راگەهاندنا زانکۆیا دهۆک؛ ١٥ـی چریا دووێ ٢٠٢٢
فەستیڤالا (جیاوازیا كەلتۆرێن مە بنەمایێ هەبوونا مەیە)، ژ لایێ سەنتەرێ ئاشتی و چارەسەركرنا ململانێ ڤە ل ناڤەندا قوتابیان ل زانكۆیا دهۆك ل رێکەڤتی ١٤/١١/٢٠٢٢ هاتە ئەنجامدان.
ئارمانجا سەرەكی ژ گێرانا ڤێ فەستیڤالێ هەڤبەشكرنا هەمەجۆریا كەلتۆریە ب ئارمانجا كۆمكرن و لێك نێزیكکرنا گرۆپێن جودا یێن جڤاكی و هەروەسا بهێزكرنا فرەكەلتۆریێ و بلندكرنا ئاستێ تێگەهشتنێ یە د ناڤبەرا كەلتۆران دا ب رێكا پەیوەندیكرن و قەبوولكرنا كەسانێن ژ كەلتۆرێن جودا.
د فەستیڤالا هەمەجۆریا كەلتۆری دا، رێژەكا زۆر یا قوتابیان ژ كەلتۆرێن جیاواز پشكدار بوون بۆ بهێزكرنا جوداهی و هەمەجۆریا كەلتۆری و قەبوولكرنا هەڤدوو ب رێكا نیشاندانا فۆلكلۆرێ هەر كەلتۆرەكی، مینا نمایشكرنا جل و بەرگێن نەتەوەیی و كەرستە و خوارنێن فۆلكلۆری یێن كەلتۆرێن جودا ل دەڤەرا بەهدینان.
مامۆستا خدر دۆملی راهێنەر ل سەنتەرێ ئاشتی و چارەسەركرنا ململانێ بۆ قوتابیان پەیڤەك ل دۆر مێژوویا كەلتۆری پێشكێشكر و تێدا دیارکر "پێناسە و دیاركرنا كەلتۆرێ هەمەجۆرێ دەڤەرا بەهدینان ئێك ژ پرۆژێن گرنگ و پێدڤیە بۆ ئێكرێزیا جڤاكی و ئاشتیا كۆمەلایەتی، هەروەسا بۆ ئاشنابوون ب كەلتۆر و ئایین و نەتەوێن جودا. دیارە ناسنامێن جیاواز و پێكهاتێن جودا ل دەڤەرا بەهدینان هەنە و پێناسا وان و هەڤنیاسینا وان یا گرنگە بۆ ئاشتیا كۆمەلایەتی و قەبوولكرنا ئێك و دوو و پێكڤە ژیانا ئاشتیانە".
د ڤێ فەستیڤالێ دا چالاکیێن جودا هاتنە ئەنجامدان، وەكو پسیاركرن ژ قوتابیان ل دۆر بابەتێن جودا و خەلاتكرنا وان و هەروەسا ژەنینا مۆزیكێ و شاهیێن كەلتۆری یێن جیاواز. قوتابیان ژی ب دلخۆشی پشكداری تێدا كر و ل دویماهیێ هەمی پشكداران خوارنێن كەلتۆری یێن هەمەجۆر ب هەڤرا خوارن.
د ڤێ فەستیڤالێ دا ٤٠ قوتابی ژ كەلتۆرێن جودا ل زانكۆیا دهۆك پشكدار بوون، كو بۆ ماوێ شەش مەهان راهێنان وەرگرتبوون و دەستپێشخەریێن جۆراوجۆر هاتنە بەرهەمئینان ژلایێ ڤان پشكداربوویان، وەكو ئەنجامدانا چالاكیێن جیاواز بۆ بهێزكرنا هەمەجۆریا كەلتۆری دناڤ جڤاكی دا. ئەڤ فەستیڤالە ژی دهێتە هژمارتن دەستپێشخەریەكا ڤێ راهێنانێ، كو هزر و ئامادەكرنا وێ ژ لایێ نوهارا ریمون فرەنسیس، قوتابیا قۆناغا سێیێ ژ كولیژا زانستێن مرۆڤایەتی پشكا ئاشتی و مافێ مرۆڤی و هەڤكارێن وێ یێن خۆبەخش ڤە.
ل دۆر فەستیڤالێ قوتابی نوهارا ریمون دبێژیت "بۆ من یا گرنگ بوو بشێم ئەو هزرا من هەی بكەمە چالاكیەك بۆ بهێزكرنا هەمەجۆریا كەلتۆری ب رێكا فۆلكلۆری. ل وەلاتێ مە ب گشتی و دەڤەرا بەهدینان ب تایبەتی رێژەكا زۆر یا پێكهاتێن جودا پێكڤە دژین، گرنگە ئەم پتر یەكتر بنیاسین و نێزیكی هەڤدوو ببین ب ریكا چالاكیێن جڤاكی یێن هەمەجۆر و یەكتر قەبوولبكەین".
هەژی ئاماژێ یە ئەڤ فەستیڤالە پشكەكە ژ پرۆژێ (ئاڤاكرنا جڤاكێن گشتگیر ب رێكا هەڤگرتنا جڤاكی ل عیراقێ - دووبارە ئاڤاكرنا باوەریێ)، كو ل سەنتەرێ ئاشتی و چارەسەركرنا ململانێ ل زانكۆیا دهۆك ب هەڤكاری دگەل ئێكەتیا لۆسەری یا جیهانی و ب پالپشتیا كەنیسا سویدی دهێتە بجهئینان. ئارمانجا ڤی پرۆژەی ب هێزكرنا هەمەجۆریا كەلتۆریە د ناڤ گرۆپێن جیاواز یێن جڤاكی دا.