Memory of Establishing the Kurdistan state

لژێر چاڤدێریا سەرۆكێ‌ زانكۆیا دهۆك و پشكا مێژوویێ‌ ل كولیژا زانستێن مرۆڤایەتی رابوون ب ساخكرنا 71 سالیا دامەزراندنا كۆمارا كوردستان ب بەرهەفبوونا مامۆستا و قۆتابیێن زانكۆیێ‌ و چەندین رەوشەنبیر و سیاسیێن دەڤەرێ‌. 

د. هۆزان سلێمان میرخان سەرۆكێ‌ پشكا مێژوویێ‌ ل زانكۆیا دهۆك گۆت: ئەركەكە لسەر مللێن مە خو ل هەموو بیرەوەریێن نەتەوەیی و نیشتیمانی بكەینە خودان، كۆ ئەڤرۆ بیرەوەریەكا دیرۆكییا گرنگە د بزاڤا رزگاریخوازا كوردستانێ‌ دایە، ئەو ژی بورینا 71 سالیا دامەزراندنا كۆمارا كوردستانێ‌ یە لسەر دەستێ‌ سەركردە قازی محەمەد، لەوا مە ئەڤ بیرەوەریا گەلەك پیرۆز ساخكرە ڤە.

سەرۆكێ‌ پشكا مێژوویێ‌ ل زانكۆیا دهۆك گۆت ژی: ل 22ێ‌ كانوونا دوویێ‌ ل سالا 1946ێ‌ ئەڤ كۆمارە هاتە دامەزراندن ب ناڤێ‌ كوردستان، كۆ تا نوكە چەندین كەس وەسا هزر دكەن كۆ بناڤێ‌ كومارا مهاباد بوویە و ئەڤە خەلەتیەكا مەزنە ددەرهەقێ‌ كومارا كوردستاندا دئێتەكرن.

ڤێ‌ بیرەوەرێ‌ چەندین پەنەلێن جودا بخوە ڤە گرتن لژێر ناڤێ‌ (كۆمارا كوردستان روودانەكا گرنگ و دیارە ددیرۆكا بزاڤا نەتەوەیی و رزگاریخوازا كوردی دا) كۆ ئەڤ پەنەلە هاتە پێشكێشكرن ژلایێ‌ (حەسەن شەرەفی) جێگرێ‌ سكرتێرێ‌ پارتی دیموكراتی كوردستان/ ئیران، و (د. حەسەن كەریم) مامۆستایێ‌ زانكۆیا سەلاحەدین و (د. هۆزان سلێمان) مامۆستایێ‌ زانكۆیا دهۆك و ژلایێ‌ مامۆستایێ‌ زانكۆیا دهۆك (د.سەعید خودیدایی) ڤە هاتە پرێڤەبرن و دگەل نیمایشكرنا چەندین وێنەیێن كۆمارێ‌ و كورتە فیدیویێن لسەر وی دەمێ‌.

راگەهاندنا زانكۆیا دهۆك: هەلز عەلی سەلیم