Engineering 2nd International conference at UoD

كونفرانسێ‌ دوویێ‌  یێ‌ نیڤدەولەتی یێ‌ كولیژا ئەندازیاری ل زانكۆیا دهۆك لژێر چاڤدێریا سەرۆكێ‌ زانكۆیا دهۆك (پ.د. مسلح محەمەد سەعید دهۆكی)، لژێر ناڤ و نیشانێن (نووترین داهێنان دزانستێ‌ ئەندازیاریدا) ل هولا كونفرانسان ل زانكۆیا دهۆك بۆ ماوەیێ‌ دوو رۆژان 26-27/ 4/ 2017ێ‌ پرێڤەچوو.

سەرۆكێ‌ زانكۆیا دهۆك، پ.د. مسلح دهۆكی گۆت:ئەندازیاری پەیدا بوویە وەك پێدڤیەكا مرۆڤی دڤێ‌ ژیانێ‌ دا و لدەسپێكێ‌ ژبۆ وێ‌ چەندێ‌ بوویە مرۆڤ جهەكی بۆ ڤەحەویان و ئاكنجیبوونا خۆ پەیدا بكەت و خۆ ژ گەرمێ‌ و سەرمایێ‌ ب پارێزیت و چەند پێدڤیا ژیانێ‌ ب هەبوونا تشتێن نوو بەرفرەه دبوو ئەو هند ئەندازیاریێ‌ پێشكەفتن بخوڤە دیت، ئانكو پێدڤیێن ژیانێ‌ هەر دەم دبنە ژێدەر بۆ داهێنانان، كۆ هندی ژیان یا بەردەوام بیت داهێنان ژی یا بەردەوامە.

سەرۆكێ‌ زانكۆیێ‌ گۆت ژی: گێرانا ڤی كونفرانسی ددەمەكی دایە كۆ داهێنان و پێشڤەچوون و پێشكەفتنا ئەندازیاری هەمی كەس بخوڤە گرێداینە، چ دبیاڤێ‌ ئەندازیاریا كارەب و كومپیوتەر و تەكنولوژیایێ‌ بیت یان چ ژلایێ‌ ئاڤاكرن و تەلارسازی و رێك و پرا بیت، كەواتە ئەڤ پێشڤەچوونە یێن بووینە پشكەك ژ ژیانا رۆژانە یا هەر كەسەكی و ئەكەر یا مەحال ژی نەبیت، ئەزیەت و زیانەكا مەزنە بۆ مرۆڤی بشێت رۆژەكێ‌ بیێ‌ ڤان پێدڤیان بژیت ئەڤێن ژ داهێنانێن ئەندازیاری پەیدا بووین.

ژبەر پێدڤیا دەڤەرێن شەری لێ‌ پەیدا بوویی ب تایبەتی و هەرێما كوردستانێ‌ ب گشتی ب ئاڤەدانكرن و وەرارێ‌ ئەم وەكو هەرێما كوردستانێ‌ مە پێدڤی ب ئەندازیاریەكا پێشكەفتی هەیە وەك پ.د. مسلح محەمەد سەعید گۆتی: داكر بشێن دگەل پێشكەفتنێن نوكە بین دبیاڤێ‌ ئاڤەدانی و دیزانیێ‌ دا ژبۆ ڤەگەراندنا ژیانێ‌ بۆ وان دەڤەرێن هاتینە وێران كرن و خەلكێ‌ وان مال و حالێ‌ خو بجه هێلاین دا ڤەگەرنە وارێن خو.

سەرۆكێ‌ زانكۆیا دهۆك ئاماژە دا كۆ هەرێما كوردستانێ‌ پێدڤی ب ژێر خانەكا هەمە لایەنیا بهێز و ب ئەندازیاریەكا پێشكەفتی هەیە و ڤێ‌ ژێر خانەیێ‌ دێ‌ برێكا ئاڤەدانكرن و رێك و پرا و كەرتێ‌ كارەبێ‌ و تەكنولوژیایێ‌ بهێز ئێخن ژبۆ هندێ‌ دەمێ‌ دەولەتا كوردی دئێتە راگەهاندن دا دبەرهەڤ بین بۆ لایێ‌ ژێر خانا ئاڤەدانیێ‌.

سەرۆكێ‌ لێژنا بلندا كونفرانسی (د. جەوهەر رەشید) راگرێ‌ كولیژا ئەندازیاری ل زانكۆیا دهۆك گۆت: بەری هەر تشتەكی بهاترین سلاڤ ئاراستەیی وان پێشمەرگەیێ‌ قەهرەمانان دكەم یێن ل سەنگەرێن شەری و بەرەڤانیێ‌ ژ كەرامەت و ئاخا كوردستانێ‌ دكەن.

راگرێ‌ كولیژا ئەندازیاری ل زانكۆیا دهۆك گۆت ژی: كونفرانسێ‌ ئێكێ‌ یێ‌ كولیژا ئەندازیاری ل سالا 2012ێ‌ هاتە ئەنجامدان و ئەڤرۆ كونفرانسێ‌ دوویێ‌ هاتە پرێڤەبرن ب پشكداریا (67) ڤەكولینێن زانستی، ئومێدەوارم لڤان هەر دوو رۆژێن كونفرانسێ‌ دان و ستاندنەكا پری زانست و زانیارێن دروست بیت و دووڤدا دێ‌ ڤان ڤەكولینان ل گۆڤارا زانكۆیا دهۆك ئێخینە بەر دەستێ‌ خواندەڤانان.

د. دلشاد عبدالجبار، ه. راگرێ‌ كولیژا ئەندازیاری گۆت: هەر دەم زانكۆیا دهۆك دەرگەهێن نڤیسینا ڤەكولینانان ڤەكرینە و ئەم ژی هەر چەند سالەكا جارەكێ‌ ل كولیژا ئەندازیاریی كونفرانسەكی ئەنجامداین داكر ڤەكولینێن نوو بهێنە خواندن.

 د. دلشاد عبدالجبار گۆت ژی: هەیڤا 12 ل سالا 2016ێ‌ مە بریا ردا كونفرانسەكی لسەر نوویترین پێشهاتەیێن زانستی ئەنجامدەین و بخوشبەختانە (118)ە ڤەكولەرا پشكداری كر و پشتی مە ڤەكولینێن وان داینە لێژنا تایبەتا ڤەكولینا ژ وان 67 ڤەكولین هاتنە وەرگرتن و د ماوەیێ‌ ڤان دوو رۆژاندا ئەڤ ڤەكولینە ژلایێ‌ ڤەكولەران ڤە هاتنە پێشكێشكرن.

زانست چ جارا نا راوستیت و بەردەوام دداهێنانێ‌ دایە وەك د. دلشاد عبدالجبار گوتی: كۆ زانستێن ئەندازیاری هەمی بواران بخو ڤە دگریت بگرە ژ كارەب و پەیوەندیكرن و وزە و ئەڤە هەمی پێشكەفتنێ‌ دایی، لەوا زانكۆیا دهۆك ئەڤ كونفرانسێ‌ زانستی یێ‌ نیڤدەولەتی گرێدەت دا مفایی ژ زانستێ‌ دەولی بكەت و بەراوەردیەكێ‌ دناڤبەرا زانستێ‌ نوكە ل هەرێما كوردستانێ‌ دئێتە ئەنجامدان و یێ‌ دەولی دا خالێن باشتر ب هەلبژێریت و كار لسەر بكەت.

چەندین پێشنیا و ئامۆژگاری ژلایێ‌ ڤەكولەران ڤە بۆ مە هاتنە دیار كرن و دێ‌ ئەم ژی وان پێشنیارا راسپاردەیی جهێن پەیوەندیدار كەین وەك ه. راگرێ‌ كولیژا ئەندازیاری گۆتی.

راگەهاندنا زانكۆیا دهۆك: هەلز عەلی سەلیم

فوتو: محەمەد بێسكی