لژێر چاڤدێریا سەرۆكێ هەرێما كوردستانێ (مەسعود بارزانی) حكومەتا هەرێما كوردستانێ، وەزارەتا خواندنا بلند و ڤەكۆلینێن زانستی، سەنتەرێ بیشكچی بۆ خواندنێن مرۆڤایەتی سەر ب زانكۆیا دهۆك ڤە و ب بەرهەڤبوونا سەرۆكێ زانكۆیا دهۆك پ. د. مسلح دهۆكی و پارێزگەرێ دهۆكێ (فەرهاد ئەتروشی) ئیكەمین كونفرانسێ زانستی نیڤدەولەتی لژێر ناڤ و نیشانێن (كوردستان پشتی داعش: پرسیارا ناسنامە و سنوران) هاتە ئەنجامدا و بۆ ماوەیێ دوو رۆژا ڤەكێشا ژ 23 تا 24/ 4/ 2017ێ ل هولا كونفرانسان ل زانكۆیا دهۆك.
سەرۆكێ زانكۆیا دهوك پ.د. مسلح دهوكی د گۆتنا خودا ئاماژە دا كۆ زانكۆ ئەڤرۆ یێن بووینە پر بۆ دروستكرنا پەیوەندیان دناڤبەرا جڤاك و دەستهەلاتێ دا و بووینە سەنتەرێ رێزلێنانێ بۆ كەسێن ژهەژی ل سەرانسەری جیهانێ.
سەرۆكێ زانكۆیا دهۆك گۆت ژی: زانكۆیا دهۆك شانازە ئەڤرۆ ئەڤ سەنتەرە ب ناڤێ نڤیسەرێ مەزن (ئیسماعیل بیشكچی) ڤەكری وەك رێزگرتنەك بۆ پالپێشتیا وی بۆ دۆزا مللەتێ كورد، كۆ ڤی سەنتەری ژمارەكا باش ژ بەرتۆك و ڤەكۆلینێن گرنگ ب ستویێ خوڤە گرتینە و نوكە ژی رابووینە ب وەرگێرانا پەرتۆكێن بیشكجی ژ زمانێ توركی بۆ زمانێ كوردی و ئەڤە ژی جهێ دەست خوشیێ یە.
بەرنامێ كونفرانسی ب ڤەكرنا پیشانگەهەكا گۆتنێن بیشكچی و نەخشەیێ كوردستانێ و نمایشكرنا چاپەمەنیێن سەنتەری دەستپێكر، دهەمان دەمدا كورتە فلمەك لسەر ژیانا نڤیسەر ئیسماعیل بیشكچی و تابلویا پێكڤە ژیانێ ژلایێ تیپا دهۆك یا هۆنەرێ مللی ڤە هاتنە نمایشكرن.
لرێكەفتی 23/ 4/ 2017ێ، رۆژا ئێكێ ژ كونفرانسی ب پێنچ روونشتنان هاتە پرێڤەبرن:
روونشتنا ئێكێ لسەر (سنۆرێن ناڤخۆیێ، ریفراندوم، ڤەژەنێن كارێن هەریمی) ب پشكداریا ڤان بابەتان: زانكۆ، ریفراندوم و سەرخووبوون ژلایێ نڤیسەر (ئیسماعیل بیشكچی) ڤە هاتە گۆتن، خواندنەك بۆ هەرێما كوردستانێ پشتی نەمانا داعشێ ژلایێ راوێژكارێ سەرۆكێ هەرێما كوردستانێ (هیمن هەورامی) ڤە هاتە بەحسكرن و بابەتێ پاشەرۆژا مادێ 140 پشتی داعش ژلایێ د. محەمەد ئیحسان ڤە هاتە گۆتن، دووڤدا دان و ستاندنێ دەسپێكر و پەنەل ژلایێ رێڤەبەرێ سەنتەرێ بیشكچی (د. نەشوان شكری) ڤە هاتە پرێڤەبرن.
روونشتنا دوویێ لسەر (كوردستان وەك فاكتەرەكێ بەرقەراركرنا ئێمناهیا هەرێمێ و نیڤ دەولەتی) و ب ڤان بابەتان پێك دهات: نەفت و چارەنڤیسێ كوردان ل باشۆرێ كوردستانێ ژلایێ (پ.د. ئازاد محەمەد ئەمین نەقشەبەندی) ڤە هاتە بەحسكرن، ئەزموونا دیموكراسی ل هەرێما كوردستانا عیراقێ، ئاستەنگ و ئاسۆیێن سیاسی د پاشەرۆژێ دا پشتی نەمانا داعش ژلایێ (د. حەسەن توركی) ڤە هاتە گۆتن و بابەتێ ئێمناهیا بێ دەولەت ژلایێ (دەرون رەحیم) ڤە هاتە گۆتن و دووڤدا گەنگەشە هاتە كرن و پەنەل ژلایێ (د. مزگین محەمەد حەسەن) ڤە هاتە پرێڤەبرن.
روونشتنا سیێ لسەر (كوردستان و شەرێ داعش: ڤەرێژێن جڤاكی و ناسناما نیشتیمانی) ب ڤان بابەتا پێك هاتبوو: سالوخەتێن كەسایەتیا كوردی ژ كەڤندا و نوكە (پێشمەرگە وەك نموونە) ژلایێ (پ.د. سابر عبدالله) ڤە هاتە بەحسكرن، بابەتێ كۆمەلگەها كوردستانا باشۆر دناڤبەرا ئێكگرتن و پەرتەوازیێ دا ژلایێ هەر دوو مامۆستایێن زانكۆیێ (د. موراد حەكیم و د. لەیلا ئەمیر) ڤە هاتە بەحسكرن و بیری داعش وەك مەترسی لسەر ناسنامەیا نەتەوەیا كورد ژلایێ (د. سلام عەبدالكریم) ڤە هاتە بەحسكرن و ل دووماهیێ دان و ستاندن هاتە كرن و پەنەل ژلایێ (د. كەرەڤان ئامیدی) ڤە هاتە پرێڤەبرن.
روونشتنا چوارێ لسەر (كوردستان و رەهەندێن گهورینا دیموگرافی پشتی داعش) و ب ڤان بابەتان پێك دهات: پێكهاتە و ئیتنیكی و ئاینێن نەینەوا ژلایێ (د. هیوا حاجی) ڤە هاتە بەحسكرن، بابەتێ گهورینێن جهی یێن پەنابەران دهەرێما كوردستانێ دا و كارتێكرنێن وێ یێن جیوسیاسی و بكارئینانا سیستەمێ زانیاریێن جۆگرافی ژلایێ (د. سعاد عبدالله و سەعەد سالح) ڤە هاتە بەحسكرن و هاتنا ئاوارەیان و كارتێكرنا وان لسەر گورانی دیموگرافیا باژێرێ قەلادزێ ڤە ژلایێ (د. بشتیوان شەفیق) ڤە هاتە بەحسكرن و لدووماهیی دان و ستاندن هاتەكرن و پەنەل ژلایێ (د. خەلیل مستەفا) ڤە هاتە پرێڤەبرن.
روونشتنا دووماهیێ لسەر (ناسناما كوردی و دووڤچۆنێن زمانی و ئایینی) ب ڤان بابەتان پێك دهات: كارتێكرنا داعش لسەر زمانێ كوردی و ململانا زاراڤێن كوردی بۆ ستاندار بوونێ ژلایێ (د. شێروان حسین) ڤە هاتە بەحسكرن و بابەتێ فاكتورێ ئیسلاما سیاسی و كارتێكرنا وێ لسەر بزاڤا رزگاریخوازیا كوردی ژلایێ (ماجد خەلیل) ڤە هاتە بەحسكرن و زمانێ كوردی دناڤبەرا زمانێ نەتەوەیی و ناسنامەبوونێ و هەڤركیا گولوپالێ دا ژلایێ (ژیروان سەعید) ڤە هاتە بەحسكرن و لدووماهیێ دان وستاندن هاتە كرن و پەنەل ژلایێ (د. وەجیه عەفدو) ڤە هاتە پرێڤەبەرن.
ل رۆژا دوویێ ژ كونفراسی لرێكەفتی 24/ 4/ 2017ێ ب سێ روونشتنان هاتە پرێڤەبرن:
روونشتنا ئێكێ لسەر: سێ خواندن ل دۆر كوردستانێ پشتی داعش، كۆ ئەڤ بابەتە بخوڤە دگرتن، ڤەكۆلینێن كوردی ل ویلایەتێن ئێكگرتی یێن ئەمریكا: پێداچوونەكا گوور ژلایێ (مایكل گونتەر) ڤە هاتە بەحسكرن و كورد دهاوكێشەیا هەڤریكیا هەرێمێ دا و قۆناغا پشتی داعش ژلایێ (پ.د. سەعد ناجی) ڤە هاتە گوتن وبابەتێ كورد و ئیسلامی و شەرێ كۆبانێ ژلایێ (ئیڤا ساڤلسبیرگ و سیامەند حاجی) ڤە هاتە بەحسكرن و دان و ستاندن هاتنەكرن و پەنەل ژلایێ (د. بەیار مستەفا) ڤە هاتە پرێڤەبرن.
روونشتنا دوویێ لسەر (پەیوەندیێن هەولێر- بەغدا پشتی داعش: دەلیڤێن هەڤكاریێ و مەترسیێن لێكدانێ) ب ڤان بابەتان پێك دهات: حەشدا شەعبی ژ ملیشیا بوو هێزەكا كاریگەرا دەولی ژلایێ (د. هەوار خەلیل) ڤە هاتە بەحسكرن، دەڤەرێن كوردی یێن كێشە لسەر هەیی دناڤبەرا دووهی و ئەڤرۆ دا ژلایێ (پ.ی.د سوزان كەریم) ڤە هاتە بەحسكرن و بابەتێ بنیاتێ یاسایێ مافێ چارەنڤیسێ هەرێما كوردستانێ ژلایێ (رێنجبەر جەمیل و سەعدی یەحیا) ڤە هاتە بەحسكرن و دووڤدا دان و ستاندن هاتە كرن و پەنەل ژلایێ (د. سالم جاسم) ڤە هاتە پرێڤەبرن.
روونشتنا دووماهیێ لسەر (كوردستان ژپارچەبوونێ بەرەڤ دەستنیشانكرنا چارەنڤیسی) ئەڤ بابەتە بوون: هەستێ نەتەوایەتی لدەڤ كوردان (پێشمەرگە وەك نموونە) ژلایێ (د. سۆزان ئیبراهیم) ڤە هاتە بەحسكرن و 100 سالیا سالڤەگەرا پەیمانناما سایكس- بیكو ژلایێ (محەمەد ئورپر) ڤە هاتە بەحسكرن، و فاكتەر و ئاستەنگێن رێگر ل هەمبەر سەربەخوییا هەرێما كوردستانا عیراقی ژلایێ (م. رێنجبەر شێخو و م. عەبدال جمعە) ڤە هاتە بەحسكرن و دووماهیێ دان و ستاندن هاتنە كرن و پەنەل ژلایێ (د. هۆزان سلیمان) ڤە هاتە پرێڤەبرن.
ل دووماهیێ باوەرنامە لسەر پشكدار بوویان هاتنە بەلاڤەكرن و پەیڤا سەرۆكێ زانكۆیا دهۆك پ.د مسلح دهۆكی هاتە خواندن و مێڤانێن كونفرانسی بەرەڤ گەشتەكا سرۆشتێ دهۆكێ ڤە چوون بوو (تلفریكا زاویتە) و سەرەدانا رێڤەبریا رەوشەنبیری و هونەری ل دهۆكێ كر و گەشتەك بۆ موزخانا دهۆك كر.
راگەهاندنا زانكۆیا دهۆك: هەلز عەلی سەلیم