كولیژا یاسا

کورتیەک لدور ناڤەندا دیموکراسیێ ومافێن مروڤى
July 25, 2017, 1:31 p.m.

ناڤەندا دیموكراسیێ‌ ومافێن مروڤی دهێتە هەژمارتن ئێك ژ ناڤەندێن ئەكادیمی وئارمانجا وێ‌ بەلاڤكرنا روشەنبیری یا مافێن مروڤی وپێگەهاندنا دیموكراسیێ‌ یە. ئەڤ ناڤەندە ل سالا 2004 هاتیە دامەزراندن، ئەڤ ناڤەندە ئێك ژ ئامرازێن پەیوەندیێ‌ یێن راستەوخویە د ناڤبەرا زانكویێ‌ وكومەلگەهێ‌ دا.


جهێ‌ ناڤەندێ‌:

جهێ‌ ناڤەندا دیموكراسیێ‌ ومافێن مروڤی دكەڤیتە كولیژا یاسا وزانستێن رامیاری/ زانكۆیا دهوك.


پەیاما ناڤەندێ‌:

ناڤەند كار دكەت ژ بۆ بەلاڤ كرنا روشەنبیری یا شارستانیەتیا نوی وڤەكرنا پەرنجەرێن روشەنبیری وهزری ل دور تێگەهێن مافێن مروڤی ودیموكراسیێ‌ وبتایبەتی ل هەرێما كوردستانێ‌، بئارمانجا رەفتاركرنێ‌ بشێوەیەكێ‌ ئەكادیمی دگەل گرنگترین بابەتێن گرێدای بمافێن مروڤی ودیموكراسیێ‌ وبەلاڤ كرنا ڤێ‌ رەوشەنبیریێ‌ د دامودەزگایێن میری ل باژێرێ‌ دهوكێ‌ وبتایبەتی دامودەزگایێن فێركاری، ودوپاتكرن ل سەر لێبورینا ئایینی وبەهایێن رەوشتی یێن جڤاكێ‌ كوردی، زێدەباری هەڤكاری كرنێ‌ دپێشئێخستنا هەست كرنێ‌ ب گرنگیا دیموكراسیەتێ‌ ومافێن مروڤی، چنكو دیموكراسیەت هزر وروشەرنبیری یە بەری بەری ببیتە پروژەیەك بۆ ئاڤاكرنا قەوارەیەكێ‌ رامیاری، لەوپێدڤیە ل دەستپێكێ‌ ژ شەنگستێ‌ جڤاكی تا سەرێ‌ گوپیتكێ‌ (قمە الهرم) پەروەردەكرن ل سەر بهێتەكرن وببیتە پرەك بۆ پاراستنا مافێن مروڤی ئەوێن هەردەم ل ژێر هەرەشا بن پێ‌ كرنێ‌ وبتایبەتی ل جڤاكێن تایبەتمەند ب فرە نەتەوەیی، ئایینی... وخودان كێشە ومێژوویەكا دەستهەلاتداریا دكتاتوری وەكی عیراقێ‌ وبتایبەت ل سەردەمێ‌ رژێما پێشی دا.


ئارمانجێن ناڤەندێ‌:

1. هەڤكاری كرن د بەلاڤكرنا رەوشەنبیریا مافێن مروڤی ودیموكراسیێ‌ وبتایبەتی د دامودەزگایێن فێركرنێ‌ ل پارێزگەها دهوكێ‌.

2. كاركرن ل سەر ئاڤاكرنا پەیوەندیێن موكوم دناڤبەرا ناڤەندێ‌ ورێكخراوێن جڤاكێ‌ شارستانێ‌ ئەوێن هەمان دیتن وئارمانجێن ناڤەندێ‌ هەین ودتایبەتمەند د رەفتاركرنێ‌ دگەل بابەتێن گرێدای ب بوارێن مافێن مروڤی ودیموكراسیێ‌.

3. كاركرن ل سەر كرنا ناڤەندێ‌ وەك پەناگەهەك بۆ قوتابی وماموستا وڤەكولەران دبوارێن مافێن مروڤی ودیموكراسیێ‌ وپێشكێشكرنا هاریكاری وشێرەتێن دشیاندا بۆ هەر كەسێ‌ سەرەدانا ناڤەندێ‌ دكەت.

4. هەڤكاری كرن د ئێخستنا تیشكێ‌ ل سەر بابەتێن مافێن مروڤی ودیموكراسیێ‌ وپتر دیاركرنا وان برێكا گرێدانا كوڕ وكونگرە وسیمینارێن گرێدای كێشە وبابەتێن جڤاك ژ بەر دنالیت.


كاروبارێن ناڤەندێ‌:

1. گرێدانا كوڕ وسیمینار وزنجیرەیێن گەنگەشەیی وپێشكێشكرنا خزمەت وپێزان وشیرەتان.

2. كاركرن دگەل دامودەزگایێن ناڤخویێ‌ ونێڤ دەولەتی یێن هەڤ ئارمانج دگەل ناڤەندێ‌ ولێك گوهارتنا شارەزایی وپێزانینا.

3. گەهاندنا ناما ناڤەندێ‌ بۆ وان تەخێن پێ‌ ئارمانج ژ جڤاكی.

4. بەلاڤكرنا تێگەهێن مافێن مروڤی ودیموكراسیێ‌ برێكێن ل بەر دەست.

5. تیشك بەردان ل سەر ئاریشەیێن توشی جڤاكی بووین وهەڤكاری كرن د چارەكرنا واندا بهەمی شیانا.

6. ئەنجامدانا هەر كار وڤالاكیەكا بكەڤیتە د چارچوڤێ‌ نامە وئارمانجێن ناڤەندێ‌ دا.