A workshop about Anfal at UoD

ب بەرهەفبوونا سەرۆكێ‌ زانكۆیا دهۆك پ.د. مسلح دهوكی و چەند مامۆستایێن زانكۆیی و كەسێن پسبور 29 سالیا بیرەوەریا ئەنفالان ل ژلایێ‌ سەنتەرێ‌ بیشكجی بۆ ڤەكۆلینێن مروڤایەتی ڤە ل هۆلا سەنتەرێ‌ رەوشەنبیری و جڤاكی ل زانكۆیا دهۆك هاتە ساخكرن و چەندین تەوەر بخوڤە گرتن ئەو ژی (ئەنفالا بەهدینان لدووڤ تیورا (Raul Hilberg) سێ‌ پێنگاڤێن قركرنێ‌) ژلایێ‌ د. سالم جاسم ڤە هاتە بەحسكرن، و بابەتێ‌ (بكارئینانا جەكێ‌ كیمیایی دئەنفالاندا) ژلایێ‌ م. زۆزان ناسر ڤە هاتە شرۆڤەكرن و بابەتێ‌ (دووتنا جیهانێ‌ بۆ ئەنفالان لدووڤ تیورا كۆنستراكتیڤی) ژلایێ‌ قۆتابی كوردستان نەبی ڤە هاتە بەحسكرن و لدووماهیێ‌ بابەتێ‌ (رەوشا ژنێ‌ دئەنفالاندا) ژلایێ‌ قوتابی ئیمان نوعمتن ڤە هاتە بەحسكرن.

د. نەشوان رێڤەبەرێ‌ سەنتەرێ‌ بیشكجی بۆ ڤەكۆلینێن مروڤایەتی گۆت: ل شەڤا 22-23 ێ‌ شوباتا سالا 1988ێ‌، ئۆپەراسیونا ئەنفالا وەك پرۆسا جینوسایدكرنا كوردان ژلایێ‌ رژێما بەعسا نافچوویێ‌ ڤە دەستپێكر، ئەڤ پروسە هەشت قۆناغا بوون، ل هەشت دەڤەرێن جوكرافی یێن جودا تا 6ێ‌ ئیلونا سالا 1988ێ‌ یا بەردوام بوو.

 د. نەشوان گۆت ژی: پتر ژ پێنچ هزار گوندان هاتینە خرابكرن و 182000هەولاتی ب كوم و كت ژ ژن و زارۆك و پیر و گەنجێن كوردان هاتینە كوشتن، و لسەر ڤی دەمی ژیدا مە جینوسایدا كوردێن شنگالێ‌ ب رون و ب ئاشكەرایی دیت، لەوا جینوسایدكرنا وان فەرمانێن كوردان ب چاڤ دیتین گرنگە بكەفنە بەر بەحسكرن و ژلایێ‌ نیڤدەولەتی ژی ڤە پتر گرنگی پێ‌ بهێتەدان داكو مافێ‌ مللەتێ‌ كورد نەئێتە خوارن.

د. سالم جاسم، مامۆستایێ‌ زانكۆیا دهۆك گۆت: هەر تشتەكێ‌ بیتە جینوساید دڤیت ئەم بزانین كا بۆچی جینوسایدە، لەوا گرنگە ئەم سەحكەینە دیرۆكێ‌ چ روودایە و جوادهیەكێ‌ دناڤبەرا روودانێن كوشتن و ژناڤبرنێ‌ دا بكەین، كۆ تیورا من بەحس لێكری دبیژیت جینوساید دسێ‌ قۆناغاندا دەرباس دبیت ئەو ژی (دێ‌ چەوا گرۆپی ژناڤبەیی، دیسان دێ‌ چەوا وی گرۆپی گری و كۆم كەیی و ژناڤبەیی و لدووماهیێ‌ ژی ژناڤبرنا وان ب چ رێكە).

د. سالم جاسم گۆت ژی: ئەڤ سێ‌ پێنگاڤە دئەنفالێن دژی كورداندا هاتینە بكار ئینان و ئەنفالا كوردان بەری سالا 1988ێ‌ بوویە لێ‌ وەك پرۆژەكێ‌ رێكخستی هاتە بكارئینان، لەوا ئەنفالا كوردان ژلایێ‌ زانستی و ئەكادیمی ڤە دبیتە جینوساید.

راگەهاندنا زانكۆیا دهۆك: هەلز عەلی سەلیم