سەرۆكاتیا زانكۆیا دهۆك ئاهەنگا ئیمزاكرنێ بۆ پەرتووكا (پێشمەرگە ل كۆبانێ) یا نڤیسەر هەلز عەلی سەلیم ل رۆژا 1/8/2018 ل هۆلا خانی ل سەرۆكاتیا زانكۆیا دهۆك سازكر.
د رێورەسمان دا كو سەرۆكێ زانكۆیا دهۆك و چەند مامۆستایێن زانكۆیێ و فەرماندێن وان پێشمەرگێن پشكداری ل داستانا كۆبانێ دا كرین و چەند نڤیسەرێن دەڤەرێ بەرهەڤ ببوون، لیوا عەبدولقەهار دوسكی فەرماندێ ئێكەم كاروانێ پێشمەرگێ بەرەف كۆبانێ ڤە چووی پەیڤەك پێشكێش كر و تێدا بەحسێ چەند هەلویست و قووناغێن شەرێ كۆبانێ كرن و هەروەسا سوپاسیا نڤیسەرا پەرتووكێ ژی كر بۆ دكیومێنت كرنا ڤێ داستانا پێشمەرگەی ل كۆبانێ تۆماركری.
نڤیسەرا پەرتووكێ كو فەرمانبەرا زانكۆیا دهۆكە بەحسێ چاوانیا ئامادەكرنا پەرتووكێ كر و ئەو زەحمەتا ب كۆمكرنا پێزانینان ڤە بری و هەروەسا نڤیسەر بەدرخان زاویتەی ژی كو یێ هاریكاربوو دگەل ل نڤیسینا ڤێ پەرتووكێ بەحسێ گرنگیا دكیومێنت كرنا ڤان جۆرە داستانان كر، هەروەسا نڤیسەرا پەرتووكێ ئیمزا ل سەر پەرتووكێ كر و پێشكێشی مێڤانان كر.
سەرۆكێ زانكۆیا دهۆك پرۆفیسۆر د. مصلح دهۆكی لۆگۆیێ زانكۆیا دهۆك پێشكێشی لیوا عەبدولقەهار دوسكی فەرماندێ ئێكەم كاروانێ پێشمەرگەی بۆ كۆبانێ و هەروەسا نوونەرێ سەرۆك بارزانی بۆ كۆبانێ كر و دەستخۆشی ل قارەمانیا وی پێشمەرگەی كر یێن ل كۆبانێ داستانێن قارەمانانە تۆماركرین و پشتەڤانیا زانكۆیا دهۆك ژی دیاركر بۆ دكیومێنت كرنا داستانێن پێشمەرگێ قەهرەمان كو ل هەر پارچەكا كوردستانێ هاتبنە تۆماركرن.