College of Science

International Conference at College of Sciecne
April 26, 2019, 2:06 p.m.

كۆلیژا زانست ل زانكۆیا دهۆك كۆنفرانسێ‌ كوردستانێ‌ یێ‌ نێڤدەولەتی یێ‌ پێنجێ‌ یێ‌ زانست و تەكنولۆجیا ل ژێر درووشمێ‌ بەرەف ڤەكۆلینێن زانستی و تەكنەلۆژی ب كۆالتیەكا بلند ل رۆژا 24/4/2019 ل هۆلا كۆنفرانسان ل زانكۆیا دهۆك ئەنجام دا. 

ئەڤ كۆنفرانسە كو ل ژێر چاڤدێریا سەرۆكێ‌ زانكۆیا هۆك پ. د. مصلح دهۆكی بوو د پەیڤەكی دا دیاركر كو ئەڤ كۆنفرانسە یێ‌ هەڤدەمە ل گەل رۆژا شەهیدێن زانكۆیێ‌ كو ل سالا 1974 ل وی دەمی ئەو قوتابی بوون ل زانكۆیا سلێمانیێ‌ ل باژێرێ‌ قەلادزێ‌ ل رۆژا 24 ی نیسانێ‌ زانكۆیا وان ژ لایێ‌ فرۆكێن جەنگی یێن رژێما گوربەگورا ژ ناڤچوویا بەعس ڤە هاتە توپباران كرن، و پتر ژ 140 كەسان ژ قوتابی و خەلكێ‌ سڤیل یێ‌ قەلادزێ‌ د وێ‌ توپباران كرنێ‌ دا هاتنە شەهید و بریندار كرن.

د پشكەكا دی یا پەیڤا خودا سەرۆكێ‌ زانكۆیا دهۆك گۆت زانست و تەكنەلۆژیایێ‌ چ سنۆر بۆ نینن، چ جاران ژی پێشڤەچوون و پێشكەفتنێن زانستی ب دووماهی ناهێن، چەند هیڤیێن مرۆڤی بۆ پێشڤەچوونێ‌ مەزنتر بن ئەو هند داهێنانێن مەزن د بیاڤێ‌ زانست و تەكنەلۆژیایێ‌ دا دهێنە ئەنجام دان، خودانێن مێشكێن بهێز هەردەم داهێنەر بووینە، لەورا یا پێدڤیە بیاڤ بهێتە روخساندن و زەمینە بهێتە خۆشكرن داكو وەكو پێدڤی دگەل ڤان پێشڤەچوون و پێشكەفتنێن زانستی و تەكنەلۆژی بچین و شەمەندەفرا سەردەمیا بلەزا پێشكەفتنێ‌ مە ل پاش خۆ نەهێلیت، ئاماژە دا وێ‌ چەندێ‌ ژی كو ڤەكۆلینێن زانستی شەنگستێ‌ هەر كارەكێ‌ زانستی یە، ڤەكۆلین دانانا بەرێ‌ بناغەیە و ب رێكا وێ‌ ڤەكۆلینێ‌ دێ‌ گەهنە ئەنجامان و پێنگاڤێن پاشتر دێ‌ هێنە هاڤێتن، لەورا د ڤی كۆنفرانسێ‌ زانستی دا بابەتێ‌ كۆالیتیا بلند یا ڤەكۆلینان دێ‌ هێتە بەحس كرن، چونكو بابەتێ‌ كۆالیتیێ‌ بۆ لایەنێ‌ زانستی و ئەكادیمی گرنگیا خۆ یا تایبەت یا هەی. 

 پ. د. مصلح دهۆكی د پەیڤا خۆدا هەروەسا گۆت د ڤی سەردەمێ‌ نوی دا زانكۆ و ناڤەندێن ڤەكۆلینان هەڤركیێن مەزنتر یێن ل بەرهیا وان هەین، ب تایبەتی پشتی شورەشا پیشەسازیا چارێ‌ كو ل كۆربەندێ‌ ئابووریێ‌ جیهانی ل داڤوس ل سویسرا ل سالا 2016 ئەڤ ناڤە دانایە سەر ڤێ‌ خەلەكا نوی ژ زنجیرا شورەشێن پیشەسازی ل جیهانێ‌، كو قەبارە و لەزاتی و بیاڤێ‌ گوهورینان د جودانە ژ شورەشێن پیشەسازی یێن پێشتر د مێژوویا مرۆڤایەتیێ‌ دا پەیدا بووین، شورەشا پیشەسازیا چارێ‌ شورەشا دیجیتالی یە، كو تەكنەلۆژیا بوویە پشكەك ژ ژیانا رۆژانەیا جڤاكی و هەر تاكەكی و ژێ‌ ناهێتە جودا كرن و نموونە ژی د ڤی بیاڤی دا ناهێنە هژمارتن و چ كەسەك ژی نەشێت خۆ ژێ‌ بێ‌ منەت بكەت. 

ل دویڤ دا پەیڤا لژنا بلندا كۆنفرانسی ژلایێ‌ د. جەلادەت محەمەد سالح ڤە هاتە خاندن و د پەیڤا خۆدا دیاركر كو ئەڤ كۆنفرانسە ژ چەندین تەوەران پێك دهێت ئەو ژی هەر ئێك ژ بایلۆژی، كیمیا، فیزیا، زانستێن كۆمپیوتەری و ماتماتیك و ب پشكداریا چەندین ڤەكۆلەرێن كوردستانی و عیراقی و نێڤدەولەتی وەكو رۆمانیا، توركیا, ئەلمانیا، فنلندا و بریتانیا و تیدا چەندین ڤەكۆلینێن ئاست بەرز ل بوارین جودا جودا دێ‌ هێنە نیشادان و گەنگەشە كرن و دێ‌ بۆ ماوێ‌ دوو رۆژان یا بەردەوام بیت، ل دویڤ دا ژی پەنەلێن زانستی یێن كۆنفرانسی دەست پێ‌ كرن.