College of Law and Political Sciences

The 3rd international scientific conference of law

ل رۆژا 16/4/2019 كۆلیژا یاسا و زانستێن رامیاری كۆنفرانسێ‌ زانستی یێ‌ نێڤدەولەتی یێ‌ سیێ‌ ل دۆر چارەسەریێن یاسایی و رامیاری بۆ ئاریشێن هەڤچەرخێن هەرێما كوردستانێ‌ و عیراقێ‌ و ل ژێر درووشمێ‌ (بەرەف چەسپاندنا سەروەریا یاسایێ‌ و دەستهەلاتا پێگەهشتی) ل هۆلا كۆنفرانسان ل زانكۆیا دهۆك ئەنجام دا.

 ل رێورەسمێن دەستپێكرنا كۆنفرانسی سەرۆكێ‌ لژنا بلندا كۆنفرانسی د. قاسم ئەحمەد راگرێ‌ كۆلیژا یاسا و زانستێن رامیاری د پەیڤەكی دا بەحسێ‌ ئارمانجێن كۆنفرانسی كر و دیاركر كو ژ بۆ دەستنیشان كرنا ئاریشێن سەردەم یێن هەرێما كوردستانێ‌ و عیراقێ‌ یە و دیتنا رێكێن یاسایی ژ بۆ ڤان ئاریشان، هەروەسا هەلسەنگاندنا رۆلێ‌ سیستەمێ‌ رامیاری د نەهێلانا ئاریشان دا. 

هەروەسا ئاشكرا كر كو 135 كورتیێن ڤەكۆلینان هاتینە وەرگرتن ژ ڤەكۆلەرێن كوردستانێ‌ و عیراقێ‌ و مسر، جەزائیر، لیبیا، ئوردن، میرنشینا عومان، بریتانیا، توركیا و ئیرانێ‌.

سەرۆكێ‌ زانكۆیا دهۆك پ. د. مصلح دهۆكی د پەیڤەكی دا گۆت سەروەریا یاسایێ‌، ئەو تێگەه و پرەنسیپە یێ‌ كو مە هەمیا دڤێت بهێتە چەسپاندن و بجه ئینان، داكو د هەر كارەكی دا یاسا ئامرازێ‌ ڤاڤارتنێ‌ و جوداكرنا دادیێ‌ بیت ژ نەدادیێ‌، چونكو ئەگەر یاسا هندەك پێگیریا بدانیت بەرامبەری وێ‌ دێ‌ مافان ژی دیار كەت، بۆ ڤێ‌ چەندێ‌ ژی باشترین رێك بەرەف سەروەریا یاسایێ‌ رێزگرتنە ل یاسایێ‌ و هەروەسا بجهئینانا وێ‌ یە. 


پ. د. مصلح دهۆكی هەروەسا گۆت ژ بەر گرنگیا بابەتێ‌ سەروەریا یاسایێ‌ و ئەو ئاریشێن ب رێیا یاسایێ‌ دهێنە چارەسەركرن ئەڤرۆكە د ڤی كۆنفرانسی دا دێ‌ بەحسێ‌ چارەسەریێن یاسایی و سیاسی هێتە كرن بۆ ئاریشێن نوكە ل هەرێما كوردستانێ‌ و عیراقێ‌ هەین، كا دێ‌ چاوا دشیان دا بیت ئەڤ ئارشە بهێنە چارەسەر كرن و ئێدی هەر دەمێ‌ ئاریشەكا نوی سەرهەلدەت مە یاسایێن پێدڤی هەبن بۆ لێزڤرینێ‌ و ئاریشە هند مەزن نەبن و چارەسەریا وان هەبیت، دیار ژی كر كو گەلەك بابەتێن دیتر یێن گرنگ ل هەرێما كوردستانێ‌ یێن هەین مە پێدڤی ب چارەسەریێن یاسایە و دارشتنا یاسایێن سەردەمیانە یە، بۆ نموونە بابەتێ‌ یاسایێن بازرگانی كرنێ‌ و وەبەرهێنانێ‌ و گەشتیاری كو پتر گرنگی پێ‌ بهێتە دان، ئەڤ یاسایە ب وی رەنگی بن ژێرخانەكا مكوم بۆ ڤان كەرتان بهێتە دانان داكو بۆ ئایندەی پشت بەستن ل سەر داهاتێ‌ ڤان سەكتەران بهێتە كرن.

د. نەجدەت ئاكرەی نوینەرێ‌ وەزیرێ‌ خواندنا بلند د پەیڤەكی دا پەسنا بابەتێ‌ كۆنفرانسی كر و بەهەڤیا وەزارەتێ‌ ژی دیاركر بۆ پشتەڤانیا ڤان جۆرە بابەتان، ل دویف دا پەنەلێن كۆنفرانسی دەست پێ‌ كرن.