هاریكارێ سەرۆكێ زانكۆیا دهۆك بۆ كاروبارێن قوتابیان د. مێڤان عارف دیاركر كو ل دووڤ سالناما زانكۆیێ 25/9 دەواما زانكۆیێ دەست پێ دكەت و نوكە ستافێ مامۆستایێن زانكۆیا دهۆك یێ بەرهەڤە بۆ دەستپێكرنا سالا نوی یا خواندنێ و ل رۆژا 2/10/2016 دێ وانە دەست پێ كەن و خشتێ وانەگۆتنێ ل هەموو پشكێن زانستی هاتیە دانان، هەر قوتابیێ ل 2/10 نەچیتە د وانان دا دێ نەهاتی هێتە تۆمار كرن.
ل دۆر پشكێن ناڤخۆی د. مێڤان عارف دیاركر كو ب بەرهەڤبوونا نوونەرێ وەزارەتا خواندنا بلند و نوونەرێ گەنجینا دهۆكێ لژنە هاتیە دانان كو ئەو ئاڤاهیێ دهێتە گرتن هەموو مەرجێن دیاركری تێدا بن بۆ ئاكنجی بوونا قوتابیان، وەكو مەرجێن ساخلەمی و سلامەتیێ و وێ لژنێ سەرەدانا هەموو وان ئاڤاهیان كریە ئەوێن هاتینە دەست نیشان كرن بۆ پشكێن ناڤخۆی، ئەو ژی ئاشكرا كر كو نێزیكی 60 ئاڤاهیی ل باژێرێ دهۆكێ هاتینە گرتن بۆ پشكێن ناڤخۆی و هندەك ژی ل ئاكرێ و ئامێدیێ و سێمیلێ.
هاریكارێ سەرۆكێ زانكۆیا دهۆك بو كاروبارێن قوتابیان ئەو ژی گۆت كو بۆ ئاكنجی بوون ل پشكێن ناڤخۆی هەر قوتابیەك دێ پەسەندەكی ژ كۆلیژا خۆ ئینیت كو قوتابیێ دەرڤەی باژێری یە و پێدڤی ب پشكا ناڤخۆی یە و ل دووڤ رێنمایێن دارایی و وەزارەتێ هەر قوتابیەك دێ 100 هزار دیناران وەكو تەئمینات دانیت و نازڤرینیت، كو ئەڤە بریارێن وەزارەتا خواندنا بلندن.
ل دۆر خاندنا ئێڤاران و پارالێل د. مێڤان عارف دیاركر كو فۆرمێن خاندنا ئێڤاران و پارالێل یێن هاتی كو دێ پێشبركی ل ناڤ قوتابیان پەیدا بیت، زانكۆیا دهۆك ژی بۆ سالا نوو یا خواندنێ دێ 30 پشكێن زانستی خواندنا ئێڤان ڤەكەت، ل كۆلێژێن (زانست، پەروەردا بنیات، زانستێن مرۆڤایەتی، كارگێری و ئابووری، پەروردا ئاكرێ و پەروەردا بنیات ئامێدیێ پەروەردا وەرزشی) كۆلیژا پەرستاری بتنێ بۆ فەرمەنبەرێن ساخلەمیێ بۆ خواندنا ئێڤاران ڤەكەن.
گۆت ژی فۆرمەكا تایبەت یا هەی دێ ل كۆلیژا هێتە دان بۆ قوتابیان ب مەرجەكی ئەو نمرا سالا بۆری هاتیە وەرگرتن دێ بۆ هێتە هژمارتن و دێ پێشبركیێ ل سەر كەن كا كێمترین كونمرا ل سالا بۆری هاتیە وەرگرتن چەندە دێ 40 نمرە كێمتر هێتە وەرگرتن بو ئێڤاران.
ل دۆر كریێن خاندنا ئێڤاران هاریكارێ سەرۆكێ زانكۆیا دهۆك بو كاروبارێن قوتابیان دیاركر كۆلیژێن مرۆڤایەتی ل سەر ملیۆن و نیڤا هاتیە دەست نیشان كرن، كۆلیژا زانست دوملیۆن و نیڤ هاتینە دیاركرن، ژ بەر تاقیگەه و ئەو كەرەستێن ل تاقیگەهان دهێنە بكارئینان مەزاختیێن وان پترن.
د. مێڤان عارف هەروەسا ئاشكرا كر كو خواندنا ئێڤاران ل كۆلیژا پەرستاری هاتیە ڤەكرن و دێ یا تایبەت بیت ب كارمەندێن سەر ب رێڤەبەریا گشتی یا ساخلەمیا پارێزگەها دهۆكێ ڤە، ئەڤ فۆرمە ژی د بەرهەڤن بۆ وەرگرتنێ.
ل دۆر خاندنا پەرەلێل د. مێڤان عارف ئاشكرا كر ل كۆلیژێن كۆمەلا پزیشكی كو ئەوێن دشێن پێشكێش بكەت دێ پێشبركیا وان ل سەر 30 نمرا بیت كێمتر ژ وێ كونمرێ دهێتە وەرگرتن، پشكێن ب سەر كۆلیژا ئەندازیاری دێ پێشبركیێ ل سەر 35 نمرا كەن، كۆلیژێن دیتر دێ ل سەر 40 نمرا پێشبركیێ كەن، كو كێمتر ژ كونمرا ل وێ پشكێ دهێتە وەرگرتن.
د. مێڤان عارف گۆت ژی ئەم پێشبینی دكەین ئەڤ سالە ئەو رێژا بۆ وەرگرتنێ هاتیە دەست نیشان كرن هەكە ل وەزارەتێ بهێتە پەسەند كرن 20% بۆ خاندنا پەرەلێل بۆ هەموو كۆلیژا هاتیە دانان، ئانكو قوتابی دشێت پێشكێشی هەموو پشكا بكەت، ل وەرگرتنا پەرەلێل ژی پێشبركی هەر دێ ل سەر كونمرەی بیت.
هاریكارێ سەرۆكێ زانكۆیا دهۆك بو كاروبارێن قوتابیان هەروەسا دیاركر كو ڤەگوهاستن بۆ سالا نوو یا خواندنێ یا ب دووماهی هاتی كو ژ 1/7 دەست پێ دكەت و هەتا 1/9 ب دووماهی دهێت، بۆ مێڤانكرنا قوتابیان ژی ل زانكۆیا دهۆك گۆت نوكە نێزیكی هزار قوتابیان مێڤانداری یێن هاتینە وەرگرتن ل زانكۆیا دهۆك و یێن سالا بۆری هەموو ب فەرمانەكا زانكۆیێ مێڤانداریا وان یا بۆ هاتیە نوی كرن.