تۆرا دەرچوویێن زانكۆیا دهۆك د رێورەسمەكی دا ل رۆژا 8/5/2018 ل سەنتەرێ رەوشەنبیری و جڤاكی یێ زانكۆیێ ب ئامادەبوونا چەند دەرچوویێن زانكۆیا دهۆك هاتە راگەهاندن.
سەرۆكێ زانكۆیا دهۆك پرۆفیسۆر د. مصلح دهۆكی دیاركر كو راگەهاندنا ڤێ تۆرێ پێنگاڤەكا گرنگە زانكۆیا دهۆك ب ئاراستەیا پێشڤەچوون و وەرارێ د هاڤێژیت، چونكو چ دەما زانكۆیا دهۆك ژ كاروانێ پێشكەفتنێ نەراوەستیایە و بەردەوام د گەشەكرنێ دایە، گۆت ژی هەتا نوكە زانكۆیا دهۆك 22 گەرێن دەرچوونێ هەلگرێن باوەرنامێن بەكالۆریۆسێ كو نێزیكی 30 هزار قوتابیانە، ب باوەرنامە ئێخستینە و پێشكێشی جڤاكی و دام و دەزگەهێن حكومی و تایبەت كرینە كو ئەڤە ژی هژمارەكا ئێكجار زۆرە و شانازیەكا مەزنە بۆ زانكۆیا دهۆك كو سالانە ڤی خەلاتی ددەتە مالباتێن دەرچوویان و كور و كچێن وان ب باوەرنامە دئێخیت و دبنە هەلگرێن پەیاما زانست و زانینێ.
هاریكارێ پارێزگارێ دهۆكێ ئیسماعیل محەمەد ئەحمەد د پەیڤەكی دا خۆشحالیا پارێزگەهێ ب راگەهاندنا ڤێ تۆرێ دیاركر كو دێ خزمەتا دەرچوویان كەت، ژ لایێ خۆڤە رێڤەبەرێ سەنتەرێ گەشەپێدانا كاری ل زانكۆیا دهۆك شڤان خەلیل د پرێزنتێشنەكی دا دیاركر كو مەرەم ژ راگەهاندنا ڤێ تۆرێ ئەوە پشتی قوتابی ژ زانكۆیێ دەردچن ب ئێكجاری ژ زانكۆیێ نەهێنە ڤەقەتیان و پەیوەندی هەر دگەل زانكۆیێ هەبیت، هەروەسا ئەڤ تۆرە دەرگەهەك بیت هەردەم دەرچوویێن زانكۆیا دهۆك خۆ تێدا ببینن و ب رێكا ڤێ تۆرێ دەرچووی هەر زانكۆیێ ب مالا خۆ بزانن و هەست ب وێ چەندێ نەكەن كو ڤالاتیەك یا پەیدابووی و ژ زانكۆیێ هاتینە ڤەقەتیان، هەر دەرچوویەك دێ هێتە تۆمار كرن ل ڤێ تۆرێ و دێ ئەكاونتەك بۆ هێتە چێكرن و ئەو دەرچووی دێ (cv) و پێزانینێن خۆ د وی ئەكاونتی دا بەلاڤ كەن و بەردەوام (ئەبدێت) كەن، كو ئەڤە ژی دێ یا هاریكار بیت بۆ دیتنا دەلیڤێن كاری و پشكداری كرنێ د خۆلێن پێشخستنێ دا.
هەر د رێورەسمان دا پەنەلەك هاتە پێشكێش كرن ل دۆر بازارێ كاركرنێ و ب پشكداریا چەند مامۆستایێن تایبەتمەد و پسیارێن ئامادەبوویان ئەڤ بابەتە هاتە گەنگەشە كرن.
ل دووماهیا رێورەسمان ژی خەلاتێن دەستپێكرنا ڤێ تۆرێ ل سەر هندەك دەرچوویێن زانكۆیا دهۆك هاتنە بەلاڤ كرن ئەوێن نوكە شین دەستێن وان ل ناڤ رێڤەبەریێن حكومی و كەرتێ تایبەت د بەرچاڤن.