ل رۆژا 5/7/2020 ل سەرۆكاتیا زانكۆیا دهۆك كۆمبوونەكا بەرفرەه ل ناڤبەرا زانكۆیا دهۆك و قائمقامێ قەزا شنگار و رێڤەبەری پەروەردا شنگارێ ل دۆر پێدانا جهێ ڤەحەواندنێ و ئەزمونان بو قوتابیێن قەزا شنگار ێ یێن پولا 12 ئامادەی ل زانكۆیا دهۆك.
د ڤێ كۆمبوونێ دا كو سەرۆكێ زانكۆیێ و هاریكارێ سەرۆكێ زانكۆیێ بو كاروبارێن قوتابیان و رێڤەبەرێ پشكێن نافخویی ئامادەبون، سەرۆكێ زانكۆیا دهۆك بەرهەڤیا خو دیاركر بو دابینكرنا دوو پشكێن نافخویی ئیك بو كچان یێ دێ بو كوران كو 560 قوتابی دێ لێ هێنە ڤەحەواندن بو ئەنجامدانا ئەزمونێن قوتابیێن شنگارێ كو هەمی پێتڤیێن قوتابی د ێ بو هێنە ئامادە كرن .
مەحما خەلیل قائمقامێ قەزا شنگارێ گوت "ئەم سوباسیا زانكۆیا دهۆك دكەین كو هەر دەم هاریكارە دگەل قوتابێن دەڤەرێن دەرڤەی ئیدارا هەرێمێ، وئەڤرو ژی زانكۆیا دهۆك بەرهەڤیا خو دیاركر بو وەرگرتنا 560 قوتابیێن پولا 12 ئامادەی ل پشكێن نافخویێ یێن زانكۆیێ بو ئەنجامدانا ئەزمونان كو دێ هەر ل ناڤ زانكۆیا دهۆك ئەنجام دەن".
سەرۆكێ زانكۆیا دهۆك پرۆفیسور د. مصلح دهۆكی دیاكر " زانكۆیا دهۆك هەردەم یا هاریكارە د گەل برایێن ئیزدی بتایبەت قوتابیان، و لدویف داخازا پەروەردا شنگار مە دوو پشكێن نافخویێ بو ڤەحەواندنا پتر ژ 500 قوتابیان ئامادەكرینە بهەمی پێتڤیا ڤە و هۆلێن ئەزمونان بو دابینكرینە كو قوتابی بێ هیچ ئاریشەك ئەزمونێن ئەنجام دەن ".