شاندەکێ زانکۆیا دهۆک سەرەدانا وەزارەتا دەرڤە یا بریتانی کر
April 17, 2022, 9:27 a.m.

 

    د چارچۆڤێ پرۆژێ کۆمکرنا کەلتۆری دا، ئەوێ ژ لایێ زانکۆیا Sussex هاتیە رێکخستن و و وەزارەتا دەرڤە یا بریتانی هاتیە پشتەڤانیکرن و ل زانکۆیا دهۆک هاتیە بجهئینان، شاندەک ژ زانکۆیا دهۆک سەرەدانا وەزارەتا دەرڤە یا بریتانیا کر.  ئەڤ سەرەدانە هاتبوو رێکخستن ژلایێ د. ماریز تادروس، رێڤەبەرا بەرنامە و پرۆژەیان ل پەیمانگەها ڤەکۆلینێن گەشەپێدانێ (IDS) کو سەر ب زانکۆیا Sussex یا بریتانی ڤەیە.

 

    شاندێ زانکۆیا دهۆک پێکهاتی بوو ژ بەرێزان د. لقمان هادی، هارێکارێ سەرۆکێ زانکۆیێ بۆ کاروبارێن زانستی، د. رەند حەمۆدی، بەرپرسا پەیوەندیێن نێڤدەولەتی، د. شیڤان شلیمۆن، سەرۆکێ پشکا وەرگێرانێ ل کولیژا زمانان، د. سەعید ئدریس، سەرۆکێ پشکا زمانێ ئینگلیزی یا کولیژا پەروەردا بنیات، د. جوان محەمەد، سەرۆکا پشکا زمانێ عەرەبی یا کولیژا پەروەردا بنیات، د. زوبەیدە سالح، مامۆستا ل پشکا جڤاکناسی یا کولیژا زانستێن مرۆڤایەتی، د. وەفا‌ء صباح، مامۆستا ل پشکا ئابوورناسی یا کولیژا کارگێری و ئابووری.

  

    د ڤێ کۆمبوونێ دا، بەرێز رۆبەرت لیمان، بەرپرسێ بەرنامێن گرێدای ب مافێن مرۆڤان و ئازادیا پەرستنێ دگەل ستافێ خۆ پێشوازیا شاندێ زانکۆیا دهۆک کر و بۆ ماوێ دوو دەمژمێران کۆمبوونەک دگەل شاندی ئەنجامدا. د کۆمبوونێ دا، ئەنجام و چەوانیا برێڤەبرنا پرۆژێ کۆمکرنا کەلتۆرێ پێکهاتەیێن هەرێما کوردستانێ هاتە گەنگەشەکرن.

 

    شاندێ زانکۆیا دهۆک شیا وێنەیەکێ ئەرێنی پێشکێشی وەزارەتا ناڤبری بکەت و د ئەنجام دا چەندین رێکێن بەردەوامیدانا پەیوەندیێن پشتەڤانیێ د ناڤبەرا حکوومەتا بریتانی و زانکۆیا دهۆک هاتنە گەنگەشەکرن. هەروەسا، وەزارەتا دەرڤە یا بریتانی سەرەدانەک بۆ شاندێ زانکۆیا دهۆک رێکخست بۆ گەلەریا Courtauld ل باژێرێ لەندەن. د ڤێ گەلەریێ دا، چەندین وێنەیێن تایبەت و کەڤنارێن دەڤەرێن کوردستانێ و نەخاسمە باژێرێ دهۆکێ هاتنە دیتن کو ڤەدگەرنە سالێن چلان ل چەرخێ بۆری کو ژ لایێ فۆتۆگرافەرێ بریتانی یێ ناڤدار ئەنتۆنی کێرستین. د دیدارەکێ دا شاندێ  زانکۆیێ دگەل بەرێز تۆم ئەلبێرت، بەرپرسێ گەلەریێ دەرفەتا ڤەکرنا پێشانگەهەکێ بۆ پێشاندانا ڤان وێنەیان ل زانکۆیا دهۆك ل سالا داهاتی دا هاتە گفتوگۆکرن.