جڤاتا زانكۆیا دهۆك كو پێكهاتیە ژ سەرۆكێ زانكۆیێ و هاریكاران و راگرێن كۆلیژان ل رۆژا 22/10/2018 كۆمبوونا نەئاسایی یا سیێ ل دۆر ئاریشا وەرگرتنا قوتابیان گرێدا و ل دویف دا سەرۆكێ زانكۆیا دهۆك پ. د. مصلح دهۆكی د كۆنگرەكێ رۆژنامەڤانی دا بەحسێ ئەنجامێن كۆمبوونێ و بزاڤێن زانكۆیا دهۆك كرن ئەوێن بۆ چارەكرنا ڤێ ئاریشێ دهێنە ئەنجام دان.
سەرۆكێ زانكۆیا دهۆك دیاركر كو پلانا زانكۆیا دهۆك یا سالا نوی یا خواندنێ وەرگرتنا 4500 چارهزار و پێنج سەد قوتابی بوون، بەلێ هەتا نوكە بتنێ ناڤێ 2765 قوتابیان یێن هاتین كەواتە ل دویڤ پلانا زانكۆیێ زانكۆیا دهۆك دێ 1735 قوتابیێن دی شێت وەرگریت زێدەباری كو د ڤێ كۆمبوونا ئەڤرۆ دا بریار هاتە دان كو زانكۆیا دهۆك 500 قوتابیێن دیتر زێدەی پلانا خۆ وەربگریت، ئانكو زانكۆیا دهۆك دێ 2235 قوتابیێن دیتر وەرگریت ل هەرچار سیستەمێن وەرگرتنێ.
پ. د. مصلح دهۆكی سەرۆكێ زانكۆیا دهۆك هەروەسا گۆت بزاڤێن مە د بەردەوامن بۆ چاركرنا ڤێ ئاریشا قوتابیان و دوو جاران سەرەدانا وەزارەتا خواندنا بلند و ڤەكۆلینێن زانستی كریە و دیاركر كو لژنەك ل وەزارەتێ هاتیە پێك ئینان بۆ دویف چوونا حالەتێ وان قوتابیێن ناڤێن وان نەهاتین و وەزیرێ خواندنا بلند سوز دایە كو ب رێكا ڤێ لژنێ هەمی ئاریشێن ڤان قوتابیان دێ هێنە چارەكرن و ل حەفتیا بهێت دێ ئەنجام دیاربن.