ل رۆژا 23/6/2019 پەیمانگەها چارەسەریا دەروونی و چارەسەریا تراومایێ ل زانكۆیا دهۆك كۆنفرانسێ نێڤدەولەتی یێ دووێ (دیدارا رۆژهەلات و رۆژئاڤا) ل دۆر لێكگوهورین و تێكهەل بوون د ناڤبەرا شێوازێن چارەسەریا دەروونی و چارەسەریا ترۆمایا جیهانی و ناڤخۆیی دناڤبەرا وەلاتێن رۆژهەلاتا ناڤین و وەلاتێن رۆژئاڤا دا، ل هۆلا كۆنفرانسان ئەنجام دا.
سەرۆكێ زانكۆیا دهۆك پ. د. مصلح دهۆكی د پەیڤەكی دا گۆت ئەڤ كۆنفرانسێ نێڤدەولەتی یێ دووێ (دیدارا رۆژهەلات و رۆژئاڤا) ل زانكۆیا دهۆك پشكەكە ژ چالاكیێن ڤەكرنا دەرگەهێن نێڤدەولەتی بۆ ساخلەمیا دەروونی، كو ئارمانجا سەرەكی لێكگوهورینا زانیاریانە د ناڤبەرا بسپۆرێن دەروونی و كەسانێن چارەسەریا تراومایێ ل رۆژهەلات و رۆژئاڤا، هەروەسا دیاركر كو ل زانكۆیا دهۆك ئەم پشتەڤانیا ڤان جۆرە تێكهەلیا دكەین ژ پێخەمەت لێكگوهورینا سەربۆران د ناڤبەرا پشكدارێن كۆنفرانسی، هیڤیی ژی خواست كو ئەڤ كۆنفرانسە بشێت ژینگەهەكا نوی یا لێكگەهشتنێ د ناڤبەرا بسپۆرێن دڤی بیاڤی دا پەیدا بكەت.
پارێزگەرێ دهۆكێ ب وەكالەت بەهزاد عەلی ئادەم د پەیڤەكی دا بناڤێ كارگێریا پارێزگەهێ دەستخۆشی ل پەیمانگەها چارەسەریا دەرونی و چارەسەریا تراومایێ كر بۆ رێكخستنا ڤی كۆنفرانسی دیار ژی كر كو حكومەتا ئەلمانیا ل پێنچ سالێن دەربازبووی گەلەك هاریكاریا خەلكێ پارێزگەها دهوكێ كریە ب تایبەتی یا ئاوارە و پەنابەران، پەیمانگەها چارەسەریا دەرونی و چارەسەریا تراومایێ ژی ب پشتەڤانیا حكومەتا ئەلمانیا هاتیە ئاڤاكرن بۆ چارەسەریا نەخوشیێن دەروونی ئەڤە بخۆ ژی وێ چەندێ دسەلمینیت كو خەلك و حكومەتا ئەلمانیا گرنگیێ ددەنە دەڤەرێ.
د. مەمو فەرحان جێگرێ راگرێ پەیمانگەهێ دیاركر كو ئەڤە كۆنفرانسێ دووێ یە دهێتەكرن و ل بەرە هەر سال بهێتە كرن ل ژێر درووشمێ دیدارا رۆژهەلات و رۆژئاڤا، كو ئەڤ پەیمانگەهە نموونەیە ل رۆژهەلاتا ناڤەراست هەمیێ دەمێ قوتابی دەربچیت دێ بیتە چارەسەریێ دەرونی و دێ شێن كلینیكا ڤەكەن، 80% مامۆستایێن ئەلمانی وانا ددەنێ 80% خواندن ب زمانێ ئینگلیزی یە.
كۆنفرانسێ دیدارا رۆژهەلات و رۆژئاڤا ب ئامادەبوونا نوینەرێن دوازدە وەلاتێن بیانی وەكو ئەلمانیا، فرەنسا، كەنەدا، ڤێتنام، كوریا، توركیا، ئیران و بریتانیا و بۆ ماوێ دوو رۆژان یێ بەردەوام بوو، كو قونسلا ئەلمانیا و چەند پەلەمانتارێن ئەلمانی ژی تێدا د بەهەڤ بوون.