ل رۆژا 26/2/2020 رێڤەبەرێ ئاژانسا ئەمریكی بۆ گەشەپێدانا نێڤدەولەتی روبرت بیركنس سەرەدانا زانكۆیا دهۆك دا و دگەل سەرۆكێ زانكۆیێ پ. د. مصلح دهۆكی پرۆژێ دووبارە پاراستنا كەلتوری ل دەڤەرا دەشتا نەینەوا راگەهاندن.
د پەیڤەكی دا سەرۆكێ زانكۆیا دهۆك گۆت ئەڤ پرۆژە پشكەكە ژ بزاڤێن مە بۆ ئاسایی كرنا ژیانا برایێن مە ژ كێمینەیێن جودا جودا ئەوێن ب ئاشتی ئەم پێكڤە دژیاین ل ڤی وەلاتی هەر ژ هزاران سالایە، بەلێ ژیانا وان ژ نیشكێ ڤە هاتە گوهورین ل خزیرانا 2014 پشتی هێرشا درندانەیا تیرۆرستێن داعش، كو وان نە بتنێ ل سەر بنیاتێ نەژادی هوڤانەیێن خۆ ئەنجام داینە بەلكو درندەترین تاوان ب دژی مروڤاتیێ كرینە ئەو ژی رابووینە ب كوشتنا ب كۆم و دویركرنا ژن و زاروكا و دەربەدەركرنا كروان وان ل سەر ناسنامێ.
هەروەسا گۆت نوكە و پشتی ژ ناڤچوونا داعش ئەڤ پرۆژە بۆ دووبارە ڤەگەراندنا شێوازێ ژیانێ یە ل ڤان دەڤەرا كو دێ ل گەل ئاژانسا ئەمریكی بۆ گەشەپێدانا نێڤدەولەتی و هەروەسا ب هەڤپشكی دگەل زانكۆیێن بوردو و نوتردام و ئەندیانا ل وێلایەتێن ئێكگرتی یێن ئەمریكی و رێكخراوا سبری ل سوید هێتە ئەنجام دان.
ژ لایێ خۆڤە رێڤەبەرێ ئاژانسا ئەمریكی بۆ گەشەپێدانا نێڤدەولەتی روبرت بیركنس گۆت كوردستان و عیراق یا دەولەمەندە ب هەبوونا كەمینەیێن ئولی و نەتەوەی و ئەو وەلاتێن ڤان كەمینەیا د پارێزن هەمی دەما د جێگیر و پاراستی نە، دیار ژی كر كو هاریكاریێن حكومەتا ئەمریكی د بەردەوام بن بۆ وان دەڤەرێن كەفتینە بەر زیانێن داعش.
ئاشكرا ژی كر كو 350 ملیۆن دولار هاتینە تەرخان كرن بۆ بەرنامێن چارەسەركرنا كارەساتێن جینوساید و كۆمكۆژیێ ب هەڤكاری دگەل سەد سازیێن ناڤخۆیی و رێكخراوێن نێڤدەولەتی بۆ هاریكاری كرنا كەمینەیێن ئاینی و نەژادی ل كوردستانێ و عیراقێ، هەروەسا گۆت هەڤكاری كرن بۆ بجهئینان و ئەنجامدانا ڤەكۆلینان بۆ ناساندنا ئەو زیانێن گەهشتینە ڤان دەڤەرا ژ بەر هێرشێن داعش دبیاڤێ زیانێن رووەكی و گیانەوەران ڤە.