ل ژێر چاڤدێریا سەرۆكێ زانكۆیا دهۆك پرۆفیسۆر د. مسلح دهۆكی و ب پشتەڤانیا كۆمپانیا نیو ستاندەرد یا پشكنین و كونترۆلا جۆری ل هەرێما كوردستانێ ل رۆژا 6/11/2017 دوو لابۆرێن نوی ل كۆلیژا چاندنێ هاتنە ڤەكرن.
سەرۆكێ زانكۆیا دهۆك دیاركر كو ڤان لابۆران قوتابیێن بەكالوریۆسێ دێ مفایی ژێ وەرگرن بۆ بكارئینانا وانێن پراكتیكی و هەروەسا قوتابیێن خواندنا بلند و مامۆستایێن كۆلیژێ بۆ ئەنجامدانا ڤەكۆلینێن زانستی، سوپاسیا كۆمپانیا نیو ستاندەرد یا پشكنین و كونترۆلا جۆری ل هەرێما كوردستانێ ژی كر بۆ ئەنجامدانا ڤی كاری و گۆت ئەڤ هەماهەنگیە دێ یا بەردەوام بیت ل گەل ڤێ كۆمپانیێ بۆ بلند كرنا ئاستێ ستاندارد یێ دلنیایا جۆری ل هەرێما كوردستانێ و بەردەوام دێ بسپۆرێن خۆ فرێكەین بۆ هاریكاری كرنا وان.
رێڤەبەرێ كۆمپانیا نیو ستاندەرد یا پشكنین و كونترۆلا جۆری ل هەرێما كوردستانێ د. موەفق سلێمان دیاركر كو ئەڤ كۆمپانیە پێكهاتیە ژ ستافەكێ ئەكادیمی و ب پشتەڤانیا زانكۆیا دهۆك و سەرۆكاتیا زانكۆیێ بۆ ڤێ كۆمپانیێ و كۆمپانیێن دیتر ل دەروازان یێن پشكنینێ كارێ خۆ ئەنجام ددەن، گۆت ژی ئەڤ لابۆرە و ئامیرێن وان دێ كارتێكرنەكا دیار ژێ پەیدا بیت كو بەرەف قوونەغاكا دیتر كو بشێن پشكنین و ڤەكۆلێن زانستی ژی تێدا بهێنە ئەنجام دان ل سەر ئاستێ پارێزگەها دهۆك، ئەو ژی راگەهاند كو ئێك ژ ڤان لابۆران كۆژمێ 100 ملیۆن دیناران لێ هاتینە مەزاختن و یا دیتر ژی هێشتا دێ ئامیر بۆ هێنە دابین كرن و كۆژمەكێ پتر دێ لێ هێتە مەزاختن.