A meeting had been held between Uod and the school teaching of Duhok province concerning the plannings of the educational process
May 14, 2019, 1:03 p.m.

سەرۆكاتیا زانكۆیا دهۆك و رێڤەبەریا گشتی یا پەروەردا پارێزگەها دهۆكێ‌ ل رۆژا 12/5/2019 ل دۆر پلانێن پرۆسا خاندنێ‌ ل دەڤەرێ‌ و وەرگرتنا قوتابیان و ڤەكرنا پشكێن زانستی ل دویف پێدڤیا پەروەردێ‌ گەنگەشەكرن.

د كۆمبوونێ‌ دا كو هاریكارێ‌ سەرۆكێ‌ زانكۆیا دهۆك بۆ كاروبارێن زانستی و هەروەسا راگرێن كۆلیژێن پەروەردا بنیات ئامێدیێ‌ و راگرێ‌ پەروەردا ئاكرێ‌ و پەروەردا بنیات بەرهەڤ ببون، سەرۆكێ‌ زانكۆیا دهۆك بەحسێ‌ هەماهەنگیا پەروەردێ‌ و زانكۆیا دهۆك كر و گۆت زانكۆ و پەروەردە تەمامكەرێن ئێكن.

سەرۆكێ‌ زانكۆیا دهۆك هەروەسا بەحسێ‌ ڤەكرنا چەند پشكێن نوی كر ل كۆلیژا پەروەردا بنیات ئامێدیێ‌ و كۆلیژا پەروەردا ئاكرێ‌ كو پشكا زانستان بهێتە ڤەكرن ل ڤان كۆلیژان و مامۆستایێن خودان باوەرنامێن ماستەر و دكتۆرا بهێنە سەر میلاكێ‌ خاندنا بلند، دیسا پشنیازەك بۆ وەزارەتا پەروەردێ‌ بهێتە كرن كو تاقیكرنێن خولا دووێ‌ قووناغا دوازدێ‌ ئامادەیی بهێنە پێش داكو زیتر ژ سالێن بەرێ‌ ناڤێن وان ل زانكۆ و پەیمانگەهان بهێنە راگەهاندن.

 

رێڤەبەرێ‌ گشتی یێ‌ پەروەردا پارێزگەها دهۆكێ‌ عمر عەلی سوپاسیا سەرۆكێ‌ زانكۆیا دهۆك كر داخازا بەردەوام بون و خۆرتكرنا پەیوەندیێن هەردولا كر و بەحسێ‌ رەوشا پەروەردێ‌ كر ل پارێزگەها دهۆكێ‌ و كێماسیێن وان، دیسا بەحسێ‌ ڤەكرنا پشكا زانستان ل ئاكرێ‌ و ئامێدیێ‌ ل سەر داخازا رێڤەبەرێن پەروەردا ئامێدیێ‌ و رێڤبەرێ‌ پەروەردا ئاكرێ‌ هاتە كرن، ڤەگوهاستنا مامۆستایێن خودان باوەرنامێن بلند بۆ سەر میلاكێ‌ خواندنا بلند و دانانا لژنەكا هەڤپشك دناڤبەرا زانكۆیا دهۆك و پەروەردا دهۆك ژ بۆ پتر هەماهەنگی.