بەیاننامەك ژ هەرسێ‌ زانكۆیێن دهۆك، زاخۆ و پۆلیتەكنیك دهۆك
Dec. 10, 2018, 1:46 a.m.


هەرسێ‌ سەرۆكێن زانكۆیێن دهۆك، زاخۆ و پۆلیتەكنیك دهۆك ل گەل هاریكارێن زانستی و نوینەرێن دلنیایی جۆری ل هەرسێ‌ زانكۆیان ل دۆر ئەنجام و شێوازێ‌ ئەنجامدانا پرۆسێسا رێزبەندیا زانكۆیێن كوردستانێ‌ كو ژلایێ‌ وەزارەتا خاندنا بلند ڤە هاتیە بەلاڤكرن، ل رۆژا 6/12/2018 كۆمبوونەك ئەنجام دان و ئەڤ بەیاننامە بەلاڤ كر.

بناڤێ‌ جڤاتێن هەرسێ‌ زانكۆیێن دهۆك، زاخۆ و پۆلیتەكنیك دهۆك بۆ دەزگەهێن بەرپرس ل حكومەتا هەرێما كوردستانێ‌ و رایا گشتی رادگەهینین كو پشتی ئەنجامێن پرۆسسێسا رێزبەندیا زانكۆیان ژلایێ‌ وەزارەتا خاندنا بلند ڤە هاتیە راگەهاندن، مە هەست كریە كو نە داپەروەری تێدا هاتیە ب كارئینان و غەدر د هژمارتا خالاندا ل زانكۆیێن مە هاتیە كرن و پرۆسێس ب عەدالەت نە هاتیە ب رێڤەبرن، مە داخازا پێكئینانا لیژنەكا هەڤپشك كر بوو ژ هەرسێ‌ زانكۆیان بۆ دویفچوونا راستی و شێوازێ‌ ئەنجامدان و هژمارتنا خالان، لێ‌ ب موخابنی ڤە وەزارەتا خاندنا بلند پشتی بۆرینا 10 رۆژان و هەتا نوكە بەرسڤ ل سەر داخازیا مە نەدایە، هەرچەندە ئەڤ داخازیە ئێكسەر رادەستی جەنابی وەزیری هاتیە كرن. 
لەوا ئەم رادگەهینین كو ئەنجامێن رێزبەندیێ‌ دەربرینێ‌ ژ ئاستێ‌ زانكۆیێن كوردستانێ‌ ناكەن و ئەم هەست دكەین كو هندەك ئارمانجێن نە یێن زانستی یێن ل پشت ڤێ‌ رێزبەندیێ‌ و شێوازێ‌ ئەنجامدانێ‌ د بەرژەوەندیا هندەك زانكۆیا دا هاتینە بەلاڤ كرن.
ئەم داخازێ‌ ژ سەرۆكاتیا حكومەتا هەرێما كوردستانێ‌ دكەین كو پێدا چوون د شێوازێ‌ ئەنجامدانا پرۆسێسێ‌ ب لژنەكا تایبەت بهێتەكرن و راستیا ئاستێ‌ هەر زانكۆیەكێ‌ بۆ خەلكێ‌ كوردستانێ‌ و ناڤەندێن زانستی بهێتە دیار كرن و ئەڤ غەدرا ل زانكۆیێن مە بهێتە راكرن و دووپات دكەین كو بۆ ئێك رۆژ دەواما مامۆستا و قوتابیان نەهاتیە راوەستاندن ل ڤان هەرسێ‌ زانكۆیان.
ئەگەر وەزارەت پێداچوونێ‌ نەكەت و بۆ سالا بهێت هەر ب ڤی شێوازی و ب هەمان پیڤەران پرۆسێس بهێتە ئەنجام دان ئەم پشكداریێ‌ د رێزبەندیا وەزارەتا خواندنا بلند دا ناكەین و بتنێ‌ دێ‌ پشتبەستنێ‌ ل سەر رێزبەندیێن جیهانی كەین.