رێڤەبەریا خزمەتێن پێزانینان ل زانكۆیا دهۆك و ب هەڤكاری ل گەل رێڤەبەریا راگەهاندنێ و ب پشتەڤانیا هاریكارێ سەرۆكێ زانكۆیا دهۆك بۆ كاروبارێن زانستی و خواندنا بلند د. لوقمان هادی ل رۆژا 4/2/2019 وورك شۆپەك بۆ بەرپرسێن ویب سایتێن زانكۆیێ و راگەهاندنێ ل سەنتەرێ رەوشەنبیری و جڤاكی یێ زانكۆیێ ئەنجام دان.
د ڤی وورك شۆپی دا كو هاریكارێ سەرۆكێ زانكۆیێ بۆ كاروبارێن زانستی و خواندنا بلند بەرهەڤ ببوو د پەیڤەكی دا گۆت دڤێت پتر گرنگیێ بدەینە كارێ ویبسایتی و راگەهاندنێ داكو ئەو كارێ ل زانكۆیێ دهێتە كرن بهێتە بەرچاڤ كرن و داتا و پێزانینێن ل دۆر زانكۆیێ ل ویبسایتی بهێنە بەلاڤ كرن.
بەرپرسێ دەنگوباسێن زانكۆیێ ل رێڤەبەریا راگەهاندنێ رەمەزان شەعبان د وورك شۆپی دا بابەتەك ل دۆر چاوانیا نڤیسینا دەنگوباسی پێشكێش كر و تێدا ب درێژی بەحسێ چاوانیا نڤیسینا دەنگوباسی كر ب تایبەت بۆ ویبسایتێن فەرمی كا چاوا دەنگوباس دهێنە نڤیسین و هەروەسا بەحسێ وان خالان ژی كر یێن كو پێدڤیە ل بەرچاڤ بهێنە وەرگرتن ل دەمێ نڤیسینا دەنگوباسی ل زانكۆیێ و دووپاتی ل سەر وێ چەندێ ژی كر كو یا پێدڤیە دەنگوباسێ زانكۆیێ یێ پرۆفێشنال بیت چونكو زانكۆ ناڤەندەكا ئەكادیمی یا پێگەهاندنێ یە.
رێڤەبەرێ رێڤەبەریا خزمەتێن پێزانینان ل زانكۆیا دهۆك كاروان جەعفەر د بابەتەكی دا بەحسێ لایەنێ هونەری یێ ویبسایتی كر و دیاركر بۆ بابەتێ رێزبەندیێن زانكۆیان پشتبەستنەكا مەزن ل سەر ویبسایتی دكەن لەورا یا پێدڤیە گرنگیەكا زێدەتر ژلایێ كۆلیژ و مامۆستایێن زانكۆیا دهۆك ب ویبسایتی بهێتە دان.
كاروان جەعفەر ئەو چەند ژی دیاركر كو هەر كۆلیژەكی لینكێ خۆ یێ تایبەت یێ هەی ل ویبسایتێ فەرمی یێ زانكۆیا دهۆك و كۆلیژە بخۆ دشێن داتا و پێزانین و دەنگوباسێن خۆ ل وی لینكی ب دابەزینن.