Iraqi Parliament deputy visits UoD

جێگرێ‌ سەرۆكێ‌ جڤاتا نوینەرێن عیراقا فیدرال د. بەشیر حەداد دگەل شاندەكێ‌ پەرلەمانتارێن پارێزگەهێن دهۆك و میسل و هەولێر ل رۆژا 2/12/2018 سەرەدانا سەرۆكاتیا زانكۆیا دهۆك كر و ژلایێ‌ سەرۆكێ‌ زانكۆیێ‌ پ. د. مصلح دهۆكی و هاریكارێن سەرۆكێ‌ زانكۆیێ‌ پێشوازی لێ‌ هاتە كرن.
د روینشتنەكی دا د. بەشیر حەداد بەحسێ‌ مەبەستا ڤێ‌ سەرەدانێ‌ كر بۆ پارێزگەها دهۆكێ‌ و دیاركر كو ئەڤ سەرەدانە دچارچووڤێ‌ سەرەدانێن سەرۆكاتیا پەرلەمانی دایە بۆ باژێرێن جودا جودا یێن عیراقێ‌، هەروەسا ئاماژە دا وێ‌ چەندێ‌ كو سەرەدانا زانكۆیا دهۆك كریە چونكو ئەركێ‌ زانكۆیا دهۆك ل وەرگرتنا قوتابیێن ئاوارە قورس تر لێ‌ هاتیە و بارەكێ‌ گران كەفتیە سەر ملێن زانكۆیا دهۆك.
جێگرێ‌ سەرۆكێ‌ جڤاتا نوینەرێن عیراقا فیدرال هەروەسا ئاماژە دا وێ‌ چەندێ‌ كو بریارەك هەبوو ئەو جهێن كریارێن تیرۆرستی هەین و ژیان لێ‌ یا ب زەحمەت بیت دێ‌ جهێن ئەلتەرناتیڤ بۆ هێنە دیتن و ل نێزیكترین زانكۆ قوتابیێن وان هێنە وەرگرتن، ژ بەر ڤێ‌ چەندێ‌ ژی گەلەك قوتابیێن زانكۆیێن میسل پەنا بریە بەر پەلەمانێ‌ عیراقێ‌ داكو ل زانكۆیێن هەرێما كوردستانێ‌ بهێنە وەرگرتن، ئاشكرا ژی كر كو لژنەك ب سەرۆكاتیا د. بەشیر حەداد ژ پەرلەمانێ‌ عیراقێ‌ پێك هاتیە بۆ دیفچوونا ئاریشا ڤان قوتابیان و بەرەی چەندێ‌ ئەڤ لژنە یا ل گەل وەزارەتا خواندنا بلندا عیراقا فیدرال كۆم بووین و ل گەل وەزارەتا خواندنا بلند و ڤەكۆلینێن زانستی یا حكومەتا هەرێما كوردستانێ‌ ژی كۆمبوون ل دۆر ڤی بابەتی ئەنجام داینە و وەزارەتا خواندنا بلندا هەرێمێ‌ بۆ ڤێ‌ لژنێ‌ دیاركریە كو ل دیف شیانێن زانكۆیا ئەڤ قوتابیێن ڤێ‌ دەڤەرێ‌ و زانكۆیێن میسل دخینن دێ‌ هێنە وەرگرتن.
سەرۆكێ‌ زانكۆیا دهۆك پ. د. مصلح دهۆكی دیاركر كو د ڤان سالێن بۆری زانكۆیا دهۆك پتر ژ هزار قوتابیێن ئاوارە وەكو مێڤانداری وەرگرتینە، گۆت ژی بەری نوكە شاندەكێ‌ پەرلەمانێ‌ عیراقێ‌ ل سەر ڤی بابەتی سەرەدانا زانكۆیا دهۆك كریە و زانكۆیا دهۆك ڤان قوتابیان ل دەواما ئێڤاری دێ‌ وەرگریت و هەمی ئامادەكاری هاتینە كرن بۆ دەست ب خاندنێ‌ بكەن، بەلێ‌ حەتا نوكە چ لایەكی خەرجیێن وان یێن دارایی ب ستۆیێ‌ خۆڤە نەگرتیە.
د. بەشیر حەداد دیاركر كو دڤێت وەزارەتا خواندنا بلندا عیراقی خەرجیێن ڤان قوتابیان ب ستۆیێ‌ خۆڤە وەربگریت داكو ئەڤ قوتابییە بشێن بەردەوامیێ‌ بدەنە خواندنا خۆ و كارێ‌ ڤێ‌ لژنێ‌ ژی دێ‌ یێ‌ بەردەوام بیت هەتا كو بابەتێ‌ ڤان قوتابیان دهێتە چارەكرن.