كولیژا پەروەردا بنیات
ل زانكۆیا دهۆك كۆنفرانسەكێ نێڤدەولەتی ل دۆر بیاڤێن پەروەردەی هاتە گێران
ل ژێَر درووشمێ (كاملان بوونا زانستنان بەرەف بجهئینانا ئارمانجێن فێركرنێ) هەردوو كۆلیژێن پەروەردا بنیات ل زانكۆیێن دهۆك و میسل ب هەڤكاری د گەل سەنتەرێ نون یێ ڤەكۆلین و خواندنێن تایبەتمەند ل رۆژا 10/4/2019 كۆنفرانسەكێ نێڤدەولەتی گێران ل دۆر بیاڤێن پەروەردەی گێران.
سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت گرنگی دان و پێشخستن د بیاڤێ خاندن و زانستی دا چ دەما ب دووماهی ناهێن، چەند پتر گرنگی ب ڤی بیاڤی بهێتە دان ئەو هند دێ بینە خوان كەسانێن ئەكادیمی و هەلگرێن مەشخەلا زانست و زانینێ، چەند پتر مە خەمخۆرێن رێبازا زانستی هەبن، ئەو هند زانكۆیێن مە دێ شێن پشت بەستنێ كەنە سەر كوالیتیا خواندنێ و جۆرێ كەرەستێن بۆ پرۆسا خاندنێ دهێنە بكارئینان.
پ. د. مصلح دهۆكی هەروەسا گۆت زانكۆیا دهۆك پێخۆشە ب گێرانا ڤان جۆرە كۆنفرانسێن هەڤپشك دگەل زانكۆیێن دیتر یێن دەڤەرێ، هەروەسا ئاماژە دا وێ چەندێ كو دڤێت پویتەكێ مەزن بدەینە بجهئینانا ئارمانجێن فێركرنێ كو نەبتنێ دانا باوەرنامان بیت و دەرچوونا قوتابیان، دڤێت ئەو قوتابیێن ژ ڤان زانكۆیان دەردچن ئەو پەیام وەرگرت بیت یا زانكۆیێ گەهاندیە قوتابیان، كو ئارمانجا پرچەك كرنە ب زانین و زانستی و خۆ پێشخستنێ د بیاڤێن جودا دا.
ل دویف دا پەیڤا راگرێ كۆلیژا پەروەردا میسل ژلایێ د. سەفائەدین عەبدوللا راگرێ كۆلیژا پەروەردا بنیات یا زانكۆیا میسل هاتە خواندن د پەیڤا خودا گۆت ب خۆشحالیڤە ئەم دگەل زانكۆیا دهۆك ڤی كۆنفرانسێ نێڤدەولەتی دگێرین دیار ژی كر كو ئەڤە پێكڤە ژیان و برایەتی و ئێكگرتنا د ناڤبەرا مەدا ب عەرەب و كورد و هەمی نەتەوان ڤە ڕەنگڤە ددەت، كو ئەڤ كۆنفرانسە كۆمەكا باشترین ئەكادمی و ڤەكۆلەرێن عیراقی ب بسپۆریێن زانستی و مرۆڤایەتێن جودا جودا بخۆڤە دگریت، زێدەباری كۆمەكا باش ژ ڤەكۆلەرێن وەلاتێن عەرەبی و هەرێمی ل گەل پشكداریەكا بەرفرەه ژ ڤەكۆلەر وئەكادیمیێن عیراقی و هەرێما كوردستانێ، كو هژمارا ڤەكۆلینێن بۆ كۆنفرانسی هاتینە پێشكێش كرن پترن ژ 295 ڤەكۆلینان د بسپۆریێن جودا جودا كو 243 ڤەكۆلین ژێ هاتینە پەسەند كرن هەروەسا هژمارا ئامادەبوویان پترە ژ 750 پشكداران.
ل دیڤدا پەیڤا نوونەرێ ڤەكۆلەرێن پشكدار ژ لایێ د. نەبیل محیەدین هاتە خواندن بەحسێ وان ڤەكۆلینان كر ئەوێن بۆ ماوێ دوو رۆژا دێ هێنە پێشكێش كرن كو دابەش بوونە سەر كۆمەكا تەوەران ژ وانا تەوەرێ مێژوویا ئیسلامی و كەڤن و پەروەردا وەرزشی و بیركاری و ڤەكۆلینێن فیزیا و كیمیا و زیندەورزانی و پەروەردا دەروونناسی و زمانێ ئنگلیزی و زمانێ عەرەبی و گەلەك تەوەرێن دیتر.
ل دیڤدا باوەرنامێن رێزگرتنێ ل سەر كۆمەكا مامۆستایێن هەردوو كۆلێژێن پەروەردا بنیات دهۆك و میسل هاتنە بەلاڤ كرن و دیسا تابلۆیێ پێكڤە ژیانێ ژلایێ تیپا هونەرێ ملی دهۆك سەر ب رێڤەبەریا رەوشەنبیری و هونەری دهۆك هاتە پێشكێش كرن و پاشی پەنەلێن كۆنفرانسی دەست پێكرن.
للمعلومات تواصل معنا
Facebook: @BasicEd3Con
Email: Basiceducon2019@gmail.com