World AIDS Day at The University of Duhok

ب هەلكەفتا رۆژا جیهانی یا بەرهنگاربوونا نەخۆشیا ئایدزێ‌، ل رۆژا 3/12/2017 زانكۆیا دهۆك ب هەڤكاری ل گەل رێڤەبەریا گشتی یا ساخلەمیا پارێزگەها دهۆكێ‌ ئەڤ رۆژە ل كۆلیژا كارگێری و ئابووری ب رێورەسمەكی ساخكر.
د ڤی رێورەسمی دا دوو كەمپینێن پشكنینان بۆ قوتابیان هاتنە دانان بۆ پشكنینا نەخۆشیا ئایدزێ‌ و چەند نەخۆشیێن دیتر كو بێ‌ بەرامبەر ئەڤ پشكنینە دهاتنە ئەنجام دان، هەروەسا چەند پەیڤ ژی ل دۆر ڤێ‌ رۆژێ‌ هاتنە خواندن.
سەرۆكێ‌ زانكۆیا دهۆك پرۆفیسۆر د. مسلح دهۆكی د پەیڤەكی دا گۆت مە ل هەرێما كوردستانێ‌ تووشبوویێن نەخۆشیا ئایدزێ‌ یێن هەین، بەلێ‌ خۆشبەختانە ل دویف ئاماران رەنگە ئەڤ رێژە نەگەهیتە حالەتەكێ‌ مەترسیدار كو پێرابوونێن بلەز بهێنە وەرگرتن، بەلێ‌ هەر دڤێت هندەك پێنگاڤ بهێنە هاڤێتن داكو خەلكێ‌ مە هشیاریەك ل دەف پەیداببیت كا دێ‌ چاوا خۆ ژ ڤێ‌ نەخۆشیێ‌ پارێزن، هەروەكو زانستێ‌ نوژداریێ‌ دووپاتیێ‌ ل وێ‌ چەندێ‌ دكەت كو (خۆپاراستن باشترە ژ چارەسەریێ‌) لەورا ئەڤ هەوێن سالانە ل كوردستانێ‌ دهێنە ئەنجام دان د چارچووڤێ‌ ڤێ‌ گۆتنێ‌ دانە.
سەرۆكێ‌ زانكۆیا دهۆك هەروەسا گۆت مە وەكو زانكۆیا دهۆك و ب رێكا رێڤەبەریا گشتی یا ساخلەمیا پارێزگەها دهۆكێ‌ ئەڤ رۆژا جیهانی ساخكرە ڤە داكو بۆ قوتابیێن خۆ یێن خۆشتڤی مەترسیا ڤێ‌ نەخۆشیێ‌ و رێكێن خۆپاراستنا وێ‌ دیار بكەین و دێ‌ د بەردەوام بین ل سەر ڤان چالاكیێن ژ ڤی رەنگی داكو ژبلی دانا باوەرنامێ‌ بۆ قوتابیان هەروەسا رەوشەنبیریەكا گشتی ل نك وان ل دۆر هەر بابەتەكی پەیدا بكەین و وان ژ هەر نەخۆشی و مەترسیەكی دۆر بێخین.
راگرێ‌ كۆلیژا كارگێری و ئابووری ل زانكۆیا دهۆك د. رێبەر فەتاح د پەیڤەكی دا گۆت ئەنجامدانا ڤان جۆرە چالاكیان د ناڤ قوتابیان دا یا گرنگە ژ پێخەمەت هشیاركرنا قوتابیان بۆ خۆپاراستنێ‌ ژ نەخۆشیان، داخاز ژی كر كو ئەڤ رەنگە چالاكیە بەرفرەهتر ل ناڤ قوتابیان بهێنە ئەنجامدان.
د. نزار عسمەت رێڤەبەرێ‌ گشتی یێ‌ ساخلەمیا دهۆكێ‌ گۆت ڤایرۆسێ‌ ئایدزێ‌ ب رێیا وەرگرتنا خوینێ‌ و وەرگرتنا دەرمانێن بێهۆشكەر و ژ دایكا دووگیان بۆ زارۆكێ‌ وێ‌ و هەروەسا ب رێیاكریارێن سكسی یێن نەشەرعی دهێتە ڤەگۆهاستن.
رێڤەبەرێ‌ كاروبارێن خۆپاراستنا ساخلەمیێ‌ د. سیروان محەمەد دیاركر كو د ئەڤ سالە دا ب رێیا دوو تیمێن ساخلەمیێ‌ نێزیكی 100 هزار پشكنینێن ئایدزێ‌ ل دهۆكێ‌ ئەنجام داینە بەلێ‌ خۆشبەختانە چ حالەتێن تووشبوونا نەخۆشیا ئیدزێ‌ ل دهۆكێ‌ نەهاتینە تۆماركرن.