UoD's 22 Graduation ceremony

(پ.د. مسلح محەمەد سەعید دهۆکی)، سەرۆکێ زانکۆیا دهۆک دپەیڤا خودا گۆت:" ئاهەنگا دەرچوونا گەرا 22 یا قوتابیێن بەکالوریۆسێ یێن زانکۆیا دهۆک د دەمەکی دایە کو وەلاتێ مە یێ بەرەف رۆژەکا دیرۆکی یا گرنگ ڤە دچیت ئەو ژی رۆژا 25 ئەیلولێ یە، رۆژەکە کو دێ چارەنڤیسێ گەلێ مە تێدا دیار بیت، ئەو چارەنڤیسێ کو ب درێژاهیا دیرۆکێ گەلێ مە خەون پێڤە ددیتن، کو دێ بەرەف ریفراندۆمێ چین بۆ سەرخوەبوونا کوردستانێ، لەورا ئەڤ گەرا دەرچوونێ یا 22 دێ گەرا (بەلێ بۆ ریفراندومێ) بیت، داکو ئەم هەمی هاندەر بین ژ بۆ سەرکەفتنا ڤێ پرۆسێسا چارەنڤیسساز".
سەرۆکێ زانکۆیا دهۆک دهۆک گۆت ژی:" زانکۆیا دهۆک هەردەم کار کریە و دێ یا بەردەوام بیت ژ بۆ پێگەهاندنا بەرەبابێن نوی و گەنجێن ڤی وەلاتی داکو خزمەتا گەل و وەلاتێ خۆ بکەن، ببنە ئاڤاکەرێن ڤی وەلاتی، چونکو د ڤی دەمی دا پێدڤیە هەر کەس و لایەنەک یێ هاریکار بیت د بەرەف پێش برنا سازیێن ڤی وەلاتی و ڤان سازیان بکەینە سازیێن دەولەتێ و بکەینە شەنگستە و وەلاتێ خۆ ل سەر ئاڤا بکەین داکو دەمێ دەولەت دهێتە راگەهاندن ئەم د بەرهەڤ بین و مە سازیێن دەولەتێ هەبن".
د. مسلح محەمەد سەعید خویاکر:" دڤێ گەرا دەرچوونێ دا زانکۆیا دهۆک دێ (2765) هەلگرێن باوەرنامێن بەکالوریۆسێ د خولا ئێکێ دا د (60) بسپۆریێن جودا دا پێشکێشی ڤی وەلاتی کەت، کو ئەڤە بۆ زانکۆیا دهۆک جهێ سەرفەرازیێ یە و زانکۆ ل هەمبەری وەلاتی و مالباتێن ڤان قوتابیان هەست ب شانازیێ دکەت، کو ئەڤ هژمارا زۆر یا قوتابیان پێگەهاندینە و ژ قووناغا خواندنێ پێشخستینە بۆ قووناغا کارکرنێ و خزمەت کرنا وەلاتی ل هەردوو کەرتێن حکومی و تایبەت دا".
دهۆکی پتر بەحسکر:" ڤان دەرچووییان چار سالێن خواندنێ و ل هندەک کۆلیژان پێنج سال و شەش سال ل گەل مە دەرباز کرینە، دبیت ئەڤ سالێن هەنێ بۆ زانکۆیا دهۆک بێی ئاستەنگ نە بۆریبن، چ ژ بەر وێ قەیرانا دارایی یا ب سەر وەلاتێ مە دا هاتی و چ ژی ژ بەر وی شەرێ رێکخراوا تیرۆرستی (داعش) یێ کو ب سەر وەلاتێ مە دا هاتی، کو ڤان هەردوو بۆیەران کارتێکرن ل گەلەک سەکتەرێن ژیانێ ل ڤی وەلاتی کریە و زانکۆیا دهۆک ژی تێرا خۆ دبیت زیانێن ڤان کاودانان گەهشتبنێ، بەلێ ژ بەر خەمخۆریا حکومەتا هەرێما کوردستانێ و مامۆستا و ستافێ زانکۆیێ بۆ ئێک رۆژ ژی دەوام ل زانکۆیا دهۆک نەهاتیە راوستاندن، بەلکو رۆژ بۆ رۆژێ بەرەف پێش دچیت، کو ئەڤە ژی خالەکا دیترە ئەم وەکو زانکۆیا دهۆک شانازیێ پێ دبەین، بەروڤاژی ڤان کاودانان ئەم پتر هان داین ژ بۆ خزمەت کرنا وەلاتی، چونکو ڤی وەلاتی پتر هەر دەمەکی پێدڤی ب خزمەتا هەمی لایەنانە".
پروڤیسور مسلح دهۆکی راگەهاند": زانکۆیا دهۆک بۆ هەر کاودانەکی پلان و بەرنامە و رێکارێن خۆ یێن هەین، ل گەل دەربەدەربوونا وێ هژمارا زۆر یا خەلکێ مە ل کوردستانێ کو جه و وارێن خۆ بجه هێلاین و قەستا دەڤەرێن ئارامێن هەرێما کوردستانێ کرین کو ڤان کارەساتان لایەنێ دەروونی یێ گەلەک کەسان یێ تێک دایی و ب تایبەت ئەوێن ژ لایێ تیرۆرستێن داعش ڤە هاتینە گرتن و جارەکا دی ژلایێ پێشمەرگێن قەهرەمان ڤە هاتینە رزگار کرن، ژ بۆ ڤێ چەندێ زانکۆیا دهۆک و ژ ئەنجامێ ماندیبوون و هەماهەنگی و کارێ دوو سالان یێ سەرۆکاتیا زانکۆیا دهۆک ل گەل وەزارەتا زانست یا ئەلمانی پەیمانگەها چارەسەرکرنا دەروونی و تراومایێ هاتە ڤەکرن کو دبیت ئێکەم پەیمانگەه بیت ل دەڤەرێ هەمیێ بۆ چارەسەرکرنا دەروونی داکو هاریکاریا ڤی خەلکی بکەت و هندەک ژ مەینەت و دەردەسەریێن وان ب رێیێن دەروونی ئارام بکەت و بۆ ماوێ سێ سالان وەزارەتا زانست یا ئەلمانی دێ خەرجیێن وێ یێن دارایی ب ستویێ خۆڤە گریت، ژ بۆ وێ چەندێ جارەکا دی ئەڤ کەسە ژلایێ دەروونی ڤە بهێنە ڤەژاندن و تێکهەلی ناڤا جڤاکی ببن و ببنە مرۆڤێن خودان شیان، هەروەسا زانکۆیا دهۆک د گەل ئاوارەبوونا وێ هژمارا زور یا خەلکێ مە بۆ دەڤەرا دهۆکێ و دەوروبەران بەردەوام هاریکاریا وان ئاواران کریە چ ژلایێ وەرگرتنا پتر ژ هزار قوتابیێن کوردێن ئێزدی و کریستیان یێن خەلکێ دەڤەرێن کوردستانی یێن دەرڤەی ئیدارا هەرێما کوردستانێ، یان پێکئینانا تیمێن گەرووک یێن کۆلیژێن نوژداری و نوژداریا ددانان بۆ ناڤ ئاواران بۆ چارەسەرکرنا نەخۆشیێن وان، هەروەسا هاریکاریا وان ب کەرەستێن خارنێ و جلوبەرگان کو ب رێکا رێکخراوێن ئەمریکی چەندین جاران هاریکاری گەهاندینە ئاواران، زێدەباری کو تیمێن زانکۆیا دهۆک هەتا نوکە ژی بەردەوام سەرەدانا وان کەمپێن ئاواران دکەن بۆ چارەسەرکرنا نەخۆشیێن وان".
سەرۆکێ زانکۆیا دهۆک ئاماژە دا:" ژ لایێ پەیوەندیان ڤە زانکۆیا دهۆک پێشڤەچوونەکا بەرچاڤ ب خۆڤە دیتیە، چ ژلایێ رێککەفتێن زانستی ل گەل زانکۆ و ناڤەندێن ئەکادیمی یێن نێڤدەولەتی چ ژی ژ لایێ ڤەکرنا پشکێن زانستی یێن هەڤپشک ل گەل زانکۆیێن ناڤدارێن جیهانی، کو ئەڤە وەکو دەستکەفتەکێ زانستی یە بۆ زانکۆیا دهۆک و بۆ جارا ئێکێ یە ل دەڤەرێ و ئەم شانازیێ پێ دبەین، کا چاوا پێشمەرگێ قەرهرەمان مفا ژ شیان و سەربۆرێن وەلاتێن زلهێزێن جیهانێ وەرگرتینە بۆ پاراستنا وەلاتی و دویرکرنا تیرۆرستان، هەروەسا مە ژی وەکو زانکۆ ب رێکێن خۆ زانکۆیێن ڤان وەلاتان هان داینە کو بهێنە هەرێما کوردستانێ و کارێ زانستی و ئەکادیمی یێ هەڤپشک پێکڤە بکەین، داکو زانستی بێخینە د خزمەتا وەلاتی دا و ل گەل خەبات و بەرخودانا پێشمەرگەی وەلاتێ خۆ ب تایبەت ئەو دەڤەرێن شەر لێ پەیدا بووی جارەکا دی ب رێکێن زانستی و پشت بەستن ب سەربۆرا وەلاتێن پێشکەفتی ئاڤەدانیێ ڤەگەریننە وان دەڤەران".

قوتابیێن هەلگرێن مەشخەلا زانست و زانینێ وەک د. مسلح دهۆکی بەحسکری:"ئەڤرۆکە ل هەمبەری مالبات و کەس و کارێن وە دێ باوەرنامێن وە یێن زانستی ب بسپۆریێن جودا دەینە وە، دێ بۆ وان دیار کەین کو مە سوزا خۆ ل گەل وان بجه ئینا و ئەڤرۆکە هوین یێن بووینە خودان باوەرنامە، هوین نوکە د بەرهەڤن ژ بۆ خزمەت کرنا کوردستانێ ب تایبەت کو پشتی چەند رۆژێن دیتر دێ بەرەف سندوقێن دەنگ دانێ چین و دەنگی ژ بۆ سەرخوەبوونا وێ دەین، چونکو کەسانێن وەکو وە گەنج و خودان باوەرنامە دڤێت ستوینێن ئاڤاکرنا وەلاتی بن بەری هەر کەسەکی، هوین خەمخۆرێن ڤی وەلاتی بن، چونکو پاشەرۆژا ڤی وەلاتی یا گرێدایە ب هەوە ڤە، لەورا هەر ژ نوکە دڤێت هوین خۆ ب خودانێن ڤی وەلاتی بزانن و ل گەل برایێن پێشمەرگە هوین ب زانستێ خۆ دهەڤ چەپەر بن، داکو چ دەستێن دەرەکی بۆ نەهێنە درێژ کرن و هەر دەستێ بۆ هاتە درێژ کرن هوین وی دەستی ژ ناڤ ببەن، هەر ب هەلکەفتا دەرچونا گەرا 22 ئەم وەکو زانکۆیا دهۆک سوپاسیا وان لایەنان دکەین کو بەردەوام ل گەل زانکۆیا دهۆک د هاریکار بووینە:
ـ سوپاسیەکا تایبەت بۆ جەنابێ سەرۆکێ هەرێما کوردستانێ سەرۆک مەسعود بارزانی بۆ پشتەڤانیا جەنابێ وی یا بەردەوام بۆ زانکۆیا دهۆک هەر ژ دامەزراندنێ و هەتا نوکە.
ـ سوپاسیەکا بێ سنوور بۆ سەرۆکێ حکومەتا هەرێما کوردستانێ کاک نێچیرڤان بارزانی ژ بۆ پشتەڤانیا وان یا بەردەوام بۆ زانکۆیا دهۆک.
ـ سوپاس بۆ پەرلەمان و حکومەتا هەرێما کوردستانێ و وەزارەتا خواندنا بلند و ڤەکۆلینێن زانستی، و پارێزگەها دهۆکێ ب هەمی دەزگەهێن وێ ڤە بۆ وێ هەماهەنگی و پشتەڤانیا وان ل گەل زانکۆیا دهۆک.
ـ سوپاس بۆ هەمی پارتێن کوردستانی و ب تایبەتی پارتی دیموکراتی کوردستان، بۆ هاریکاری و پشتەڤانیا وان یا بەردەوام بۆ زانکۆیا دهۆک.
ـ سوپاسیەکا تایبەت بۆ مامۆستا و فەرمانبەرێن زانکۆیێ بۆ ماندیبوون و رەنجا وان یا بێ سنوور کو د ڤان کاودانان هەمیان دا بەردەوام بوون ل سەر کارێ خۆ و ئەڤ قوتابیێن دەرچوویی ژ ئەنجامێ ماندیبوونا وان یا بەردەوام بوویە.
ـ سوپاس بۆ ئێکەتیا قوتابیێن کوردستانێ بۆ ماندیبوون و هاریکاریا وان یا بەردەوام و هەماهەنگیا وان ل گەل قوتابیان ل ناڤ زانکۆیی.
پیرۆزباهیێ ل خەلکێ کوردستانێ ب گشتی و دەڤەرا دهۆکێ ب تایبەتی دکەین ب دەرچوونا ڤێ هژمارا زۆر یا قوتابیان ل زانکۆیا دهۆک و هەر وەسا پیروزباهیا کەس و کارێن قوتابیێن خوشتڤی دکەین بۆ پشتەڤانیا وان، هیڤی خوازین کاریگەریا وان و شین تبلێن وان ل هەمی دام و دەزگەهێن مە بهێنە دیتن و ڕۆلەکێ گرنگ و بەرچاڤ د پێشڤەربرنا جڤاکێ کوردی دا بگێڕن و ببنە سمبولێن وەلاتێ مە کو ئەڤرۆ گەلەک پێدڤی ب خودان شیانێن زانستی و تایبەتمەندیێن وان هەیە".
دووماهیک ئاخفتنا سەرۆکێ زانکۆیا دهۆک:" زانکۆیا دهۆک بەرهەمێ خوینا شەهیدانە، ژ بەر ڤێ چەندێ دڤێت ئەم ژی وەکو زانکۆ و قوتابی و مامۆستایێن زانکۆیێ وەفاداریا خۆ بۆ خوینا شەهیدان دیار بکەین و گیانێ وان شاد بکەین ئەو ژی دێ بێژین بەلێ بۆ ریفراندومێ، زانکۆیا دهۆک ئەڤرۆ ب هەلکەفتا گێرانا ڤان رێورەسمان سلاڤێن گەرم بۆ پێشمەرگێن کوردستانێ دهنێریت ئەوێن ل چەپەرێن شەری هەر ژ شنگالێ تا جەلەولا د چەپەرێن بەرخۆدانێ دا و سەرکەفتنێن مەزن ب دەستڤە ئیناین و پارستنا ئاخا وەلاتێ مەدکەن، سەرێ رێز و نوازشێ دچەمینین بۆ شەهیدێن کورد کوردستانێ وشەهیدێن بزاڤا رزگاریخوازا کوردستانێ و سەروەرێ وان بارزانیێ نەمر و کاک ئدریسێ هەردەم ساخ".

شێروان ئەحمەد، نوونەرێ قۆتابیان گۆت:"ئەڤرۆ ب خۆشحالی ڤەئەم ئاهەنگا دەرچوونا گەرا (22) یا قۆتابیێن بەکالوریۆسێ یا زانکۆیا دهۆک د گێرین و پالپشت و پشتەڤانین بۆ گێرانا ڤی کەرنەڤالێ زانستی یێ گرنگ بۆ پاشەرۆژا گەل و وەلاتێ مە، د ڤێ خولا دەرچوونێ دا قۆتابیێن دەرچوویی شانازیێ دکەن کو ل سالا ئەنجامدانا "ریفراندۆما سەربەخۆیا هەرێما کوردستانێ" ئاهەنگا دەرچوونێ دگێرن و پشتەڤانێن ڤێ بریارا نشتیمانی و چارەنڤیساز یا سەرکردایەتیا سیاسی یا کوردستانێ نە، بۆ هندێ هەتا هەتا گەلێ کوردستانێ ب هەمی پێکهاتەو ئول و نەتەوەب خۆشی و ئاشتی و سەرفەرازی بژین و ژ زۆلم و ستەم و دەردەسەریێن د دیرۆکا گەلێ مەدا ژ ئەنفال و کیمیاباران و جینوسایدان دووبارەنەبنەڤەو بۆ دووبارەنەبوونا یا دسەد و ئێک سالێن بۆری دا ب سەرێ گەلێ کوردستانێ هاتی پێکڤەدبەرهەڤین بێژین بەلێ بۆ ریفراندۆما سەربەخۆیێ".
شێروان ئەحمەد خویا کر:"گەلێ کوردستانێ قووناغێن دژوارێن ژیانەکا ئابووری و سیاسی و جڤاکی برینە، سەرەرای ڤان هەمی سەختی و نەخۆشیان بێ بەهر ژی نەبویەژ دەستکەفت و سەرکەفتنان ب تایبەتی د قووناغا پشتی سەرهلدانێ دا کو ئێک ژ بەرهەمێ خەباتا گەلێ کوردستانێ زانکۆیا دهۆک بوویە، دامەزراندنا وێ ل سالا١٩٩٢ێ ب پشتەڤانیا هەردەمی یا رێزدار سەرۆک مسعود بارزانی جهێ بیرئینان و رێزێ یە،ل ڤێرێسلاڤان دهنێرین بۆ ئێک ب ئێک مامۆستا و دامەزرێنەرێن ڤێ زانکۆیێ و ل هەمان دەم داخوازێ ژ حکومەتا هەرێما کوردستانێ دکەین هەمی شیانێن خۆ بدەتەکاری بۆ دامەزراندنا دەرچوویان و ڤەدیتنا دەلیڤێن کاری بۆ دەرچوویێن خۆشتڤی، ل ڤێرێ رۆلێ قەهرەمانانەیێ هێزێن پێشمەرگێ کوردستانێ ژبیر ناکەین کو ب خوینا خۆ سنۆرێن کوردستانێ نەخشاندین و سۆزێ ددەین کا چەوا پێشمەرگەیی ب خوین بەرەڤانی ژ ئاخ و کەرامەت و وەلاتێ مەکریەو ژ قەهرەمانی و خۆراگریا وان ب ئاشتی و ئازادی دژین، هوسا ئەم ژی ب زانست و زانینا خۆ خزمەتکارێن گەل و وەلاتێ خۆ بین و سلاڤان دهنێرین بۆ قەهرەمانی و فیداکاریا وان".
شیروان ئەحمەد بەحسکر:" ب فەر دبینین د ڤێ ئاهەنگا دەرچوونێ دا، سۆپاسیا رێزدار سەرۆک مسعود بارزانی، سەرۆکێ هەرێما کوردستانێ دکەین ژ بۆ هاریکاریا جەنابێ وی یا بەردەوام بۆ ناڤەندێن خواندنێ و ب تایبەتی زانکۆیان".
سۆپاسیا وان دەیک و بابان دکەین یێن خۆ ژار و قەردار کرین ژ پێخەمەت کچ و کورێن وان ژ کاروانێ زانینێ نەڤەمینن.
سۆپاس بۆ حکومەتا هەرێما کوردستانێ.
سۆپاس بۆ سەرۆکاتیا زانکۆیا دهۆک و بەخشینا ڤێ باوەرنامێ.
سۆپاس بۆ پارێزگەه و جڤاتا پارێزگەهێ.
ل دۆماهیێ دبێژین بژیت کوردستان، نەمری بۆ شەهیدان، بەرزو بلند بهەژیێت ئالایێ کوردستانێ.

هژمارا قوتابیێن دەرچووی

کولیژاپزیشکی 63
کولیژاچاندن 346
کولیژائەندازیاری 186
کولیژازانستێنمرۆڤایەتی 585
کولیژا پزیشکیا ڤیتێرنەری 44
کولیژا کارگێری و ئابوری 508
کولیژا یاسا و زانستێن رامیاری 70
کولیژا زانست 412
کولیژا پەروەدا بنیات 811
کولیژا پەروەردا وەرزشی 82
کولیژا پلاندانانا جهەکی و زانستێن کارەکی 58
کولیژا پەرستاری 45
کولیژا دەرمانسازی 35
کولیژا پزیشکیا ددانان 30
کولیژا پەروەردە - ئاکری 710
کولیژا زانستێن تەندروستی 55
کولیژا پەروەردا بنیات - ئامێدیێ ---
سەرجەم 4040