ل رۆژا 29/1/2020 ل سەنتەرێ رەوشەنبیری و جڤاكی یێ زانكۆیا دهۆك رێڤەبەریا دلنیایی جۆری رێورەسمەك ب هەلكەفتا سەركەفتنا زانكۆیا دهۆك ل رێزبەندیا نشتیمانی یا سالا خواندنێ 2018-2019 دا سازكر و ئەو كەسێن كاركری دڤێ سەكەفتنێ دا باوەرنامێن رێزگرتنێ بۆ هاتنە پێشكێش كرن.
سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت سەركەفتنێن زانكۆیا دهۆك، سەركەفتنن بۆ هەمی مامۆستا و قوتابی و فەرمانبەر و هەر كەسێ د زانكۆیێ دا كار دكەت، هەر كەس ل جهێ خۆ شانازیێ ب وان سەركەفتنا دبەت، هەر كەس ل جهێ خۆ كار دكەت بێ راوستیان چونكو دزانن ماندیبوونا وان دێ بەرهەمێ خۆ هەبیت، بەرهەم ژی ئەو پێشەنگی نە یێن زانكۆیا دهۆك د هەمی بیاڤان دا تۆمار دكەت و رۆژ بۆ رۆژێ پێنگاڤێن مەزنتر بەرەف پێش د هاڤێژیت.
پ. د. مصلح دهۆكی هەروەسا ئاماژە دا وێ چەندێ كو سازیەكا ئەكادیمی یا بەرفرەه وەكو زانكۆیا دهۆك چ پێ نەڤێت دێ ڤەرێژا كارێ وێ جهێ خۆ هەبیت ل هەر بیاڤەكی، ب تایبەت د بیاڤێن ئەكادیمی و زانستی دا، كو ل دویف رێزبەندیا نشتیمانی یا وەزارەتا خواندنا بلند زانكۆیا دهۆك ل رێزا زانكۆیێن پێشەنگە ل هەرێما كوردستانێ، هەروەسا ل دویف رێزبەندیا نێڤدەولەتی یا گوگل سكولەری ژی زانكۆیا دهۆك ل رێزا دوێ دهێت ل هەرێمێ، ئەڤ دەستكەفتە ب سانەهی ب دەستڤە ناهێن، بەلكو ب ماندیبون و كارێ بەردەوام زانكۆ سەنگا خۆ رادگریت.
هەروەسا سەرۆكێ زانكۆیێ سوپاسیا ئێك ئێكە یا مۆستا و فەرمانبەر و هەمی ستافێ زانكۆیا دهۆك كر، كو هەردەم زانكۆ ب مالا خۆ زانیە و نەهێلایە بۆ ئێك رۆژ ژی دەواما خاندنێ ل زانكۆیا دهۆك ب راوستیت، سەرەرایی هەمی بارودوخا، چونكو مامۆستایێن زانكۆیا دهۆك هەلگرێن مەشخەلا زانستی بووینە و نەهێلایە چرایێ زانینێ بهێتە ڤەمراندن، بەلكو رۆژ بۆ رۆژێ ئەڤ چرایە گەشتر و روهن تر لێ دهێت.
هەروەسا هاریكارێ سەرۆكێ زانكۆیا دهۆك بۆ كاروبارێن زانستی و خواندنا بلند د پەیڤەكی دا بەحسێ رۆلێ زانكویێ كر ل رێزبەندیا نیشتیمانی و ئەو كارێ ژ لایێ زانكۆیا دهۆك ڤە هاتیە كرن، هەر د رورەسمی دا ئەو تیمێ كار كری د ڤێ پررسێ باوەرنامێن رێزلێنانێ بۆ هاتنە پێشكێش كرن.
هەژی گۆتنێ یە وەزارەتا خاندنا بلند و ڤەكۆلینێن زانستی ل حكومەتا هەرێما كوردستانێ ل رۆژا 9/1/2020 و د رێورەسمەكی دا رێزبەندیا نشتیمانی یا زانكۆیێن هەرێما كوردستانێ راگەهاندبوو و زانكۆیا دهۆك ل رێزا زانكۆیێن پێشەنگ ل هەرێمێ جهێ خۆ گرتبوو.