سەنتەرێ ڤەکولینێن جینوسایدێ هاتیە دامەزراندن ل ساڵا ٢٠١٨. سەنتەر گرنگیێ ددەت ب ڤەکولینێن زانستی و ئەکادێمی یێن جینوسایدێن رویداین لسەرانسەری جیهانێ و بتایبەت ئەوێن دگەل هەرێما کوردستانا عیراقێ هاتینە ئەنجامدان برێکا ئەنجامدانا چاڤپێکەفتنان دگەل قورتالبوویان برێکێن ئەکادێمی.
ئەرك و ئارمانج
١- ئەڤ سەنتەرە گرانیا خو ئێخیتە سەر وان جینوساید و قرکرنێن د دیروکێ دا ل دژی کوردان هاتینە کرن و دێ پێکولێ کەت هەمی بەلگەیێن پەیوەندی ب جینوسایدێن کوردان ڤە هەین کۆمبکەت و دێ ل دویڤچوون و لێکولینێن تیوری، زانستی وئەکادیمی ل سەر ڤێ مژارێ ئەنجام دەت و دێ ب سازدانا کونفرەنسان و ئەنجامدانا لێکولینان پتر روناهیێ ئێخیتە سەر ڤان گەلکوژیان.
٢- چاڤپێکەتن دگەل وان کەسێن ژ قرکرنا شنگالێ و پروسا ئەنفالان قورتال بووین و تومارکرن و نڤێسینا پێزانینان وان و دۆکۆمێنتکرنا ڤان چاڤثێکەڤتنا ب رێکێن زانستی دێ بەشەکێ گرنگ یێ ڤی سەنتەری بیت دا ڤەکولەرێن بوارێ جینوسایدێ د پاشەروژێ دا مفای ژێ وەربگرن.
٣- بەراوردکرنا پروسا گەلکوژییا ئەنفالان و یا شنگالێ دگەل جینوسایدێن دی، ب تایبەتی ژی جینوسایدا ئەرمەنا و هولوکوستا جوهییان و مفا وەرگرتن ژ ئەزمونێن وان یێن کارێ زانستی و سیاسی ب تایبەتی د پروسا دەولەتبوونێ دا.
٤- ئەنجامدانا کونفراسێ زانستیێ ساڵانە دەربارەی جینوسایدێ وتێدا ڤەکولەر و شارەزا ژهەمی وەڵاتان بەشدارببن ژ بو گەنگەشکرن و بەراوردکرنا ڤەکولینان دناڤبەرا جینوسایدێن دژی گەلێ کورد هاتنە ئەنجامدان و جینوسادێن گەلێن دی.
٥- کۆمکرن و پاراستنا وان هەمی دۆکۆمێنتێن دەولەتا عیراقێ کو پەیوەندی ب سیاسەتا ئەنفالکرنێ و جینوسایدکرنا کوردان ڤە هەبووینە.
٦- کۆمکرنا وان هەمی، پەرتوک، کوڤار، روژنامە، فلم و کاسێتێن ل سەر جینوسایدێن کوردان ب مەرەما دامەزراندنا پەرتوکخانەکا تایبەت دا قوتابی و لێکولەرێن دخوازن ل سەر ڤێ مژارێ لێکولینان بکەن و مفای ژێ وەربگرن.
٧- چاپکرن، وەرگێران و بەلاڤکرنا بەلگەنامە و لێکولین و پەرتوکێن پەیوەندی ب جینوسایدان ڤە هەین.
٨- هاریکاریا حکومەتێ و دەزگەهێن وێ ب چێکرنا لێکولینێن تایبەت ل سەر لایەنێن تاری و نە خویا د پروسا جینوسایدکرنا کوردان دا بکەت.
٩- پێکول بهێتەکرن کو بابەتێ جینوسایدا ئەنفالێ و شنگالێ ل بەشێن سیاسەتێ، جڤاکناسی، یاسایێ، دیروکێ و دەرونناسی وەك مەنهەج بهێتە خواندن و بکەڤیتە دناڤ سیستەمێ خواندنا زانکویێ دا.
١٠- ئەڤ سەنتەرە دێ دگەل بەش و کولیژێن زانستێن سیاسی، جڤاکناسی، مێژوو، دەرونناسی و یاسایێ کارکەت و دێ پێکولێ کەت ئەڤ کولیژێن زانکویێ ببنە پالپشتەك و فاکتەرەکێ گرنگ بۆ کار و ئەرکێن سەنتەری.
١١- هاندان و پشتەڤانیکرنا خواندەڤانان کو پتر لێکولین ماستەر و دکتورایێن خو ل سەر هەمی لایەنێن جینوسایدا شنگالێ و ئەنفالا و بنڤیسن.
١٢- دروستکرنا ماڵپەرەکێ ئینتەرنێتێ ل سەر جینوسایدێن ل دژی کوردان و ب تایبەتی ژی جینوسایدێن ل دژی ئێزدیان و ئەنفالان ب زمانێن کوردی، عەرەبی و ئنگلیزی و بەلاڤکرنا لێکولینان و دۆکۆمێنتان دڤێ مالپەری دا داکو ڤەکولەر و خواندەڤانێن بیانی ژی بکارن مفای ژ لێکولین و زانیارییێن ل سەر جینوسایدێن کوردان وەربگرن.