ل زانكۆیا دهۆك رۆژا جیهانی یا ئایدزێ‌ هاتە ساخكرن
Dec. 1, 2021, 6:36 p.m.

كۆلیژا دەرمانسازی ل زانكۆیا دهۆك ب هەڤكاری دگەل رێڤەبەریا گشتی یا ساخلەمیێ‌ ل پارێزگەها دهۆكێ‌ و ب هەلكەفتا رۆژا جیهانی یا ئایدزێ‌، ل رۆژا 1/12/221 چالاكیەك ل كەمپێ‌ زانكۆیا دهۆك ئەنجام دا.
دڤێ‌ چالاكیێ‌ دا رێڤەبەرێ‌ خۆپاراستنێ‌ ل ساخلەمیا دهۆكێ‌، د. فەرهاد ئیسماعیل، دیاركر كو نوكە ل سەرانسەری جیهانێ‌ پتر ژ 37 ملیۆن كەس هەلگرێن ڤایرۆسێ‌ (HIV) یێ‌ ئیدزێ‌ نە، و گێرانا ڤان جۆرە چالاكیان بۆ بەلاڤكرنا هشیاریا خۆپاراستنێ‌ یە ژ ڤێ‌ نەخۆشیێ‌ و دیاركرنا ڤێ‌ رۆژێ‌ ژی ژ بۆ ڤێ‌ چەندێ‌ یە، ئەو ژی گۆت كو نوكە ل دهۆكێ‌ 10 نەخۆشێن ئیدزێ‌ یێن هەین و بەردەوام پشكنین بۆ دهێنە كرن و چ مەترسی ل ژیانا وان نینە.
راگرێ‌ كۆلیژا دەرمانسازی ل زانكۆیا دهۆك د. موئەیەد ئاغالی، گوت "ئەو نەخوشین ل دهۆكێ‌ هەین هەیڤانە پشكنین بو دهێنە كرن و چارەسەریا وان ب باشترین دەرمانێن جیهانی وەك یێن وەلاتێن پێشكەفتی دهێتە كرن، سەرەرایێ‌ وێ‌ چەندێ‌ كو گەلەك بهانە رێڤەبەریا گشتی یا ساخلەمیێ‌ ل پارێزگەها دهۆكێ‌ بو نەخوشان دابین دكەت ".
هەروەسا د. موئەیەد ئاغالی، د پرێزنتێشنەكی دا بەحسێ‌ رەوش و داتایێن ڤێ‌ نەخۆشیێ‌ كر، و گۆت نەخوشیا ئایدزێ‌ ب رێیا كریارێن سێكسی ب تایبەتی ژی هەكە نەدچارچووڤێ‌ رێكارێن ساخلەمیێ‌ دابن دهێتە ڤەكەهاستن، كو نەخۆشیەكا دومدرێژ و ڤەگرە و كارتێكرنێ‌ ل بەرگریا لەشێ‌ مرۆڤی دكەت.
ل دویف دا هەر ئێك ژ د. سەكڤان حەسەن رێڤەبەرێ‌ رێڤەبەریا نەخۆشیێن ڤەگر، و د. ئەحمەد عەلی، بابەتێن خۆ پێشكێش كرن، و د. سەكڤان حەسەن دیاركر كو د 40 سالێن بۆری دا ل جیهانێ‌ پتر ژ 36 ملیۆن كەس ب ئیدزێ‌ گیانێ‌ خۆ ژدەست دایە، كو ل سالا 2020 پتر ژ 680 هزار كەس ل جیهانێ‌ ب ڤێ‌ نەخۆشیێ‌ گیانێ‌ خۆ ژدەست داینە.