوردستانێ، ئەڤرۆ رێکەڤتی ٢ـی ئادارا ٢٠٢٣ ل سەنتەرێ رەوشەنبیری و جڤاکیێ زانکۆیا دهۆک، و ب ئامادەبوونا د. داود سلێمان ئەتروشی، سەرۆکێ زانکۆیا دهۆک و د. ئامانج سەعید، راوێژکارێ وەزیرێ خواندنا بلند و ڤەکۆلینێن زانستی و راگر و سەرۆک پشکێن زانکۆیێن حکومی و ئەهلی ل هەرێما کوردستانێ و هژمارەکا مامۆستا و قوتابیان، وۆرکشۆپەک ل دۆر گوهۆرینا پرۆگرامێن خواندنێ ل کولیژێن دەرمانسازی ل هەرێما کوردستانێ دەستپێکر.

سەرۆکێ زانکۆیا دهۆک ل دەستپێکا ڤێ وۆرکشۆپێ بخێرهاتنا ئامادەبوویان کر و باس ل گرنگیا ڤێ پلانا وەزارەتێ کر و خۆشحالیا خۆ ب ڤێ پێنگاڤا رژد یا ریفۆرمێ دەربری و دیارکر "ل کوردستانێ گەلەک بەرهەڤی هەیە بۆ گوهۆرین و پێشڤەچوونێ، ئەڤ سیاسەتا نوی یا وەزارەتا خواندنا بلند، پێنگاڤەکا رژدە بۆ ڤان گوهۆرینان. د بوارێ دەرمانسازی ژی دا و وەکو دەرئەنجام بۆ ڤان دانوستاندنان، هیڤیدارین بگەهینە باشترین دەستکەڤت و پێشکەڤتیترین پرۆگرامێن خواندنێ د بوارێ دەرمانسازی دا ل زانکۆیێن مە بهێنە خواندن".

ژ لایێ خۆ ڤە، راوێژکارێ وەزیرێ خواندنا بلند، د. ئامانج سەعید، سوپاسیا زانکۆیا دهۆک و سەرۆکێ زانکۆیێ و راگرا کولیژا دەمانسازی کر بۆ مێڤانداریا شایستە یا ڤێ وۆرکشۆپا گرنگ و راگەهاند "د بوارێ دەرمانسازی دا، گوهۆرینێن زانستی و تەکنۆلۆژیێن بلەز و مەزن ل سەر ئاستێ جیهانێ رویداینە و نابیت نفشێ نوی یێ دەرمانسازا ل هەرێما کوردستانێ ژ ڤان گوهۆرینان ڤەقەتیای بن". ژ لایەکێ دی ڤە د. ئامانج سەعید ئەوژی خویاکر "مە نەڤێت پرۆگرامێن خواندنێ د بوارێ دەرمانسازی دا ل هەمی زانکۆیێن کوردستانێ ب تمامی وەکو ئێک بن، لێ گەلەک گرنگە کو دەرچوویێ مە باشترین و نویترین شیان و کارامەیی د ڤی بواری دا ل دەف هەبن".

دهێتە زانین، وەزارەتا خواندنا بلند و ڤەکۆلینێن زانستی ب درویشمێ "بەرەڤ کۆنفرانسەکێ سەرتاسەری بۆ پێداچوون و پێشڤەبرنا پرۆگرامێن خواندنێ و گرێدانا وان ب بازارێ کاری ڤە"، پلانەک دارێژتیە و دەست ب ئەنجامدانا وێ کریە و ل دویڤ ڤێ پلانێ بەردەوام کولیژ و پشکێن زانستی یێن هەڤشێوە پێکڤە کۆمدبن ب مەرەما بجهئینانا ڤێ ئارمانجێ.

راگەهاندنا زانکۆیا دهۆک؛ ٢ـی ئادار ٢٠٢٣

عسمەت خابوور

فۆتۆ: حسێن تتمی و کەمال دۆملی