ل رۆژا 25/2/2021 ل زانكۆیا دهۆك كلینیكا ئای پی پی یا ئەلمانی بۆ چارەسەریا دەروونی ژ لایێ پەیمانگەها چارەسەریا دەروونی و چارەسەریا تراومایێ ل ئاڤاهیێ كۆلیژا زانستێن تەندورستی هاتە ڤەكرن.
ل رێورەسمێن ڤەكرنێ كو پارێزگارێ دهۆكێ د. عەلی تەتەر بەرهەڤ ببون، د پەیڤەكی دا بناڤێ حكومەتا هەرێمێ و كارگێریا پارێزگەهێ سوپاسیا حكومەتا ئەلمانیا و حكومەتا هەرێما (بادن ڤوتنبێرگ) و زانكۆیا توبینگن یا ئەلمانی كر كو پشتەڤانیا ڤەكرنا كلینكێ كریە هەروەسا سوپاسیا زانكۆیا دهۆك كر بۆ هاریكاریا وان و ڤەكرنا كلینیكێ.
گۆت ژی پشتی هێرشێن تیرۆرستێن داعش بۆ سەر دەڤەرێن كورستانێ و گرتن و رەڤاندنا كچ وژنێن ئێزدی نەخۆشیێن دەرونی ل نك گەلەك ئاواران پەیدابووینە و سوپاسیا حكومەتا ئەلمانیا و رێكخراوێن خێرخازی كر كو چارەسەریا گەلەك ژ وان تۆشبوویان هاتیە كرن و ب ڤەكرنا ڤێ كلینیكێ دێ چارەسەریا گەلەك توشبوویێن دی ل پارێزگەهێ هێتە كرن و خواست كو حكومەتا ئەلمانیا پتر ڤان جۆرە هاریكاریان پێشكێش بكەت و پشتەڤانیا پارێزگەهێ نیشادا بۆ هەر هەڤكاریەكی.
هەر د رێورسمێن ڤەكرنا كلینیكێ دا كو نوینەرێ وەزیرێ خاندنا بلند و ڤەكۆلینێن زانستی ژی یێ بەرهەڤ بوو هاریكارێ سەرۆكێ زانكۆیا دهۆك بۆ كاروبارێن كارگێری و دارایی د. ئەحمەد محەمەد سالح پەیڤەك پێشكێش كر و گۆت ڤەكرنا (كلینیكا دەروونی ـ ئای پی پی ـ ئەلمانی) بەرەكێ دیتر یێ بناغەیە بۆ ئاڤاكرنا سیستەمەكێ بهێز تر یێ ساخلەمی ل دەڤەرێ، هەروەسا مل بملێ كلینیكێن دیتر یێن ساخلەمی دێ پتر شێین خزمەتێن ساخلەمی گەهینینە خەلكێ خۆ، بۆ زانكۆیێ ژی ب ڤەكرنا ڤان دێ قوتابیێن مە پتر د بیاڤێ پراكتیكی دا هێنە راهێنان داكو دەمێ ژ زانكۆیێ دەردچن ژبلی ئەوا ب تیۆری وەردگرن هەروەسا لایەنێ پراكتیكی ژی شارەزای ل دۆر هەبیت و باشتر كارێ خۆ ئەنجام بدەن، دیار ژی كر كو ڤەكرنا ڤێ كلینیكێ بۆ دەڤەرا دهۆكێ ب تایبەتی و هەرێما كوردستانێ ب گشتی دێ مفایەكێ مەزن تێدا بیت چونكو زانكۆ دڤێت هەردەم خۆ ل كێشە و ئاریشە و كێماسیێن ل ناڤ جڤاكی هەین بكەنە خودان و چارەسەریێن ئەكادیمی و دروست بۆ ببینن داكو ئەڤ كێشە و ئاریشە وەكو نەخۆشی ل ناڤ جڤاكی بەلاڤ نەبن.
هەژی گۆتنێ یە كلینیكا ئای پی پی ـ ئەلمانی بۆ چارەسەریا دەروونی ژلایێ پەیمانگەها چارەسەریا دەروونی ل زانكویا دهۆك ب پشتەڤانیا حكومەتا ئەلمانیا و ساخلەمیا دهۆكێ هاتیە ڤەكرن و نوكە دوو نوژدار و هەشت كارمەند ژ دەرچوویێن پەیمانگەها چارەسەریا دەروونی خزمەتێن چارەسەریا دەرونی بێ بەرامبەر پێشكێش دكەن، كلینیك هەر ژ دەمژمێر 10 ی سپێدێ هەتا شەشی ئێڤاری یا ڤەكریە.