ل رۆژا 29/1/2020 ل سەنتەرێ رەوشەنبیری و جڤاكی یێ زانكۆیا دهۆك د رێورەسمەكی دا گەرا ئێكێ ژ پشكدارێن خولا پێداگۆجی دەرچوون، ئەڤ خولە هەروەكو د. ئامانج سعید شیرەتكارێ وەزیرێ خواندنا بلند و ڤەكولینێن زانستی د پەیڤەكی دا ئاماژە پێ دایی كو ب پشتەڤانیا وەزارەتا خواندنا بلند و زانكۆیێن پارێزگەها دهۆكێ هاتبوو ئەنجام دان.
د ڤێ خولێ دا 33 كەس ژ هەمی زانكۆ و پەیمانگەهێن پارێزگەها دهۆكێ تێدا د پشكداربوون و ژلایێ 13 مامۆستایان ڤە هاتنە مەشق كرن كو پێشتر ئەڤ مامۆستایە هاتبوونە راهێنانكرن ژ لایێ زانكۆیا HAMK یا فینلندی ڤە ل دویف پرۆگرامەكێ وەزارەتا خواندنا بلند.
سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت ئەڤرۆ ئەم پێخوشحالین كو رێورەسمێن دەرچوونا ئێكێ یا خولا پێداگوجی ل زانكۆیا دهۆك ئەنجام دەین كو ئەڤە ئێك ژ پێنگاڤێن وەزارەتا خواندنا بلند یا حكومەتا هەرێمێ یە گرنگیێ ددەتە هەمی لایەنێن پێشخستن و گەشەپێدانێ داكو مامۆستایێ مە ل هەرێما كوردستانێ یێ مفادار بیت ژ وێ پێشڤەچونا دبیاڤێ زانستی دا ل جیهانێ پەیدا دبیت، ل ڤێرێ دەستخۆشیێ ل ڤان پێنگاڤێن وەزارەتێ دكەین و داخازا مە ئەوە پێنگاڤێن ژ ڤی رەنگی پتر هاندان و پشتەڤانی ژ بو هەبیت، هەروەسا ل ڤێرێ دەستخوشیێ ل مامۆستا و پشكدارێن ڤێ خولێ ژی دكەن كو بابەتێ خولێ ب گرنگی وەرگرتی و مفا ژێ دیتی.
هەروەسا گۆت هەر زانكۆیەكی پلان و ستراتیژیێن خۆ یێن هەین بۆ پێنگاڤێن ئایندەی و چاوانیا پێشخستنێ، مە ژی وەكو زانكۆیا دهۆك بابەتێ پێشخستنا شیانێن مامۆستا بۆ مە جهێ گرنگیێ بوویە و هەمی ئاسانكاری ژی هاتینە پێشكێش كرن داكو مامۆستایی چ ئاستەنگ ل پێشیا وی نەمینن دڤی بیاڤی دا.
ل دویف دا كورتە ڤیدیویەك ل دۆر خولێ هاتە نیشا دان و پاشی پەنەلەك بۆ وەرگرتنا بوچوونێن پشكداران ل دۆر چەوانیا بجه هاتنا خولێ ب رێڤەچوو و ل دووماهیێ ژی باوەرنامە ل سەر پشكدارێن ڤێ خولێ هاتنە بەلاڤ كرن.
هەژی گۆتنێ یە د ڤان رێورەسمان دا هەر ئێك ژ د. ئامانج سعید شیرەتكارێ وەزیرێ خواندنا بلند و ڤەكۆلینێن زانستی، و د. داود ئەترووشی رێڤەبەرێ گشتی ل وەزارەتا خواندنا بلند و د. مصلح دهۆكی سەرۆكێ زانكۆیا دهوك و د. لزگین عبدی سەرۆكێ زانكۆیا زاخۆ و د. عزت فندی سەرۆكێ زانكۆیا نەروز و د. زیرەك عزیز خان هاریكارێ سەرۆكێ زانكۆیا پولیتەكنیك بۆ كاروبارێن زانستی و د. لوقمان هادی حسن هاریكارێ سەرۆكێ زانكۆیا دهوك بۆ كاروبارێن زانستی و خاندنا بلند و چەند راگر و هاریكارێن سەرۆكێن زانكۆیان د بەرهەڤ بوون.