سەرۆكێ زانكۆیا دهۆك پ. د. مصلح دهۆكی ل رۆژا 10/11/2019 سەرەدانا وەلاتێ مەكسیك كر بۆ پشكداری كرنێ د كۆنفرانسێ جیهانی یێ نێڤدەولەتی یێ ئێكەتیا زانكۆیێن جیهانی ئەوێ ل زانكۆیا (Puebla) ل وەلاتێ مەكسیك ب رێڤەچووی.
پ. د. مصلح دهۆكی كو ئەندامێ لژنا سەرپەرشتیارە ل ئێكەتیا زانكۆیێن جیهانی (IAU) كو هەر سال كۆمبوونان دكەن و دویف دا كۆنفرانسەكێ زانستی ئەڤ ئێكەتیە ل وەلاتەكێ جیهانی ئەنجام ددەت و ڤێ جارێ ل مەكسیك گێرا ب پشكداریا پتر ژ 300 سەرۆك زانكۆیان ل دۆر بابەتێ ڤەگۆهاستنا خواندنا بلند بۆ ئایندەی، كو ڤێ لژنێ بەری كۆنفرانسی ب دوو رۆژان كۆمبوونێن خۆ ئەنجام ددان بۆ چاوانیا پتر بەرەف پێش برنا زانكۆیێن جیهانی.
سەرۆكێ زانكۆیا دهۆك دیاركر كو هەر چار سالان ئەندامێن لژنا سەرپەرشتیان د هێنە هەلبژارتن ژ سەرۆكێن زانكۆیێن ئەندام دڤێ ئێكەتیێ دا و ل سالا بهێت ل ئیرلەندا دێ هەلبژرتنێن نوی بۆ لژنا سەرپەرشتیان كو 24 ئەندامن هێنە هەلبژارتن، گۆت ژی مە سەرۆك و سكرتێرێن ڤێ ئێكەتیێ داخاز كرینە سەرەدانا كوردستانێ بكەن و ژ نێزیك رەوشا كوردستانێ و زانكۆیێن هەرێمێ ببینن و وان ژی ئەڤ داخازیا سەرۆكێ زانكۆیێ بەرچاڤ وەرگرتیە بۆ ڤێ سەرەدانێ.