دەزگەهێ خێرخازیێ بارزانی ل رۆژا 26/2/2018 د هەوەكا بەرفرەه دا هاریكاری ب سەر قوتابیێن پشكێن ناڤخۆی یێن زانكۆیا دهۆك د رێورەسمەكی ل كەمپێ زانكۆیا دهۆك ل مالتایێ بەلاڤ كرن.
د ڤان رێورەسمان دا سەرۆكێ زانكۆیا دهۆك پرۆفیسور د. مسلح دهۆكی د پەیڤەكی دا گۆت دەزگەهێ خێرخازیێ بارزانی هەر ژ دامەزراندنا خۆ ل سالا 2005 و هەتا نوكە كارەكێ بەرچاڤ و دیار ل هەرێما كوردستانێ ئەنجام دایە و كار و خێرخازی و هاریكاریێن وان یێن بەرچاڤ بەلگەنە ل سەر ڤێ چەندێ، ب تایبەت گەهاندنا دەستێ هاریكاریێ بۆ ئاوارە و پەنابەر و لێقەومیان، كو ئەڤ دەزگەهە بخو بوویە پەناگەهەك بۆ وان یێن پێدڤی ب هاریكاریێ بن، هەروەسا سوپاسیا دەزگەهی ژی كر بۆ بەلاڤكرنا ڤان هاریكاریان ب سەر قوتابیێن پشكێن ناڤخۆی.
سەرۆكێ دەزگەهێ خێرخازیێ بارزانی موسا ئەحمەد د پەیڤەكی دا گۆت دەزگەهێ خێرخازیێ بارزانی هەر سال ل بیرئانینا نەمران دا هەوەكا بەرفرەه یا بەلاڤكرنا هاریكاریان دەست پێ دكەت و دیارژی كر كو ئەڤ هاریكاریێن دێ ب سەر قوتابیان هێنە بەلاڤ كرن دوو جورن یێن خوراكی و هەروەسا یێن ساخلەمی كو دبنە 21 كەرەستە و نێزیكی 200 تەنێن كەرەستێن خوراكی دێ دڤێ هەوێ دا هێنە بەلاڤ كرن ل سەر قوتابیێن پشكێن ناڤخۆی یێن 14 زانكۆیێن حكومی یێن هەرێما كوردستانێ كو نێزیكی 47 هزار قوتابی ل هەرێمێ دێ ژ ڤان هاریكاریان مفا دار بن.