ل ژێر چاڤدێریا سەرۆكێ زانكۆیا دهۆك پروفیسور د. مصلح دهۆكی ل رۆژا 25/2/2019 ل سەنتەرێ رەوشەنبیری و جڤاكی و ب ئامادەبونا هاریكارێ سەرۆكێ زانكۆیێ بۆ كاروبارێن زانستی د. لوقمان هادی و هژمارەكا ئەندازیارێن بیناسازی یێن پارێزگەها دهۆكێ، سەنتەرێ ڤەكولینێن سازی سیمینارەك ل ژێر ناڤێ (دیزاینا ئاڤاهیان و سلامەتی ژئاگری و هەلسەنگاندنا ئاڤاهی پشتی سوتنێ) بۆ د. شێروان محەمەد زەكی رێكخست.
د سمینارا خۆدا د. شێروان محەمەد زەكی بەحسێ دیزاینا ئاڤاهیان كر كا چاوا دێ ئاڤاهی هێنە دیزاین كرن و سلامەتیا وی ژ ئاگری هەتا چ راردە بەرچاڤا هێتە وەرگرتن، دیسا ئەگەر ئاگر بەربوویێ دێ چاوا ب كێمترین زیان ژێ دەربازبین، ئەو ژی ب رێكا هێمایێن ئاگربەربوونێ ب هەبوونا سیستەمێ ئاڤێ و دەرگەه و نیشانێن ئاگری و ڤالاهیێن د ئاڤاهی دا، دیسا پشتی رویدانا ئاگری هەتا چ رادە ئەڤ ئاڤاهی یە یێ سلامەتە بۆ دوبارە بكارئینانێ.
د. شێروان ئەو چەندە ژی بەحسكر كو دڤان چەند سالێن بوری دا ل كوردستانێ گەلەك بویەرێن ئاگر بەربوونێ زێدەبووینە وەكو ئەوا بازارێ لەنگە ل هەولێرێ دیسا بازارێ چەلێ ل دهۆكێ، د دیزایكرنا ڤان بازاران دا خالێن سلامەتیێ تێدا نەبوون لەورا زیانێن مەزن دیف خو هێلان.
د. شێروان محەمەد زەكی دكتورا ب ئەندازیاریا ئاگری هەیە و هاریكارێ راگرێ كولیژا ئەندازیاری یە ل زانكۆیا دهۆك.